Францускиот амбасадор Кристијан Тимоние изјави дека посакуваат кризата што побргу да се реши за да може Македонија повторно да се врати на вистинскиот пат, кон приближување и интегрирање во ЕУ и во НАТО.
– Посакуваме климата да остане воздржана и во вистинска согласност меѓу сите етнички заедници што ја сочинуваат оваа земја – изјави Тимоние при посетата на компанијата „Завар“.
Тој истакна дека е запознаен со писмото на Ѓорге Иванов, но не сакаше да го коментира бидејќи тоа не било адресирано до претседателот на Франција.
– Се запознав со писмото што го упати претседателот Иванов до претседателот на Европскиот совет, претседателот на САД, турскиот претседател и до генералниот секретар на НАТО. Ќе разберете дека воопшто нема да коментирам за писмо кое не е испратено до претседателот на Француската Република. Тоа писмо ќе биде разгледувано во рамки на Европскиот совет в петок – рече Тимоние.