Министерството за внатрешни работи на Република Македонија денеска го поздрави повикот на Полициски синдикат за правично и непристрасно утврдување на фактите насилството во Собранието на Македонија и додаве дека ќе ја почитува автономијата на Одделот за внатрешна контрола.
„Министерството високо ги цени ваквите сугестии и потенцира дека секогаш било и ќе биде на страната на правдата и почитувањето на законските прописи. Меѓутоа, министерот Агим Нухиу и останатите одговорни лица во Министерството немаат намера да се мешаат во работата на Одделот за внатрешна контрола и Работната група која ги истражува настаните од 27 минатиот месец во Собранието. Доследно ќе се почитува нивната автономија и професионалност во донесувањето одлуки. Согласно тоа, Министерството за внатрешни работи верува дека Одделот за внатрешна контрола ќе донесе правно издржани одлуки во врска со сите поединечни случаи“, стои во соопштението.
Министерството сепак порача дека поведувањето дисциплинска постапка и временото отстранување од работното место не значи автоматски престанок на работниот однос и ги повика претставниците на Полицискиот синдикат на средба со министерот Агим Нухиу.
„Само на тој начин, со заедничко партнерско делување, ќе можеме да придонесеме во решавање на овој и на сите други проблеми што ги засегаат членовите на синдикатот и сите вработени во Министерството“, стои во соопштението од МВР.
