Во функција на надминување на 16-годишниот спор, митрополитот на Дебарско-кичевската епархија, владиката Тимотеј, по 20 години „австралиски пост“, деновиве повторно престојува на потконтинентот, во обид за надминување на недоразбирањата што владиката Петар ги има со некои македонски црковни општини.
Во интервју за австралиското радио СБС, владиката Тимотеј вели дека таму е со одредена должност, да биде администратор на неколку македонски црковни општини кои сега се организираат под надлежност на Светиот архиерејски синод (САС) на МПЦ-ОА.
– Се сретнав со претставници на најголем дел македонските црковни општини под ингеренција на САС на МПЦ, со кои се поставија темелите на една нова епархија на МПЦ. Наскоро и оваа епархија ќе почне да работи според каноните на МПЦ. Очекувам дека САС ќе ја прифати оваа одлука и покрај тоа што, можеби, ќе има некакви забелешки од некого. Тука долго време има една недоверба меѓу црковните општини и синодот. Ќе треба време таа изгубена доверба да се врати и пак сите македонски црковни општини да се зближат и да се соединат. Се надевам дека тоа соединување ќе се случи наскоро. На тој план се трудам да направам колку што можам повеќе во интерес на МПЦ. Со митрополитот Петар сме членови на едно тело, на САС, и ако таму можеме да соработуваме, не гледам зошто да не соработуваме и тука, на австралиски терен. Најдобро би било тие делби и поделби да ги нема – вели Тимотеј во интервјуто за австралиското државно радио СБС од Мелбурн, програма на македонски јазик.
