„Република Македонија ги исполни сите услови за членство во НАТО уште во 2008 година на самитот во Букурешт. Само поради непринципиелната блокада од страна на Грција, Македонија не е членка на НАТО“, се вели во реакцијата на ВМРО-ДПМНЕ на изјавата на министерот за надворешни работи на Грција, Никос Коѕиас, кој уште еднаш повтори дека грчката влада не отстапува од ставот за името и дека нема да потклекне на притисоци.
Од партијата додаваат дека изјавите на шефот на грчката дипломатија, во кои се повторуваат црвените линии на Грција, не одат во прилог на добрососедските односи.
„Со изјавата дека Македонија ќе може да стане членка на НАТО дури откако ќе се реши проблемот што Грција го има со нашето име, Коѕиас не придонесува за надминување на проблемот. Напоменувањето дека Грција нема да потклекне под притисоците за зачленување на Република Македонија во НАТО под привремената референца може да доведе до дополнително закопување на двете страни во сопствените ровови“, велат од ВМРО-ДПМНЕ.
Од партијата му порачуваат на премиерот Зоран Заев „Македонија што побргу да стане членка на ЕУ и на НАТО, но притоа да не се задира во идентитетските прашања и да не се склучуваат договoри на штета на македонскиот народ и држава“.
