Владата утре ќе ја одржи 40. седница, на која Министерството за правда ќе го презентира најновиот текст на предлог-законот за амнестија по јавната расправа за законот, соопштија од владината прес-служба.
Станува збор за предлог-законот што Владата го усвои во септември, а кој предвидува амнестија на осудени лица. Како што беше соопштено тогаш, законот е израз на добра волја на државата кон одредена група направосилно осудени лица, заради нивна ресоцијализација и растоварување на затворите од прекумерниот број на лица кои издржуваат казна во нив.
На предлог на Министерството за финансии, на седницата ќе биде разгледана и националната стратегија за борба против перење пари и финансирање на тероризам, додека Министерството за информатичко општество и администрација ќе предложи измени и дополнувања на повеќе закони кои произлегуваат од измените и дополнувањата на Законот за јавна администрација.
Министрите ќе ја разгледаат и информацијата за преземените активности за склучување меѓувладин договор со САД во врска со американскиот закон за усогласување на даночните обврски (Foreign Account Tax Compliance Act -FATCA), чија цел е да го спречи затајувањето данок од американските даночни обврзници кои имаат сметки во странство.
На предлог на Министерството за образование и наука, на седницата на Владата ќе биде разгледана и информацијата за резултатите што ги постигнале учениците од Македонија во меѓународните програми за оценување (ПИСА и ТИМСС) и реформите што произлегуваат од нив. Министрите ќе ја разгледаат и информацијата за текот и за прогресот на активностите во врска со проектот за намалување на партиципацијата за 50 отсто на студентите од самохрани и еднородителски семејства.
