Премиерот на Србија, Александар Вучиќ, вчеравечер по седницата на Бирото за координација на службите за безбедност на Србија, посветена на ситуацијата во Македонија, порача дека Србија е мирна и стабилна, но и дека е подготвена да одговори на секој предизвик. Тој појасни дека се направени некои тактички промени на безбедносните сили и дека е подигната борбената готовност таму каде што треба.
Српскиот премиер смета дека Србија дејствувала смирувачки кон сè што се случува во Македонија.
– Повикавме на мир во Македонија оти тоа се однесува и на нас – вели Вучиќ, нагласувајќи дека Србија за Македонија во минатото направила повеќе од другите соседи, иако не ѝ било секогаш вратено со иста мера.
Тој рече оти видел колку луѓето во Србија се исплашиле поради случувањата во Македонија и истакна дека Србија нема да дозволи прогон ниту истребување на дел на својот народ на која било територија.
– Никого никогаш нема да го гибаме, ги почитуваме интегритетите и на БИХ и на Хрватска и на Македонија и на Албанија… Убеден сум дека нашата сила и нашата одбранбена моќ ќе бидат пропорционални на нашата економска соработка – вели српскиот премиер.