Поранешниот дикректор на Управата за безбедност и контраразузнавање, Зоран Верушевски, доби затворска казна од три години за неодозволено поседување оружје.
„Ценејќи ги фактите и доказите приложени од Основното јавно обвинителство и од одбраната во предметот, како и со детална анализа на завршните зборови на странките, судечкиот совет, по советување и по гласање, донесе пресуда со која обвинетиот З.В. го огласи за виновен за кривичното дело што му се става на товар и во согласност со олеснителните и отежителните околности, како и со правилникот за одмерување казни кој е на сила, му одреди казна затвор во траење од три години“, се вели во соопштението од Основниот суд Скопје 1.
Верушевски, кој беше уапсен на 23 јануари, во притвор помина повеќе од шест месеци и ќе остане во притвор до правосилноста на пресудата.
Тој, како првообвинет во случајот „Пуч“, се товари за неовластено прислушување, шпионажа и за државен удар, а на 5 август ќе го има првото судско рочиште во овој случај.
