Поради снежните врнежи, забрана за движење на камиони е воведена на патот Гостивар – Кичево преку планинскиот превој Стража и на патниот правец Маврово – Дебар, соопшти Автомото-сојузот на Македонија (АМСМ).
Снегот што паѓа од ноќеска во поголемиот дел од земјава го отежна патниот сообраќај, забавено се одвиваат градскот и меѓуградскиот превоз, а засега нема значителни проблеми во железничкиот и во авиосообраќајот.
– Сообраќајот на државните патишта се одвива тековно, по влажни коловози во северниот, западниот и во југозападниот дел од земјава, а во другите делови коловозите се наместа влажни. Во раните утрински часови врнежи од снег со послаб интензитет се бележат во Крива Паланка, Страцин, Куманово, Тетово, Гостивар, планинскиот превој Стража, Кула и во Маврово. На Попова Шапка врнежите од снег се со среден интензитет. Врнежи од слаб дожд се бележат во Охрид и во Дебар – се наведува во утринскиот извештај на Автомото-сојузот на Македонија.