Премиерот Зоран Заев утрово се сретна со израелскиот амбасадор Дан Орјан, кој му врачи честитка од име на израелскиот премиер, Бенјамин Нетанјаху, за неговиот избор за претседател на Владата на Република Македонија.
Како што соопштија од кабинетот на премиерот, на средбата била изразена поддршка за промените во Македонија, а израелскиот амбасадор најавил интерес на израелски компании за инвестирање во Македонија, кои чекале политичка стабилизација во земјата.
– Ќе ја продолжиме и ќе ја засилиме добрата соработка со Израел, на сите полиња, што може да придонесе за квалитетен живот на граѓаните на Македонија. Новата влада е силно ориентирана кон економски развој на државата, а инвестициите се важни за отворањето нови работни места. Владата посветено работи на обезбедувањето услови за работа на компаниите со што се отвораат можности и за достоинствена егзистенција за работниците и за граѓаните на Македонија – рече Заев.
На средбата е поздравена добрата соработка помеѓу двете држави и договорено е продлабочување на односите меѓу двете земји и преку средби и посети на високо владино и државно ниво.
