Здравствената состојба на кандидатката на Демократската партија на претседателските избори во САД, Хилари Клинтон, стана нова мета на кампањата на нејзиниот републикански соперник, Доналд Трамп, а многу членови на неговиот изборен тим посегнуваат и по теории на заговор кои дополнително ги подгреваат сомнежите.
Трамп во последните неколку дена на своите митинзи повеќепати повтори дека 68-годишната Клинтон „нема физичка и ментална способност“ да биде претседателка на САД, а на „Твитер“ осамна објава „Каде е Хилари? Таа спие“.
Многу членови од тимот на Трамп, исто така, со своите изјави ги подгреаја сомнежите дека кандидатката има здравствени проблеми, а и Рудолф Џулијани, некогашниот градоначалник на Њујорк, вчера за телевизиската мрежа „Фокс њуз“ рече дека „Клинтон е уморна и изгледа болно“.
There's NO DOUBT @HillaryClinton has health issues: maybe Parkinson's Disease? It's SERIOUS & Americans MUST be told pic.twitter.com/RiWldTHAbo
— Edward Anthony Rayne (@rayne_ea) August 11, 2016
– Во медиумите се гледа дека Хилари покажува знаци на болести. Доволно е само внимателно да ја следат и да ја снимаат, а потоа да ги погледнат снимките – рече Џулијани.
Тој, исто така, на „Твитер“ објави фотографии на кои Клинтон е бледа и има подочници, како и фотомонтажа која прикажува како на необичен начин ја затресува главата.
Личната лекарка на Хилари Клинтон, Лиза Бардак, рече дека поранешната државна секретарка е „во одлична физичка состојба и е подготвена да стане претседателка на САД“ и оти потресот на мозокот, кој го имала во 2012 година, не оставил последици.
https://twitter.com/RealRickyVaughn/status/763822614615916544
Противниците на Клинтон ѝ припишаа и Паркинсова болест, епилепсија и неуролошки проблеми, поврзувајќи ги со потресот на мозок, а веб-страницата „Брејбарт“, чиј сопственик е новиот директор на кампањата на Трамп, Стив Банон, објави дека „здравјето на Хилари Клинтон наскоро ќе стане главна тема на претседателската кампања“.
