Турската полицијата во симултани акции на повеќе места во земјата уапсила стотици лица под сомневање дека се поврзани со имамот Фетулах Ѓулен, кој живее во доброволен егзил во САД.
Турските медиуми јавуваат дека 803 лица денеска се уапсени во рации спроведени во секоја од 81 турска покраина. Осомничените се наводни оперативци на Ѓулен, кои им давале давале наредби на следбениците во полициските сили.
Околу 8.500 полицајци учествувале во операциите.
Апсењата се дел од кампањата која е покрената по неуспешниот обид за пуч, извршен минатата година во јули, за кој турските власти го обвинија Ѓулен. Повеќе од 47.000 лица се уапсени по воениот удар, соопшти министерството за внатрешни работи, меѓу кои 10.700 полицајци и 4.700 припадници на војската.
Ѓулен негира дека тој го оркестрирал пучот.
