Целта на средбата кај претседателот Иванов беше нормализација на политичките процеси во државата затоа што имаше реакција од страна на граѓаните поради постапките предводени од обвинителството и од судовите, поврзани со настаните од 27 април годинава, изјави денеска премиерот Зоран Заев.
– Не би сакал да ги коментирам судските одлуки. Јас се посветувам на политичкиот аспект затоа што сум политичар и верувам дека во Македонија владеење на правото мора да има, но истовремено мораме сите да бидеме внимателни заради перспективите на државата. Македонија е исправена пред сериозни процеси и реформи, но верувам дека ќе најдеме решение преку разговор со политичките субјекти – рече Заев.
Премиерот истакна дека на средбата се разговарало отворено и дека средбите ќе продолжат. Тој нагласи дека во постапките не очекува ништо повеќе ниту ништо помалку од почитување на Уставот и на законите.
