Предлогот студентите што не го положиле првиот дел од државниот испит по втората студиска година да може да ги слушаат предметите од третата студиска година е прифатлив за Универзитетот за информатички науки и технологии „Св. Апостол Павле“ од Охрид, чија идеја и беше оваа измена.
Во соопштението на Универзитетот „Св. Апостол Павле“, потпишано од ректорот Нинослав Марина, е наведено дека единствена цел на предлогот е да им овозможи на студентите поголема флексибилност за време на студирањето.
„Врз основа на прифатените сугестии дадени од нашиот управувачки и наставно-научен кадар, Универзитетот за информатички науки и технологии „Св. Апостол Павле“ – Охрид дава целосна поддршка на пакетот реформи за унапредување на квалитетот на високото образование и воопшто на образовниот систем во земјата, што го предлага Владата на Република Македонија“, стои во соопштението на Универзитетот од Охрид.
