Врховниот суд на Република Македонија сè уште не ја закажал општата седница на која треба да се одлучува по барањето на Специјалното јавно обвинителство (СЈО) за изземање на претседателот на судот, Јово Вангелвоски, велат за „Мета“ од Врховниот суд.
– Во врска со Вашето прашање, Ве известуваме дека Врховниот суд на Република Македонија сè уште нема закажано општа седница на која ќе се одлучува по барањето за изземање на претседателот на Врховниот суд на Република Македонија, поднесено од Јавното обвинителство за гонење кривични дела поврзани и кои произлегуваат од содржината на незаконското следење на комуникациите – стои во одговорот на Врховниот суд.
СЈО бара изземање на претседателот на Врховниот суд бидејќи е дел од прислушуваните разговори што ги објави СДСМ, во период кога Вангеловски исто така ја извршувал функцијата претседател на судот.
Како што соопшти вчера СЈО, во прислушуваните разговори има разговор меѓу поранешниот министер за транспорт и врски, Миле Јанакиески, и Јово Вангеловски, како тогашен претседател на Врховниот суд, што, според СЈО, ја доведува во прашање непристрасноста на судијата Јово Вангеловски да постапува по таков тип предмети, поради постоењето на реална опасност од неговата претходна заинтересираност за решавање на предметот во определена насока.
Бидејќи станува збор за претседател на највисокиот суд во земјава, односно над него нема непосредно повисока судска инстанца, законот предвидел дека за негово изземање одлучува Врховниот суд на општа седница.
