Украинската влада објави дека Русија „ја премина црвената линија“ и оти Киев повторно се подготвува за војна на истокот на земјата.
Главна задача на вооружените сили е „подготовка за борба“ во време кога проруските сепаратисти ги групираат силите, соопшти министерот за одбрана, Степан Полторак, на состанокот на владата во Киев, јавуваат украинските медиуми.
Премиерот Арсениј Јацењук уверува дека владата прави сè за да ја смири ситуацијата и ги обвини Русија и сепаратистите дека го прават спротивното.
– Светот не страда од далтонизам, а црвената линија е премината не десеттина туку стотина пати – рече Јацењук.
Сепаратистите повторно ги отфрлија тврдењата дека поседуваат проруско оружје и додадоа дека ги преместуваат војниците во Донецк бидејќи владините сили го бомбардираат.
– Имаме многу оклопни возила кои ги заробивме од украинската војска, тоа се сега наши трофеи – рече Борис Литвинов, еден од лидерите на бунтовниците во Донецк.
