Заев и Ципрас и официјално номинирани за Нобелова награда за мир


Скопје, 18 декември, 2018 - 13:47 (META) 

Премиерите Зоран Заев и Алексис Ципрас се номинирани за Нобелова награда за мир за 2019 година за Договорот од Преспа, со кој се надминува дводеценискиот спор за името.

Номинацијата на Заев и Ципрас денеска во Скопје ја објави добитничката на Нобеловата награда за мир во 2015 година, Уидед Бушамауи на церемонијата што се одржа на Универзитетот ФОН .

Бушамауи рече дека Договорот од Преспа покажува дека две држави заедно се способни да седнат, да преговараат и да постигнат договор.

– Номинацијата не е само лично за Зоран Заев и за Алексис Ципрас, туку и за сите граѓани. Ова е модел за дијалог и просперитет. Силно верувам дека Македонија или треба да кажам Северна Македонија и Грција ќе ја добијат Нобеловата награда и ќе бидат доказ за светот дека се може да се постигне со договор. Откако ќе биде ратификуван Договорот ќе биде силна порака дека дијалогот е можен – рече Бушамауи.

На церемонијата присуствуваше и европратеникот Стелиос Колуглу од редовите на грчката партија Сириза, кој дава поддршка за номинацијата на Заев и Ципрас за Нобелова награда за мир.

Кулуглу кажа дека ако имаше Нобелова награда за војна, досега на Балканот ќе беше доделена повеќепати, а Договорот од Преспа е единственото добро и позитивно нешто што моментално доаѓа од Европа, која е поделена и соочена со бројни проблеми.

– Договорот од Преспа е договор што го решава долгогодишниот проблем, не само за името, туку и обезбедува дефинитивно решение на македонското прашање. Зоран Заев и Алексис Ципрас постигнаа договор за кој што требаше храброст и кој ги стави националните интереси над партиските. Договорот го должиме на претходните генерации, но и на нашите деца и следните генерации кои мора да живеат во мир и просперитет – рече Кулуглу.

Тој посочи дека Договорот имал голем број противници од двете страни, но дека е нелогично, тоа што и двајцата премиери истоврмено се соочуваат со обвиненија од своите противници дека ги предале националните интереси.

По церемонијата во Скопје, Бушамауи и Кулоглу на 19 декември, заминуваат во Атина, каде што ќе се сретнат и со грчкиот премиер Алексис Ципрас, за официјално да му ја соопштат номинацијата.


Заев апелира до општините да ги искористат парите наменети за капитални инвестиции


Скопје, 14 декември, 2018 - 16:40 (META) 

Во 2019 година за рамномерен регионален развој издвоивме за 100 отсто повеќе пари во однос на 2017, или за над 50 насто повеќе во однос на 2018 година, рече денеска премиерот Зоран Заев на конференцијата „Децентрализација: Патот што претстои“, во организација на ЗЕЛС и ОБСЕ.

„Од 3,5 милиони евра во 2017 та година, за наредната година за проекти за рамномерен регионален развој во планските региони и во општините, се обезбедени седум милиони евра. Наша цел е овие средства континуирано да се зголемуваат се до целосната трансформација и целосното насочување за реализација на Законот за рамномерен регионален развој по кој треба да се обезбедат законските еден процент од БДП  со зафаќање од капиталните инвестиции кои што би се распределувале според степенот на развиеност во сите плански региони“, изјави Заев.

Тој додаде дека се работи и на тоа да се обезбедат 70 милиони евра од Светска банка за изградба и реконструкција на локални патишта и 50 милиони евра од Европската инвестициона банка за изградба и реконструкција на водоводи и канализации.

„Станува збор за кредитни линии кои ќе станат оперативни уште почетокот на 2019. Во овој процес е важно општините да имаат изработено квалитетни и ревидирани проекти кои ќе ги доставуваат до Министерството за транспорт и врски за да можат да повлекуваат повеќе пари од кредитните линии и да започнат со реализација на проектите. Токму преку овие најсериозни капитални инвестиции во локални патишта, водоводи и канализации, градинките и училиштата имаме намера паралелно со еднократната финансиската помош да ги стабилизираме општините, за да може државата да смета на овој сериозен капацитет кој што за жал во Македонија се уште не е соодветно, ниту пак доволно искористен“, додаде Заев.

Во тек е проект на изградба на канализациони и водоводни мрежи од ЕИБ во висина од 50 милиони евра, од кои остануваат уште помеѓу 10 и 12 милиони евра за реализација.

„Апелирам до општините да ги искористите овие пари. Кредитите не ги враќате вие, Владата, односно државата ќе ги враќа овие кредити и треба да се искористат овие квалитетни средства. Во 2019 година ќе станат оперативни и средствата од „ТАВ Македонија“, тоа се повеќе од 35 милиони евра. Завршуваме со анексот на договорот со „ТАВ Макеодонија“, ќе ги помине сите правни процедури, очекувањата се дека до 15-ти јануари за да може алокацијата на тие 35 милиони евра на транспарентен начин да бидат распределени за тригодишни проекти на сите општини пак за вододовди, канализации, детски градинки, за училишта и за некој од сортските сали во училиштата“, додаде Заев.


Заев за прогласувањето Војска на Косово: Не се потребни нови тензии


Скопје, 14 декември, 2018 - 15:21 (META) 

Македонскиот премиер Зоран Заев денеска, по изгласувањето на трите закони во парламентот на Косово со кој се прави трансформација на Косовските безбедносни сили во Војска на Косово, порача дека во овој момент на регионот не му се потребни нови тензии.

-Јас знам дека и ставот на НАТО е тој: Не е време! Не ни требаат нови тензии. Уште еднаш, да не забораваме дека Балканот нема намера повторно да биде буре барут – рече Заев.

Апелираше до своите колеги – премиери, но и до претседателите на земјите од Западен Балкан, да внимаваат на своите чекори.

– Да ја унапредиме економската соработка, да постигнеме траен мир, раст, развој и членство во ЕУ – порача Заев по националната конференција за децентрализација.

Инаку, владата на Косово им го честиташе на своите граѓани формирањето на војската на Косово, воедно порачувајќи му на НАТО дека од денеска таа организација се стекнала со еден верен и посветен сојузник.

Соопштението од кабинетот на премиерот Рамуш Харадинај уследи по денешното изгласување на законите со кои Косово доби војска, како и по реакцијата на генералниот секретар на НАТО Јенс Столтенберг, кој изрази жалење што косовската војската се формира „и покрај загриженоста“ на Алијансата поради „избрзаната одлука“ на Приштина.

Според Владата на Косово, право на оваа држава е да има војска, „една мултиетничка и професионална сила изградена според стандардите на НАТО“.

„Владата на Косово цени дека правото на Косово за војска, за една мултиетничка и професионална сила изградена според стандардите на НАТО, извира од жртвите и слободата, од правото на државата, од суверенот, граѓанската волја за да се брани и да ги промовира прозападните вредности во Косово и пошироко. Косово е НАТО и НАТО е Косово. Во тоа никој да не се сомнева“, се вели во владиното соопштение.

Владата на Харадинај гарантира дека косовската војска, „заедно со сојузниците од НАТО, ќе биде единствено во служба на демократијата, безбедноста, мирот и развојот на Косово, регионот и каде и да е потребно“.


Заев до Каракачанов: Мое право е да бидам Македонец и да зборувам македонски јазик


Штип, 10 декември, 2018 - 17:34 (META) 

Дека јас сум Македонец, дека јас зборувам македонски јазик, тоа е мое право, тоа е европска вредност, одговори премиерот Зоран Заев по острите напади во колумната и телевизиските настапи викендов и денеска од Красимир Каракачанов, актуелен вицепремиер и министер за одбрана на Бугарија и претседател на националистичката ВМРО-БНД, но и на пораките од Екатерина Захариева, бугарската министерка за надворешни работи.

Заев на денешната јавна расправа во Штип за уставните измени, порача дека ќе продолжи и понатаму да гради пријателство со Бугарија.

– Јас очекувам навистина европските вредности да бидат прифатени од сите, како што исто така подадов рака и прифатив дека споедлуваме заедничка историја. Ќе продолжам да зборувам во духот на пријателството и ќе продолжам да градам пријателство, без разлика на какви причини некој темели свои изјави или слично. Јас верувам дека и господинот Каракачанов и министерката Захариева и премиерот Борисов, но пред се бугарскиот народ е пријателски народ на нашиот народ – рече Заев.

На неговата изјава се надоврза професорот Ѓорѓи Спасов, кој рече дека изјавата на Каракачанов е реакција на стравот дека со влезот на Македонија во ЕУ, може да остане без парите од продажбата на бугарските пасоши.

И лидерот на опозицијата, Христијан Мицкоски, го искритикува нападот од Каракачанов.

– И во Македонија и во Бугарија сè уште постојат сили кои не им мислат добро на односите помеѓу соседите, рече претседателот на ВМРО-ДПМНЕ.

Мицкоски даде идентична оценка со таа на Спасов за мотивите на Каракачанов.

– Постои основано сомнение за поткуп за издавање на бугарски пасоши, во неговата земја. Па така овој квази патриотски набој и крик на господинот Каракачанов е во функција на таа политика – рече лидерот на ВМРО-ДПМНЕ.

Во меѓувреме, во Бугарија беше објавено новинарско истражување кое покажува дека и Каракачанов како министер за одбрана ја продолжил практиката на неговите двајца претходници да набавува храна за војската без расчистена постапка за јавна набавка. За тоа во изминатите три години се потрошени околу 31 милиони лева (повеќе од 15 милиони евра).


Заев не ја губи надежта дека Груевски ќе биде испорачан


Штип, 10 декември, 2018 - 14:30 (META) 

„Не знам во кој свет одредени луѓе се’ уште живеат, а така ќе го прашам и претседателот Иванов. Каде во светот извршната власт апси, власта извршна истражува, власта извршна прави обвинителни акти…?! Тоа е работа на обвинителството и судството – праша премиерот Зоран Заев на прашањето да ја искоментира констатацијата на претседателот Ѓорѓе Иванов дека „ништо чудно и да биде уапсен“, со оглед на тоа како се однесува власта во последно време.

По завршувањето на јавната дебата за уставните измени во Штип, Заев ги коментираше изјавите од соседството врзани за јазикот, атмосферата во Грција, како и коментарите на Иванов.

По искажаниот скептицизам на еврокомесарот Јоханес Хан, дека Никола Груевски може да биде испорачан на Македонија, премиерот кажа дека не ја губи надежта.

– Јас продолжувам да правам напори како претседател на Владата заедно со институциите, да настојуваме негово испорачување, затоа што тоа е минимум што може да очекуваме од пријателска земја, како што е Унгарија, земја членка на ЕУ – кажа Заев.

Во текот на дебата премиерот Заев беше прашан од присутните граѓани да го каже ставот за изјавите на двајцата министри во бугарската влада, Красимир Каракачанов и Екатерина Захариева.

Заев смета дека треба да се продолжи градењето доверба со соседот.

Професорот Ѓорѓи Спасов вели дека ова е реакција на Каракачанов, кој се плаши дека со влезот на Македонија во ЕУ, може да остане без парите од продажбата на бугарските пасоши.


Додека се гради нов антикорупциски систем, Македонија „се снаоѓа“


Скопје, 9 декември, 2018 - 20:41 (META) 

МВР, кое треба да гони корупција, е разорена институција и и треба реформа, тврди Павле Трајанов, поранешен министер за внатрешни работи. Антикорупциската комисија, со години обвинувана за партизираност, и формално не функционира од крајот на март.

По две кривични пријави за примање и за давање поткуп бил резултатот на Македонија во борбата против корупцијата минатата година, покажуваат податоците на МВР. Тоа е најслаб резултат на полицијата во гонење на тоа кривично дело, а лани бил најслаб резултатот и во откривање на другите кривични дела од областа на организираниот криминал – трипати помалку од 2010 и три и пол пати помалку од 2015 година.

– Во Македонија многу повеќе криминал открија истражувачките новинари и истрагите на СЈО, отколку државните органи задолжени за тоа, пред се МВР,  институција која треба да се бори против корупцијата и криминалот. МВР е разорена институција. Таа е комплетно надвор од системот за борба против корупцијата – смета Павле Трајанов, претседател на Демократскиот сојуз, поранешен министер за внатрешни работи и долгогодишен оперативец во МВР.

Минатата година полицијата открила и помалку кривични дела „злоупотреба на службената положба“, „даночно затајување“ и „фалсификување исправа“.

Трајанов смета дека на МВР му е потребна темелна реформа.

– Не можат само да се правдаат дека чекаат наредба од јавен обвинител. Во МВР има неколку илјади луѓе со многу високи плати и треба да се изборат со корупцијата. Се истражува, се пишуваат колумни, но додека отсуствува ефикасна борба против корупцијата од надлежната институција, тешко дека може да се постигне позначаен резултат – смета Трајанов.

Состојбата наскоро ќе се смени, убедена е власта, пред се со новиот закон за спречување корупција, кој е во собраниска процедура.

– Наскоро целиот институционален и законски систем за превенција и борба против корупција ќе биде во функција, а во меѓувреме го правиме тоа што можеме – рече премиерот Зоран Заев на отворањето на конференцијата „За општество ослободено од корупцијата“.

Заев нагласи дека еден од приоритетите на Владата е транспарентното водење на политиките, правилното функционирање на судскиот систем, ефикасна борба против корупцијата, но и почитувањето на човековите права.

– Веќе се разгледуваат резултатите од имплементацијата на нашиот концепт за отворена и транспарентна Влада. Според индексот на отвореност Владата како централно-извршно тело е на прво место во регионот со 76 отсто исполнување на индикаторите – рече Заев и додаде дека ова го потврдило истражувањето за отвортеност на институциите за извршаната власт во ЈИЕ и во Македонија.

Ефикасноста на полицијата и работата на Државната комисија за спречување корупција, меѓу другите фактори, се одразуваат и на Индексот за перцепција на корупција, што од 1995 година го објавува „Транспаренси интернешнел“, според кој Македонија минатата година, со индекс 35 била најслабо рангирана од 2010 година. Македонија лани се пласирала во ранг на Виетнам и Етиопија.

data-viz-korupcija-MK1

Индексот рангира 180 земји и територии според забележаното ниво на корупција во јавниот сектор. На скалата индексот 0 е многу корумпирана, а 100 е земја чиста од корупција. Минатата година две третини од земјите имале индекс понизок од 50. Највисоко котирале Нов Зеланд и Данска со индекс 89 и 88, и регионот на Западна Европа. Најлоши региони биле Подсахарска Африка и Источна Европа (просечен индекс 34).


Грција ќе бара од ООН дополнителен анекс на Преспанскиот договор за македонскиот јазик


Атина, 6 декември, 2018 - 12:00 (META) 

По големата бура што во Грција ја предизвикаа изјавите во Собранието на премиерот Зоран Заев за учењето на македонскиот јазик во Грција, за неговата употреба, за „Егејска Македонија“, според грчките медиуми, Атина ќе ја префрли битката на меѓународно тло.

Како што пишува атинска „Ифимерида“  сега кога веќе владата во Атина станала свесна дека терминот „македонски јазик“ останува во употреба кај северниот сосед, се обидува да најде начин како да одговори и да ги „минимизира штетите“, наводно со дополнителен протокол кој би се усвоил во ООН.

Како што објаснува весникот „Естиа“, грчкиот премиер Алексис Ципрас ќе побара ООН да одобри дополнителен протокол кој ќе го допрецизира Преспанскиот договор во смисла дека ќе дава многу ограничен простор за наведувањата на јазикот и нацијата.

Според весникот, протоколот ќе биде амандман на Договорот од Преспа, односно ќе стане негов интегрален дел.

Според пишувањата на грчките весници, за подготовката на овој амандман бил ангажиран Евангелос Калпадакис, советник на грчкиот премиер.

Грчкиот претседател Прокопис Павлопулос веќе побара од Генералниот секретар на НАТО да се спротивстави на интерпретациите на Преспанскиот договор во Македонија за да се оневозможи признавање „македонски народ“ и да се потенцира дека јазикот во грчката северна сосетка е словенски.

Според медиумите, Грција ги информирала и САД дека Преспанскиот договор нема да биде ратификуван во грчкиот парламент без такви гаранции.


Заев: Со Спасовски разговаравме за оставка како морален чин, ама не гледам таков пропуст


Скопје, 5 декември, 2018 - 15:13 (META) 

Убеден дека ако Груевски реши да „удира“, или како што тој знаеше да користи фраза „забивање нож во грбот на Македонија“, тој може да ја рани Македонија, но безбедноста не може да ја загрози, вели премиерот Зоран Заев во интервју за „Дојче Веле“.

– Мислам дека нема да има безбедносни импликации. Македонија не зависи од ниеден поединец, ниту пак има поединец којшто има толкав вид на информации што му стојат на располагање, за да предизвика некои безбедносни ризици за државата. Секако дека може да биде ранета Македонија на некој начин, затоа што се работи за човек кој десет години бил премиер. Сѐ она што е доверливо, државна тајна, службена тајна, останало во најголем дел кај него – вели Заев.

Во однос на истрагата за бегството на поранешниот премиер, Заев вели дека има сознанија за дел од истрагата но дека ќе почека да заврши работата на институциите пред да дава дополнителни коментари.

На прашањето зошто никој не понудил оставка како морален чин, Заев вели дека министерот за внатрешни работи Оливер Спасовски, разговарал за тоа со него.

– Како колега во Владата и мој долгогодишен соработник, секогаш сме разговарале што со моралниот чин во вакви околности. Бидејќи, ако има морална одговорност, треба да има аргументација за тоа, да се објасни, да се лоцира каде е моралниот хазард, проблем, пропуст… Јас не гледам таков пропуст. Но, ако се покаже дека имало одговорност – јас ќе барам таа да биде конкретно понесена – вели Заев.

Премиерот вели дека процесот за уставни измени и двотретинското мнозинство нема да бие заложник на работите што се во надлежност на судството

– Попусто ќе биде, ако ние го заокружиме процесот на уставни измени, а ја уништиме правната држава. Тогаш ќе добиеме негативна оценка од земји членки на ЕУ, кои будно ги следат процесите кај нас – потенцира Заев.


Заев ги информирал европратениците за процесот за уставни измени


Скопје, 5 декември, 2018 - 12:41 (META) 

Премиерот Зоран Заев, денеска се сретнал со пратениците од Европскиот парламент, Дејвид Мекалистер и Кнут Флекенштајн.

Заев ги соопштил очекувањата околу гласањето на уставните амандмани, согласно Договорот од Преспа, во Парламентот, како и реформите што се прават во безбедносните служби, правосудството, јавната администрација, очекувањата за реализацијата на реформите за борбата против криминалот и корупцијата, како и во медиумската сфера.

-Очекуваме во втора половина на јануари да се изгласаат уставните измени. Низ инклузивност, преку амандманите, и опозицијата се вгради во овој процес, а од денеска се отвора и јавната дебата, по што Владата ќе го достави финалните решенија до Парламентот. Нашите очекувања се дека уставните амандмани ќе добијат широка политичка поддршка во Собранието, со што ќе се овозможи реализација на Договорот од Преспа. Паралелно работиме на реализацијата на реформите во клучните области, што очекуваме да ги заокружиме до март. Поканата за НАТО и можноста за почеток на преговорите со ЕУ е висока мотивација за институциите во реформскиот процес, којшто е потребен за ЕУ, но и за квалитетот на живот на граѓаните на Македонија“, изјавил Заев на средбата на која се разговарало и за други актуелни политички прашања во Македонија и во регионот.


„Пакт против Србија“ нема, ама за српско „Ало“ има па има!


Скопје, 4 декември, 2018 - 17:22 (META) 

Српскиот таблоид „Ало“, најавувајќи го почетокот на самитот на Централноевропската иницијатива во Загреб пишуваше дека на самитот во Загреб ќе се разговарало и за формирање на пактот, кој стана главна тема во балканските медиуми, по изјавите на косовскиот вицепремиер Енвер Хоџај за хрватскиот весник „Вечерњи лист“. Ова е само ден откако македонскиот премиер Зоран Заев, повикан од пратеникот Иван Стојиљковиќ, категорично демантираше дека имало какви било разговори во кои тој бил вклучен, за пакт на Македонија, Црна Гора, Хрватска и Косово за Србија,

Во текстот на „Ало“ со наслов „НИ ПОДГОТВУВААТ ЗЛО Еди Рама стигнува во Загреб и потпишува ДОКУМЕНТ што се заканува да ја уништи Србија“, таблоидот, повикувајќи се на хрватскиот весник „Јутарњи лист“, се вели дека според шпекулациите, на маргините на самитот една од темите на средбите на премиерите на Хрватска и Македонија, Андреј Пленковиќ ќе биде создавање на пакт против Србија.

Темата ја покрена Енвер Хоџај преку хрватскиот весник „Вечерњи лист“. Но тој завчера за црногорската телевизија „Антена М“ демантираше дека воопшто споменал формирање пакт против Србија.

– Никогаш ништо не сум рекол за создавање регионален пакт против Србија – изјави Хоџај за телевизијата.

Тој сепак наведе дека стои зад се друго што рекол за „Вечерњи лист“, како мешањето на Србија во потткопувањето на државноста на Косово и во внатрешните прашања на Црна Гора и Македонија.

Македонскиот премиер Зоран Заев на прес-конференцијата во неделата запрашан за став околу прашањето кое го отвори косовскиот вицепремиер Енвер Хоџај, дека во Македонија, Хрватска, Косово и Црна Гора се разговарало за пакт против Србија, одговори дека тој се оградува од какви било разговори, бидејќи тие не постоеле.

– Сакам да се оградам од било какви разговори, не постоеле. Никој од нас не побарал вакво нешто ниту пак било разговарано за ова прашање. Само апелирам и до Косово и до Србија да градат пријателство низ дијалог – изјави Заев.

Но и покрај тие деманти од неделата, на кои се придружи и црногорското министерство за надворешни работи, српскиот таблоид „Ало“ вчера во својот краток текст повторно го наведе договарањето, па и потпишувањето на некаков пакт, и покрај тоа што главните личности реагираат дека не се зборувало за такво нешто.

Текстот на „Јутарњи лист“ на кој „Ало“ се повикува, инаку, не е од тој весник, туку е пренесен од хрватската новинска агенција „Хина“, како што прописно е наведено во „Јутарњи“.