По добиените информации од Министерството за животна средина и просторно планирање дека среднодневните концентрации на ПМ10-честички во воздухот се под дефинираниот праг на алармирање од 200 микрограми на еден кубен метар и нема зголемено загадување во текот на два последователни дена, Град Скопје информира дека се укинуваат вонредните мерки и интервентните препораки за намалување на загадувањето на воздухот што беа воведени на 30 јануари.
„Со тоа, мерките и препораките за намалување на загадувањето на воздухот се укинуваат веднаш. Но, Град Скопје за да им овозможи на граѓаните коишто на своите работни места пристигнале со автобус, бесплатно да се вратат дома, бесплатниот јавен превоз ќе се укине во 20 часот. Овие мерки и препораки за намалување на загадувањето на воздухот ќе се воведат повторно доколку се повтори епизодата со загадувањето на воздухот, а за што граѓаните ќе бидат навреме информирани“, информираат од градската администрација.
Претходно, Државниот инспекторат за животна средина информираше дека загадувањето на воздухот е под прагот на алармирање. Од таму вчера вршеле набљудување со изнајмен дрон над местата од кои може да се создава загадување на воздухот и откривање на прекршителите.
