Состанокот на претседателот на ДУИ, Али Ахмети, со четворицата потпретседатели на партијата, Садула Дураку, Теута Арифи, Изет Меџити и Невзат Бејта, сè уште трае во седиштето на ДУИ во Мала Речица. И вечерва бројни новинарски екипи исчекуваат резултати од разговорот зад затворени врати, а засега нема никакви информации за јавноста за тоа како течат преговорите.
Досега не е свикан состанок на централното претседателство на ДУИ, што говори дека, најверојатно, врвот на ДУИ сè уште не е подготвен да излезе пред највисокото раководно тело.
Инаку, партијата треба да донесе одлука дали ќе влезе во коалиција со ВМРО-ДПМНЕ и ќе ја формираат новата влада.
Состанокот почна некаде по 13 часот, откако во седиштето влегоа четворицата потпретседатели на партијата, Садула Дураку, Теута Арифи, Изет Меџити и Невзат Бејта.
Портпаролот на партијата, Бујар Османи, тогаш рече дека не се работи за никакви поголеми формални состаноци, туку за редовни партиски средби. И потпретседателката на ДУИ, Теута Арифи, пред да влезе во партиското седиште, накусо изјави дека се работи за редовни партиски состаноци.