Министерот за животна средина, Нурхан Изаири, и градоначалничката на Тетово, Теута Арифи, денеска го посетија новиот водоснабдителен систем, кој сè уште се гради на падините на Шар Планина. И двајцата оценија дека проектот за нов водовод ќе заврши за неполн месец.
– Проектот за нов водоснабдителен систем, според договорот, требаше да биде изграден до крајот на декември годинава. Но, градежните зафати беа забрзани и цевките од новиот водовод ќе бидат поставени за две-три недели. Истовремено се работи и на придружните објекти од водоводот, како што се шахти и слично – изјави министерот Изаири.
Тој додаде дека наредниот месец Тетово со новиот водовод, ќе добие дополнителни 200 литри вода во секунда, што е двојно поголемо количество од сегашната издашност на вода, која протекува од стариот водоснабдителен систем.
Градоначалничката на Тетово, Теута Арифи, изјави дека конечно ќе се реши деценискиот проблем со водоснабдувањето во градот.
– Водата од новиот водовод ќе можеме да ја користиме во зависност од добиените податоци од Центарот за јавно здравје, откако ќе се потврди дека таа е хемиски и бактериолошки исправна. Но, и овој проблем ќе се надмине, затоа што работиме на изградба на филтер-станца за новиот водовод. Парите за овој проект, веќе се одобрени од Европската банка – рече градоначалничката Арифи.
И додека секој месец властите даваат оптимистички изјави, дека ќе се реши проблемот со водоснабдувањето, рестрицкиите на водата за пиење во Тетово станаа вообичаена појава. Поради летната горештина, во некои делови на градот вода нема во текот на целиот ден.
– Веќе сме навикнати да немаме вода. Полниме во шишиња и во буриња, па ја користиме во текот на денот. Добро е што имаме вода неколку часа во вечерните часови – изјави еден жител од горниот дел на градот.
Од Јавното комунално претпријатие Тетово велат дека рестрикциите на водата за пиење ќе продолжат сè додека не се промени хидробиолошката состојба, односно не заврнат поголеми количества дожд, со кои издашноста на шарските извори би се зголемила за дополнителни 100 литри вода во секунда.
