Членовите на Централниот одбор на СДСМ синоќа му дадоа целосна поддршка на претседателот партијата, Зоран Заев, за преговорите со Грција околу уставното име на Македонија.
-Преговорите со Владата на Република Грција продолжуваат. Никогаш досега не сме биле толку блиску до решение, но и никогаш претходно немало толку големо пријателство меѓу Македонија и Грција од ова денес. Очекувам тоа да придонесе да дојдеме до решение кое не само што нема да го загрози, туку дополнително ќе го зајакне нашиот идентитет. Постои можност за решение кое граѓаните треба да го потврдат на референдум – рекол Заев пред членовите на Централниот одбор.
Зборувајќи за придобивките од постигнувањето на решение на спорот Заев истакнал дека со решението Македонија добива покана за членство во НАТО и се отвора можност за почеток на преговори за полноправно членство во ЕУ и додаде дека со тоа ќе се осигури нашата, но и иднината на идните генерации.
Централниот одбор едногласно донесе Заклучок со кој му пренесе целосно право на претседателот на СДСМ, Зоран Заев, да носи одлуки во врска со проблемот што Грција го има со нашето уставно име, со цел да се обезбеди подобра иднина на Македонија и сите нејзини граѓани.
Од СДСМ информираат дека на шестата седница на Централниот комитет се разговарало за актуелната политичка состојба во земјава, за разговорите околу проблемот што Грција го има со нашето уставно име, спроведувањето на реформите и мерките од програмата коишто обезбедуваат подобар живот за граѓаните, а станало збор и за внатрепартиските активности како и за одредени кадровски прашања.
