Премиерот Зоран Заев попладнево со рускиот амбасадор Олег Шчербак разговараше за приоритетите на новата Влада, како и за можностите за соработка со Русија на демократска основа и во областите значајни за граѓаните за двете земји.
– Приоритет за Република Македонија е членство во Европската Унија и во НАТО. За таа цел насочени сме кон брз и квалитетен реформски процес – рече Заев и нагласи дека Македонија е определена да ги зајакне односите со државите пријатели на земјата во духот на демократските вредности.
На средбата, како што соопштуваат од кабинетот на премиерот, заеднички било констатирано дека постојат услови да се унапреди економската соработка меѓу двете држави.
– Развојот на соработката во областа на економијата, трговијата, културата, образованието може да донесе добро за граѓаните на двете земји – рече премиерот Заев.
Амбасадорот Шчербак му врачи на премиерот Заев честитка од премиерот Дмитриј Медведев, за неговото именување за претседател на новата Влада на Македонија.
