Владата на денешната 42. седница ќе ги разгледува барањата за прием во државјанство на Република Македонија, на Акхмет Кесер, Ичоз Севеџен, Халил Ирфан Бумин и Вели Кујуџи.
Од Владата информираат дека, овие барања ќе се разгледуваат согласно член 11 од Законот за државјанството, според кој „странец кој ги исполнува условите од член 7 став 1 точки 1 и 8 на овој закон може со природување да стекне државјанство на Македонија ако тоа претставува особен научен, економски, културен, спортски или друг национален интерес.“
„Владата на Република Македонија со уредба ќе ги утврди критериумите за особен научен, економски, културен, спортски или друг национален интерес за стекнување на државјанство во смисла на став 1 од овој член. Владата дава мислење за постоење на особениот интерес во смисла на став 1 на овој член“, се вели во член 11 од Законот за државјанство.
Халил Ирфан Бумин е управител на компанијата „Пера констракшн“ чија што основна дејност е проектирање и градежни работи како и проектирање и изработка на водоводни системи.
Името на Ичоз Севеџен е поврзано со Балканска млекара ДООЕЛ Скопје која e oснована во 2012 година како подружница на „Суташ“ кој е турскиот водечки бренд за млеко и млечни производи.
