Во сообраќајна несреќа што се случи попладнево кај селото Требиште во Голо Брдо, три лица загинаа, а едно е тешко повредено.
Од добиените повреди, на самото место починале Азем Карабрахами (21) од селото Мало Острени, неговата сестра Елена Бајрами (32) од село Тучепи и Муса Нуредини (35) од село Мало Острени, кој управувал со возилото.
Тешки повреди добил Гентиан Сула (27), кој прво бил пренесен во Општата болница во Дебар, а по укажаната прва медицинска помош, бил префрлен на лекување во регионалната болница во пограничниот албански град Пешкопеја, 20 километри оддалечен од Дебар.
Несреќата се случила околу 15 часот, на влезот во селото Требиште, кога возачот изгубил контрола, по што возилото излетало од патот и паднало во бездна.
По отворањето на граничниот премин Требиште – Џепиште, жителите од Голо Брдо речиси секојдневно доаѓаат во Дебар да пазарат. Предност е и малата оддалеченост од дванаесетина километри или, временски, помалку од половина час возење.
