Еден до друг, без облека, легнати на кревет и во фаза на распаѓање. Вака биле најдени телата на 33-годишниот маж и на 27-годишната девојка во мотел, во индустрискиот дел на Битола, информира полицијата.
Во исчекување на официјалните информации од обдукцијата, во јавноста веќе се шират шпекулации дека починатите, инаку Роми од битолската населба Баир, биле во љубовна врска, а за евентуалните причини за смртта, се шпекулира дека, покрај убиство и самоубиство, можно е да станува збор и за предозирање со дрога.
Обвинителката од Битола, Павлина Јанкуловска, вели дека се собираат докази, шпекулациите се ставени настрана, а обдукцијата ќе го даде официјалниот извештај, како и кога настапила смртта.
Вчера 33-годишниот И.К. и 27-годишната девојка Ѓ.И. од Битола беа најдени мртви во мотелот „Пржо“, лоциран на излезот од градот на патот за РЕК Битола. Тие ја изнајмиле собата на 24 октомври, а откако персоналот во мотелот некоку дена не ги забележал да излегуваат и да влегуваат, решиле тие да влезат во собата по што ги откриле двете безживотни тела.
А.Д.
