Штип во изминатите три дена интензивно живее со проектот „Живи библиотеки: Архиви на граѓанска непослушност“. Проектот кој опфати десетина активности, завршува денеска со настап на читачката група од Белград „Учитељ незналица и његови комитети“ во 13 часот и со јавно читање на книгата „Национализмот во(н) контекст“ на Здравко Савевски и на Мариглен Демири во 18 часот.
Белградската читачка група претставува жива архива на југословенската хуманистика. Нејзините членови, низ дискусии, размислување, читачки групи и низ дружење, ги создаваат новото знаење и архиви.
Левичарското движење „Солидарност“ преку читањето на книгата „Национализмот во(н) контекст“ на Здравко Савевски и на Мариглен Демири, сака да ги прикаже случаите на соработка помеѓу Македонците и Албанците во периодот од Илинденското востание до Народноослободителната војна.
Овие активности се дел од проектот „Живи библиотеки: Архиви на граѓанска непослушност“ на кураторите Ивана Васева и Филип Јовановски.
Во изминатите два дена се одржаа неколку дискусии, јавни читања и донирање книги.