Британската премиерка Тереза Меј денеска постигнала договор со Демократската унионистичка партија на Северна Ирска за поддршка на партијата на нејзината малцинска влада пред гласањето за важните закони во британскиот парламент.
Портпаролот на Дауининг стрит потврдил дека договорот меѓу конзервативците и унионистите е потпишан, јавуваат британските медиуми.
Конзервативците на Тереза Меј го изгубија апсолутното мнозинство во Долниот дом на британскиот парламент на предвремените парламентарни избори што се одржаа на 8 јуни и за да останат на власт им е потребна поддршката на партијата од Северна Ирска, која има 10 пратеници.
Конзервативците и Демократската унионистичка партија заедно имаат 327 пратеници, а за мнозинство во британскиот парламент се потребни 326 од вкупно 650 пратенички места.
Договорот меѓу двете партии предизвика остри реакции во Лондон, бидејќи Демократската унионистичка партија е десничарска партија која, меѓу другото, е против абортусот и истополовите бракови, а некои од нејзините членови ги негираат климатските промени и употребуваат сексистичка реторика.
Поранешниот премиер на Република Ирска, Енда Кени, предупредил дека кревкиот мир во Северна Ирска може да биде доведен во прашање со договорот меѓу конзервативците и демократската унионистичка партија.
