Честитајќи го претстојниот празник Велигден на граѓаните на Македонија, претседавачот на Собранието, Трајко Вељаноски, следното продолжение на конститутивната седница го закажа за вторник (18 април), во 11 часот.
Пратениците и на 12. продолжение на конститутивната седница ги застапуваа своите партиски ставови и расправаа за тиранската платформа, законот за употреба на јазиците, Охридскиот рамковен договор и за правата и за обврските што произлегуваат од него.
Пратеничката од ДОМ, Маја Морачанин, истакна дека овие 12 дена, преку работата на Собранието, граѓаните се увериле во тоа што значи изразот „заробена институција“.
„Очигледно е дека под превезот на интересот на народот и наводна дебата, се оневозможува избор на членовите и на претседателот на Комисијата за избори и за именувања и на претседател на Собранието. Се извинувам што со овие мои три минути ја продолжувам агонијата во Собранието“, изјави Морачанин.
