Блокадата кон регионалната депонија Русино, која изминативе четири месеци важеше за камионите од комуналните претпријатија од полошкиот регион е остранета. На вчерашната средба одржана во Гостивар, Центарот за полошки плански регион ги прифати барањата на жителите од гостиварските села, кои не дозволуваа да се носи сметот до Русино.
– Ги прифативме барањата на жителите од гостиварските села и тие се согласија да ја тргнат блокадата. Дел од тие барања се изградба на патот кој води до Русино и постапка за менаџирање на оваа депонија, која треба да заврши до крајот на јануари идната година. Договорено е отпадот да се носи исклучиво во вечерните часови, а транспортот да се врши со соодветна механизација – изјави градоначалничката на Тетово, Теута Арифи која раководи со Центарот за полошки плански регион.
Арифи изјави дека тетовскиот отпад во Русино ќе се носи од утре, откако ќе се подготви теренот за складирање на сметот.
Поради блокадата кон Русино, но и отежнатото носење на тетовскиот отпад до депонијата Дрисла, изминатите десетина дена на претоварната станица за смет во Тетово секојдневно се трупаат стотици тони отпад.
