!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Заев-Бејли: Договорот со Бугарија ги зајакнува напорите на Македонија за побрз влез во ЕУ


       
Скопје, 15 август, 2017 - 20:49 (META) 

Премиерот Зоран Заев и американскиот амбасадорот Џес Бејли денеска ги потврдија пораките пренесени на Самитот на земјите членки на Јадранската повелба одржан на почетокот на месецов во Подгорица, со кои се зацврстуваат евро-атланските перспективи на земјава, соопшти владината прес-служба.

На средбата Бејли ги реафирмирал пораките од билатералната средба на премиерот Заев со потпретседателот на САД, Мајк Пенс, дека Република Македонија може да смета на поддршката на САД за членство во Северноатланската алијанса.

„Премиерот Заев и амбасадорот Бејли, дискутираа и за Договорот за пријателство, добрососедство и соработка кој го потпишаа Република Македонија и Република Бугарија и оценија дека истиот претставува основа за проширување и унапредување на постојната соработка на земјите од регионот, како и тоа дека овој договор ги зајакнува напорите на Македонија за побрза интеграција во Европската Унија“, стои во соопштението и се додава дека соговорниците разговарале и за реформските активностите на новата Влада на Република во првите месеци од формирањето.