Компанијата „Витаминка“ се претстави на еден од светски највлијателните саеми на кондиторски производи, саемот “Кина-Централна и Источна Европа експо за инвестиции и трговија со храна“.
– Фактот што бевме дел од овој саем значи дека го добивме и признанието за квалитет на нашите производи, кои ги задоволуваат високите стандарди во Централна и Источна Европа. Саемот „Кина-ЦИЕ експо“ е еден од водечките саеми воопшто поради големиот број учесници, но и поради тоа што во фокусот има инвестиции и трговија, а не само изложување и затоа претставува исклучителна можност за сите присутни. Големиот број изложувачи, увозници и посетители, ни даде одлична можност за презентирање на нашите производи, зацврстување на веќе воспоставените бизнис-врски, но, во исто време, и можност за иницијални контакти со потенцијални соработници и истражување на условите за проширување на пласманот на производите и остварување на планираните стратегиски и бизнис-планови – изјави Љупчо Велески, директор за извоз во „Витаминка“.
Изложбениот саем „Кина-ЦИЕ експо“ претставува прва сеопфатна инвестициско-трговска платформа која се воспоставува помеѓу Кина и земјите од Централна и од Источна Европа (ЦИЕ).