Заев и Ципрас во Минхен ќе примат награда


Минхен, 15 февруари, 2019 - 13:47 (META) 

Премиерот Зоран Заев од денеска до недела заедно со владина делегација ќе присуствува на годинешната Минхенска конференција за безбедност.

На настанот ќе има заедничка дискусија за Република Северна Македонија и Република Грција на која како главни панелисти се предвидени премиерите Зоран Заев и Алексис Ципрас.

„Оваа панел дискусија на Минхенската конференција за безбедност традиционално им е посветена на добитниците на главната награда на конференцијата „Евалд Фон Клајст“, која оваа година свечено ќе им биде врачена на премиерите Зоран Заев и Алексис Ципрас на посебната церемонијална вечера чиј домаќин е премиерот на Федералната држава Баварија Флориан Херман“, се вели во соопштението од влада.

Предвидено е Заев да има билатерална средба со премиерката на Кралството Норвешка, Ерна Солберг, со претседателот на Црна Гора Мило Ѓукановиќ, со премиерот на Косово Рамуш Харадинај како и со сенаторот Џејмс Риш, претседавач на Комитетот за надворешни работи на Сенатот на САД и со поранешниот потпретседател на САД Џо Бајден.


Владата донесе одлука 14 и 15 февруари да бидат денови на жалост


Скопје, 13 февруари, 2019 - 23:47 (META) 

Владата на вонредна седница донесе одлука 14 и 15 февруари да бидат денови на жалост поради тешката сообраќајна несреќа која се случи на патниот правец Скопје – Тетово.

Премиерот Зоран Заев по завршување на седницата соопшти дека бројката на загинати се зголеми на 14, а шестмина се борат за живот.

„Автобусот се движел на релација Скопје-Тетово, несреќата е кај село Ласкарци. Неутврдени се причините, истрагата е под раководство на надлежниот обвинител. Денеска е завршена на лице место, продолжува, и веднаш штом ќе заврши, ќе бидат соопштени сите факти и детали за причините за случувањето на оваа тешка сообраќајна несреќа. Автобусот поминал директно на спротивната страна, ја поминува спротивната страна, влегува дури и на регионалниот пат, паѓа на регионалниот пат и паѓа и понатаму после регионалниот пат во делот на удолнината. Интервенциите беа брзи на сите институции, вклучително МВР и државните болници, но и сите приватни болници коишто промтно и безпоговорно веднаш ги испратија сите свои ресурси“, соопшти Заев како се случила несреќата.

Тој најави дека ќе ги посети повредените во болниците, а во наредните денови ќе се донесат и одлуки за поддршка на семејствата на починатите.

На деновите на жалост, знамето на Република Северна Македонија ќе биде истакнато на половина копје.


Заев: Нема зборови што можат да бидат утеха, ги мобилизираме сите сили и капацитети


Скопје, 13 февруари, 2019 - 21:56 (META) 

Неизмерна е болката и тагата и нема зборови што можат да бидат утеха за тешката сообраќајна несреќа која беше кобна за повеќемина наши сограѓани, напиша на „Фејсбук“ премиерот Зоран Заев по трагичната сообраќајна несреќа на патот Скопје-Тетово во која загинаа 13 лица.

„Сочувствуваме со најблиските за нивните загуби. Ги мобилизираме сите сили и капацитети да им помогнеме на сите останати со животозагрозувачки и други повреди колку што може побрзо да ја добијат неопходната помош и да им се вратат на своите најблиски”, напиша Заев кој се очекува вечерва да ги посети повредените.


Заев: Физибилити студија треба да даде одговор како правилно да се развива Попова Шапка


Скопје, 13 февруари, 2019 - 10:21 (META) 

Премиерот Зоран Заев на средбата со претставници на граѓанската иницијатива „Да ја спасиме Попова Шапка“, разговарале за правилно искористување на природниот ресурс Попова Шапка и биле изнесени конкретни предлози за надминување на досегашни недоследности и иницирање на активности за  негово одржливо и хумано управување, соопштуваат од Влада.

На средбата, покрај претставниците на Иницијативата, спортски работници, поранешни и активни скијачи и ентузијасти, предводени од Хамди Сулемани, присуствуваа и министерот за економија Крешник Бектеши, заменик-министерот за животна средина и просторно планирање Јани Макрадули и Џемаил Јусуфи, управител на  „ЕЛЕМ турс“, компанија-ќерка на „ЕЛЕМ“, која управува со туристичкиот центар Попова Шапка.

„Премиерот Заев и неговите соработници, одговарајќи на конкретни барања на претставниците на Граѓанската иницијатива во врска со одземање на управувањето на „ЕЛЕМ“ со скијачкиот центар, како и стопирање на донесувањето на Урбанистичкиот план за викенд населбата на Попова Шапка и подготовка за концесионирање на скијачко-рекреативниот центар, информираше дека веќе е во тек изработка на физибилити студија, која ќе даде одговор на прашањата како правилно да се искористат скијачките капацитети без да се наруши природната убавина на овој дел од Република Северна Македонија“, се вели во соопштението од Влада.


Заев и Ципрас ќе се сретнат на Минхенската безбедносна конференција


Минхен, 12 февруари, 2019 - 15:34 (META) 

Македонскиот премиер Зоран Заев и неговиот грчки колега Алексис Ципрас ќе имаат средба на маргините на Минхенската безбедносна конференција што ќе се одржува од 15 до 17 февруари, објави грчки Катимерини.

Заев и Ципрас, како признание за нивните напори за решавање на долгогодишниот спор, во Минхен ќе ја добијат престижната награда Ewald von Kleist, која се доделува како признание за мир и решавање на конфликти.

Претседателот на конференцијата, Волфганг Ишингер неодамна на неговиот официјален „Твитер“ профил, по ратификувањето на Договорот од Преспа во грчкиот парламент, напиша дека двајцата премиери ќе бидат поканети на 16 февруари во Минхен да ја примат престижната награда за време на 55-та конференција.

Портпаролот на Минхенската безбедносна конференција потврди дека и Заев и Ципрас ја прифатиле поканата.

На конференцијата во Германија, која традиционално се одржува во втората половина од февруари, најавено е присуството на Ангела Меркел, Мајк Пенс, Јенс Столтенберг и Федерика Могерини.


Кренато знамето на НАТО, Заев порача дека земјата ја зема судбината во свои раце


Скопје, 12 февруари, 2019 - 13:10 (META) 

На свечена церемонија пред зградата на Владата претпладнево беше кренато знамето на НАТО, како одбележување на историскиот настан за потпишувањето на Пристапниот протокол за членство на Македонија во НАТО минатата среда, со што почна последниот чекор кон полноправно членство на земјава во НАТО под името Северна Македонија.

Во присуство на речиси комплетниот владин кабинет, Генералштабот на АРМ, воени аташеа во Македонија, како и на поранешни премиери и функционери од јавните институции и дипломатскиот кор, церемонијата започна со интонирање на химната на Република Македонија, по што уследи предавање на знамето на НАТО од страна на Зоран Јанковиќ, шефот на Канцеларијата за врски на НАТО на премиерот Зоран Заев, кој потоа го предаде на командирот на единицата за почести на АРМ, по што уследи чинот на кревањето на знамето, додека се интонираше химната на НАТО.

Премиерот Зоран Заев потоа во говорот порача дека Македонија успеала „да спречи судбината да и биде иднина“ и ја зела судбината во свои раце и рече дека „Република Северна Македонија ќе стане рамноправен партнер на модерниот свет“ и никој повеќе нема да ја блокира.

– Денеска со сигурност кажуваме дека нашата татковина е на вистинскиот пат кон прогресот и кон непречен развој. Успеавме, од споредниот колосек на Балканот на кој чекавме со децении, се вративме на главниот автопат кон Европа. Во периодот што следува ќе бидеме директни учесници во најзначајниот период од осамостојувањето на државата и самите ќе одлучуваме за својата иднина. Иднината повеќе не ни е судбина, ние ја земавме судбината во своите раце. Никој веќе нема да не блокира за надвор. Ви честитам вам, на сите граѓани што храбро зачекоривте и ја побаравте иднината што нашиот народ ја залужува. Да им оддадеме придонес и на загинатите припадници на мировните мисии, на загинатиот претседател Борис Трајковски и на неговиот тим и на загинатите мировници во хеликоптерската несреќа што се враќаа од мисијата Алтеа од БиХ, кои дадоа придонес за остварување на долготрајната цел, да станеме дел од НАТО. Да се заблагодариме и на покојниот прв претседател Киро Глигоров, кој уште пред осамостојувањето се определи за воспоставување на мирна коегзистенција и на пораншниот претседател Бранко Црвенковски – рече Заев, изоставајќи го актуелниот претседател Ѓорге Иванов, кој не беше присутен на церемонијата.

Тој се заблагодари и на АРМ и на медијаторот за спорот за името, Метју Нимиц, како и на министрите за надворешни работи на Македонија и Грција, Никола Димитров и Никос Коѕиас, кои го создадоа Преспанскиот договор, а се заблагодари за „визионерството и непоколебливоста и на својот грчки колега Алексис Ципрас“, но и  на сите пратеници и од актуелнито и од сите претходни состави за чекорите што ги презеле за зачленувањето во НАТО и за определбата за ЕУ.

Премиерот, кој во втората половина на својот говор почна постојано да го употребува името Северна Македонија, потсети и на Народноослободителната војна и на двете заседанија на АСНОМ, со кои, како што рече е формирана државата што наскоро под името Северна Македонија ќе стои рамо до рамо со Европа и светот. Заев порача дека патот што стои пред Северна Македонија кон остварување на целта за зачленување во ЕУ ќе биде долг и тежок, и притоа ќе мора да се прават уште многу реформи, при што нема да има толеранција за лошо судство, корупција и злоупотреба на моќта.

– Северна Македонија нема да има друг избор освен други добри политички, културни економски односи, Балканот нема да има друг избор освен соработка и развој. Градењето пријателство останува наш врвен приоритет во надворешната политика, која секогаш произлегува од стабилност и добрите односиодноси во самата зема. Газиме цврсто, нема место за еуфорија, не чека многу работа, долги години и многу реформи за за да се посветиме на остварување на целта за зачленување во ЕУ. Нашата цел е судовите праведно да делат подеднакво правда за сите. Ќе има нула толеранција за корупцијата и личните интереси и привилегиите не смее да преовладуваат. Секој мора да ги следи правилата и тие со големи банкарски сметки и тие што имаат многу малку, да бидат еднакви, како и тие што не се со ниту една партија. Сите гласавме за иднината на нашите деца. Сите политичари да ја почитуваат определбата на нашите граѓаните. Друг подобар избор нема. Сите имаме пат, тоа е патот слободарски, тоа е патот кон Европа – рече Заев, на крајот порачувајќи „Да живее Европска, Република Северна Македонија!“.

На церемонијата не присуствуваше претседателот на државата и врховен командант на оружените сили Ѓорге Иванов. Според неговиот кабинет, не бил поканет, а според Владата, уредно била испратена покана. Отсуствуваа и високи претставници на МПЦ, која беше претставувана од пензионирани протоереи, за разлика од ИВЗ, која ја претставуваше нејзиниот поглавар Хаџи Ефенди Сулејман Реџепи.

Покрај гувернерката на НБРМ Анита Ангеловска – Бежоска, народниот правобранител Иџет Мемети и првите луѓе на Врховен суд и на Јавното обвинителство, амбасадорите и актуелни и поранешни пратеници, на денешната церемонија присуствуваа и поранешните премиери Љубчо Георгиевски, Хари Костов и Владо Бучковски, а отсуствуваше и поранешниот премиер и претседател на државата Бранко Црвенковски. Не беа присутни ниту Али Ахмети, претседателот на ДУИ, главниот коалициски партнер во власта, но и претседателот на ВМРО-ДПМНЕ, Христијан Мицкоски.


Претставници на иницијативата „Да ја спасиме Попова Шапка“, денеска на средба со Заев


Скопје, 12 февруари, 2019 - 12:37 (META) 

Претставници на граѓанската иницијатива „Да ја спасиме Попова Шапка“, денеска ќе се сретнат со премиерот Зоран Заев, информираат од таму.

Тие ќе одржат тркалезна маса за иднината на овој туристички центар, а средбата која е предвидена да трае еден час, ќе започне во 17 часот. Потоа, граѓанската иницијатива „Да ја спасиме Попова Шапка“ ќе одржи прес-конференција пред зградата на Владата.

Едно од нивните барања е Владата да формира Комисија за надзор на одвивање на работите на Попова Шапка со вклучување на претставници од граѓанскиот сектор, експертите за зимските спортови и стручен кадар кој е запознат со проблематиката.

„Да се посвети итно внимание за да се надминат проблемите и кризата која се повторува секоја година на Попова Шапка и тоа чистење на паркингот од снег, редовно функционирање на ски-лифтовите, да се гарантира ред и мир, да се обезбеди 24-часа функционирање на амбулантата  на Попова Шапка. Бараме повеќе посветеност од Агенцијата за развој на туризам, Агенција за млади и спорт и од Скијачката федерација за да вршат повеќе притисок до надлежните институции за неуспешностите на нормалното функционирање на Попова Шапка“, бараат од граѓанската иницијатива.


Навредливите книги за Албанците не можат да се коригираат, ќе потикнеле „етнички тензии“


Скопје, 11 февруари, 2019 - 15:36 (META) 

Сé уште не е познато кога ќе се коригира делот со навреди кон Албанците во книгите по историја и географија, за втора година средно образование. Со користењето на овие книги, „Порталб.мк“ напиша, дека се прекршува Законот за основно и средно образование.

Но, според министерот за образование и наука, Арбер Адеми сега не е време да се направи корекција.

„Јас велам дека сега не е време, ниту постои атмосфера за да поттикнеме етнички тензии. Тоа се стари теми, и тоа стари рани од порано, од пред неколку години“, рече министерот Адеми за „Порталб.мк“.

Тој не дава гаранции дека ова ќе биде направено за време на ревидирањето на книгите во Мешовитата комисија Македонија – Грција – Бугарија, процес кој што веќе е во тек.

„Треба да се завршат некои процеси со нашите соседи, кога ќе имаме конечни резултати таму, и овде ќе го разгледаме ова прашање, а потоа ќе се донесе најсоодветното решение. Не можеме да го предвидиме исходот. Кога ќе имаме конечни резултати со нашите соседи, тогаш ќе видиме како ќе дејствуваме“, рече Адеми.

Инаку, спорната содржина на овие книги беше истакната во рамките на Форумот на балканските граѓански организации „Градење мостови помеѓу земјите од Западен Балкан“ што се одржа во октомври 2018 година.

По форумот „Порталб.мк“ го праша премиерот Зоран Заев, дали ќе побара од министерот за образование и наука да ги повлече книгите.

„Не ги знам деталите. Ќе разговарам со Адеми. Подетално ќе ви одговорам, дали е така како што велите, и доколку е така, ќе ви кажам кога ќе бидат повлечени, како ќе се повлечат и слично“, рече Заев во октомври 2018 година.

Тој посочи дека во буџетот за 2019 година се предвидени средства за коригирање на некои од школските учебници. Меѓутоа, меѓу нив не се навредливите учебници, туку учебници по предметот музика.

Учебниците по предметите географија и историја, препечатени во 2009 година, имаат политичка позадина, навредлива содржина и ја искривуваат историјата на државата и на етничките групи кои живеат во Македонија. Беше побарано да се изработи нова наставна програма, но дотогаш книгите треба да се отстранат од употреба. Книгата „Географија на Република Македонија“, за втора година средно образование, има седум контроверзни моменти од историјата на Македонија.

На страна број 99 се вели дека „Албанците биле Македонци, но во времето на османлиското владеење станале Албанци. Албанците од Македонија се потомци на Черкези, Роми и Турци“. Во многу делови од книгата, вклучувајќи ја и страна број 104, се вели дека „Албанците во Македонија се дојдени во различни временски периоди, почнувајќи од 1780 година“.

На страна 104 има заеднички точки со „Сердарот“ на Глигор Прличев, каде се вели дека „Албанците се доселиле во Македонија, малтретирајќи ги физички, крадејќи, киднапирајќи и убивајќи локални Македонци“. Пишува дека за ова на Албанците им помагала турската влада. На страна 103 „Албанија се претставува како окупатор на Западна Македонија“.

Грешки има и за потеклото на малцинствата, бидејќи таму се ставаат сите како дојденци, создавајќи впечаток дека во Македонија нема автохтони народи. Според Законот за учебници за основно и средно образование, член 14 наведува дека ако грешките се над 30 проценти, се подготвува нова наставна програма.Повлекување на учебникот побара и групата ученици на средното училиште „Зеф Љуш Марку“ во рамки на Унијата на ученици Албанци, но и покрај ветувањето на членовите Албанци во Министерството за образование и наука, книгата сè уште е во рацете на учениците.


Пред Владата утре свечено подигање на знамето на НАТО


Скопје, 11 февруари, 2019 - 15:14 (META) 

Со свечена церемонија, утре на платото пред Владата ќе биде подигнато знамето на НАТО. Владината зграда, пак, каде што утрово беше отстранет натписот „Влада на Република Македонија“, наскоро ќе добие натпис со новото уставно име.

„Во вторник  со почеток во 11 часот пред платото на Владата ќе се одржи свечена церемонија по повод подигнување на знамето на НАТО пред Владата на Република Македонија која наскоро ќе го носи името Република Северна Македонија“, соопшти владиниот Сектор за односи со јавноста.

На свеченоста ќе се обрати претседателот на Владата Зоран Заев.

Инаку, денеска на платото пред Владата се правеа подготовки и проба за утрешната церемонија.

Знамето на НАТО веќе повеќе од една деценија се вее пред Министерството за одбрана.

Откако Грција минатиот петок прва го ратификуваше пристапниот протокол за членство на земјава во НАТО, денеска протоколот бил едногласно одобрен од соодветната парламентарна комисија на парламентот на Албанија, кој в четврток на пленарна седница ќе гласа за усвојување на протоколот.

Парламентот на Словенија, пак, утре на вонредна седница ќе го ратификува протоколот.


Заев: Можен е консензуален кандидат за претседател, имаме дилема за предвремени избори


Скопје, 8 февруари, 2019 - 13:07 (META) 

СДСМ се уште го нема дефинирано својот став дали да оди на предвремени избори, оти дилемата е дали да се оди на нов мандат или да се фокусираат на евроинтеграциите и добивањето датум за пристапни преговори со ЕУ, изјави денеска премиерот Зоран Заев по посетата на Клиниката за неврологија заедно со министерот за здравство Венко Филипче.

– Дилемата за тоа дали да се распишат предвремени парламентарни избори е помеѓу две опции – дали да се определиме за еден цел нов мандат што е привлечно за политичарите, за да можеме да испорачаме економски ефекти, ефекти на реформи и подобрување на севкупниот живот или да превагне интересот на државата наспроти партиите, а тоа е да не дадеме никаков изговор на земјите членки кои дел од нив генерално се против проширувањето, а Македонија чека позитивна одлука на самитот на ЕУ во јуни, каде верувам дека Евроспаката комисија која е на крајот на својот мандат сака да остави свое наследство -рече Заев како одговор на новинарско прашање.

Тој додаде дека овие денови разговараат и со коалициските партнери, со политички партии кои се надвор од коалицијата, партии кои не се парламентарни, консултираат, како што вели, многу значајни здруженија на граѓани, прават анкети и анализи и во однос на изнаоѓање најдобриот кандидат за претседателските избори.

– Јас сакам да ја потенцирам потребата од свесност на нашето општество изразена преку политичките партии и да ги повикам сите да направиме една заедничка, одговорна анализа и да пронајдеме личност или личности зад кои би можеле да застанеме ние како политичари, нашите политички партии заради тоа што граѓаните застануваат зад нив. Ако најдеме такви личности тоа би бил вистински консензуален кандидат кој ќе ги имплементира политиките на ова модерно живеење, на 21. век со прогресот и просперитетот кој Македонија го има и дополнително го очекува, тогаш вредно е да направиме напори да дадеме шанса да изнајдеме таква личност – рече Заев.

Во врска со изјавата на ДУИ дека нема да поддржат кандидат за претседател произлезен од Конгресот на СДСМ, Заев рече дека кандидатот заедно ќе го бараат по пат на заедничка анализа.

– Заедно ќе го бараме. Не мораме да чекаме Конгрес некоја партија да дефинира, затоа што ако која било партија дефинира тогаш ги приклонува другите партии да следат. Тоа не е консензуално барање. Консензуално е ако ангажираме од нашите партии и платиме експерти, да ни направат добри анализи и да изнајдеме кандидати така растеретени. Не зборувам за пратеник, за премиер, за министер, за директор, зборуваме за претседател на државата тука е и одговорноста на сите нас како политичари – рече Заев, додадавјќи дека тоа можат да бидат и граѓани од која било етничка припадност и кој било сфера од општественото живеење.