Напаѓачот Стивен Педок, кој уби повеќе од 50 лица на концерт во Лас Вегас, во хотелската соба од која стрелал, имал 23 парчиња оружје и две направи за забрзување на оружениот оган, јавуваат светските медиуми.
Станува збор за уреди кои кога ќе се монтираат на полуавтоматско огнено оружје, тоа станува и работи како целосно автоматско.
Ваквите направи, кои се понова технологија, изминативе години го привлекоа вниманието на властите бидејќи со нивна помош полуавтоматска пушка се претвора во оружје кое може да истрела од 400 до 800 куршуми за една минута.
Полуавтоматското оружја бара едно притискање на орозот за истрелување на секој куршум, додека за автоматското огнено оружје е доволно едно притискање на орозот за оружјето да пука непрекинато сè додека има муниција.
Ваквите уреди во суштина се додатоци на дршката на пиштолот или на кундакот на пушката и можат да се постават така што се потпираат на орозот и непрекинато го повлекуваат користејќи го повратниот удар при истерлувањето на куршумите.
Педок, кој е поранешен пожарникар, во својата куќа во Мескит, Невада, имал уште 19 парчиња огнено оружје.
Тој, во неделата во Лас Вегас, уби 59 лица и рани уште неколку стотини, за време на фестивал во близина на хотелот. Полицијата упадна во неговата хотелска соба на 32. кат, по што соопшти дека Педок се самоубил откако го изврши најсмртоносното масовно стрелање во современата историја на САД.
