Вистината за случувањата од 9 мај 2015 година во Куманово мора да излезе на виделина и случајот ќе биде расчистен докрај, се вели во реакцијата на СДСМ на утринското соопштението на ВМРО-ДПМНЕ, во врска со настаните од 9 и од 10 мај 2015 година во Диво Насеље, Кумановско, каде загинаа осум припадници на македонските безбедносни сили.
„Тоа е должност кон семејствата на осумтемина загинати бранители, кон семејствата што останаа без домови и кон сите граѓани на Република Македонија. СДСМ изразува почит кон загинатите бранители и кон сите граѓани на Куманово и на Македонија кои не дозволија провокациите од каков и да е мотив, да ја нарушат стабилноста на државата“, стои во соопштението на СДСМ.
Од партијата нагласуваат дека правдата мора да допре до извршителите, но и до инициајторите и до нарачателите на кумановските настани. Оттаму најавуваат дека детално ќе се истражат индициите за вмешаност на одредени структури од досегашната власт во немилите настани и дека тоа ќе биде изведено на транспарентен, независен и професионален начин.
„Новата влада предводена од СДСМ, ќе се посвети на целосно расветлување на случајот и на неговата заднина. Ќе биде побарана и меѓународна поддршка во истрагата заради обезбедување на сите релевантни информации, но и за обезбедување на целосна доверба на граѓаните во резултатите од истрагата“, велат од СДСМ и додаваат дека никој нема да биде амнестиран од одговорност, доколку се докаже дека на каков било начин бил дел од инцидентот што ја загрози безбедноста на државата.
