Во амфитеатарот на Министерството за надворешни работи, утре ќе се одржи првиот годишен Форум за управување со интернет – ИГФ МКД (Internet Governance Forum Macedonia).
Целта на настанот е подигнување на свеста и промовирање подобро разбирање на „управувањето со интернетот“.
– Форумот за управување со интернетот Македонија – ИГФ МКД е посветен на решавање на прашањата како што се слободниот пристап, инфраструктурата, квалитетот на услугите, локалните содржини и локалните апликации, кибер-безбедноста, политиките и регулаторната средина, балансираната родова застапеност итн., преку доведување на различните засегнати чинители на една платформа за широка дискусија за предизвиците со кои се соочуваат и преку дискусиите да предлагаат решенија – вели координаторот на Форумот, Александар Ичоќаев.
Според него, Форумот се стреми да се идентификуваат локалните проблеми и да се предложат решенија преку обезбедување можност за зајакнување на капацитетите на младите луѓе и за нив, да се идентификуваат нови проектни идеи во соработка со локални и со меѓународни експерти, да се споделуваат знаења и искуства и да се помогне во создавање широка платформа за расправа за прашањата на управувањето со интернетот во Македонија.
Инаку, Форумот за управување со интернет – ИГФ е всушност дел од вертикалната структура на глобалниот ИГФ, кој е под покровителство на Обединети нации. Тоа е отворен, инклузивен и неформален простор за дијалог за прашањата на управувањето со интернетот, помеѓу сите засегнати во општеството.
– ИГФ е значаен форум каде што претставниците од граѓанското општество, индустријата, техничката заедница и носителите на одлуки на еднакво рамниште дискутираат за клучните предизвици поврзани со управувањето со интернетот. Со мандат на Обединетите нации, неформалната природа на ИГФ промовира инклузивна, сеопфатна и непосредна размена на идеи за важни прашања и политики, кои се важни за интернетот да остане глобален ресурс достапен за сите – вели Бардил Јашари, извршниот директор на Фондацијата за интернет и општество „Метаморфозис“.
И оваа година во Женева, „Метаморфозис“ ќе учествува и ќе продолжи да дава значаен придонес за овој влијателен форум за да го застапува јавниот интерес за заштита на приватноста на интернет, слободата на изразувањето, отворениот пристап до знаењето и владеењето на правото.
– Во Македонија, досегашните иницијативи за организирање локален ИГФ биле изолирани и затворени, освен досегашните успешни иницијативи како проектот за интернет-слобода во Источна Европа и во Евроазија, поддржан од Американската адвокатска комора (АБА РОЛИ) каде што учествува „Метаморфозис“ или конференцијата „Е-општество“, каде што се презентираат и дискутираат теми кои се релевантни за ИГФ, но пред сè за развојот на интернетот во Македонија. Основните принципи на организирање форум од ваков тип подразбираат отвореност, инклузивност и учество на сите што може да придонесуваат за овие важни прашања. Тоа што е суштински важно е дека тие треба целисходно да ги застапуваат интересите на сите засегнати страни, а кои се однесуваат на прашања поврзани со управувањето, одржливоста, безбедноста, стабилноста и развојот на интернетот во Македонија. Но, за среќа, тоа полека се менува, така што неодамна е иницирано организирање на локален ИГФ во Скопје, на кој ќе учествуваме со една многу важна тема, а во насока на целите на нашата организацаија – вели Јашари.
ИГФ МКД ќе функционира како процес што вклучува најмалку еден годишен состанок со поврзани подготвителни активности, како и меѓуактивности, вебинари и анкети. Овој процес ќе се планира и ќе се спроведува на принципот „оддолу-нагоре“, на отворен и на транспарентен начин.
Отворените дискусии за време на состаноците треба да се преточат во клучни пораки, во конципирање на главни правци, можни цели и предлози за идни конкретни активности. Овие пораки, пак, треба да помогнат, да информираат и да влијаат врз процесот на донесување одлуки во рамките на владините тела, собранието, приватните компании, образовните институции и на регионални организации.