Трајчевски: Медиумите да не заземаат страни за време на референдумот


Скопје, 31 јули, 2018 - 14:02 (META) 

Директорот на Агенцијата за аудио и аудиовизуелни медиумски услуги, Зоран Трајчевски на денешната прес-конференција повика медиумите за време на референдумот да известуваат професионално, да не заземаат страни при известувањето како и да не се води пропаганда дека се урива Уставот на РМ.

– Очекуваме непристрасно и ненаметливо известување. Медиумите да не го наметнуваат своето мислење во информативните изданија. Радиодифузерите треба да го покриваат референдумот во согласност со одредбите и принципите утврдени со Законот за аудио и аудиовизуелни медиумски услуги како и Законот за референдум – рече Трајчевски.

Тој исто така истакна дека доколку медиумите објавуваат научни испитувања на јавното мислење односно анкети, јасно треба да биде напишан нарачателот на истата. Анкетите можат да бидат пуштени во етерот најдоцна 5 дена пред референдумот. Тој исто така истакна дека доколку медиумите објавуваат научни испитувања на јавното мислење односно анкети, јасно треба да биде напишан нарачателот на истата. Анкетите можат да бидат пуштени во етерот најдоцна 5 дена пред референдумот.


ААВМУ мора да се трансформира во вистински независен регулатор


Скопје, 22 февруари, 2018 - 15:20 (META) 

Агенцијата за аудио и аудиовизуелни медиумски услуги (ААВМУ) мора да стане вистинско независно регулаторно тело за медиумите, со право да носи политики, и без какво било мешање на Собранието на Република Македонија и Владата, порача Дејан Георгиевски, извршен директор на Центарот за развој на медиуми на денешната презентација на петтиот мониторинг извештај за работата на ААВМУ и Агенцијата за електронски комуникации (АЕК).

Извештајот е заеднички проект на Евротинк – Центар за европски стратегии, НВО Инфоцентар, Транспарентност Македонија и Хелсиншкиот комитет за човекови права.

– Владата го усвои предлог-законот за медиуми и започната е трансформацијата на регулаторното тело од претставничко до мало професионално експертско тело, но таа трансформација е далеку од завршена. Потреба е да се добие вистинско независно регулаторно тело. Агенцијата, со своите ограничени надлежности, не е тоа во моментот. Таа не е носител на политики во моментот. Треба да се отстрани можноста за парламентот и владата директно да влијаат на прашања како распределба на дозволи и фрекфенции – рече Георгиевски.

Според Билана Бејкова од НВО Инфоцентар, која ги претстави резултатите од кварталниот мониторинг на ААВМУ за периодот октомври-декември, не е реализирана подготовката на петгодишната стратегија и наместо тоа била ставена како приоритет за првата половина на 2018. Генерално, рече Бејкова, ААВМУ го продолжила трендот на проактивен однос кон темите од јавен интерес и обезбедила солидно ниво на транспарентност и отчетност.

Зоран Трајчевски, директорот на ААВМУ, во дебатата по презентацијата ја стави под знак прашање експертизата на составувачите на извештајот. Наспроти критиките што беа кажани тој го прочита и заклучокот на ОБСЕ/ОДИХР дека во врска со изборите ААВМУ професионално ги извршила своите преземени обврски.

За Горан Лазаров, од Евротинк, кој е координатор на мониторингот за АЕК останува отворено прашањето за „донацијата“ на АЕК на ЈСП за Панорамското тркало. Евротинк трипати барале отчет од ЈСП Скопје, но не добиле конкретен одговор освен дека ЈСП ги чува финансиските средства на посебна банкарска сметка и дека истите не се целосно потрошени, како и дека ќе се искористат исклучиво за таа намена.

Најголема ставка во буџетот е за изградба на радиодифузната кула на Водно, а втора најголема се плати за вработените кај која не забележано значителна промена.

Петиот извештај е изработен од четирите организации во рамките на проектот „Мониторинг на ефикасноста, ефективноста, транспарентноста и одговорноста на регулаторните тела за медиумите – PROformance Watch“.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Трајчевски: Порталите нема потреба да се регулираат, туку само да се регистрираат


Скопје, 22 декември, 2017 - 16:15 (META) 

Невозможно е регулирање на интернет порталите, порача Зоран Трајчевски, директорот на Агенцијата за аудио и аудиовизуелни медиумски услуги (ААВМУ) на денешниот јавен состанок на кој ги презентираше активностите за четвртото тромесечје со фокус на медиумскиот мониторинг за локалните избори.

– Не станува збор за регулирање, туку најмногу за регистрирање и нотификација. Сметаме дека е невозможно да се спроведе регулирање на овој вид медиуми. Ние како Агенција имаме нарачано истражување во однос на овие нови медиуми за тоа каква е состојбата споредено со другите држави. Требаше да го плати Агенцијата преку јавна набавка меѓутоа добивме одобрение од Советот на Европа и тие ќе го спроведат во еден краток разумен период, можеби до крајот на првото тромесечје од идната година и тогаш ќе имаме објективно, непристрасно мислење од експерти коишто ќе ни понудат не решение, туку ќе ни дадат слика каква е состојбата на ова поле во другите држави – рече Трајчевски на четвртиот и последен јавен состанок за 2017 година на Aгенцијата.

Toј потсети дека и досега наведувале дека ААВМУ не може да спроведе изборен мониторинг на известувањето што го вршат порталите.

Темата за интернет порталите се актуелизираше вчера на дебатата „Утврдување на потребата за можни измени во Законот за медиуми“, која ја организираа Министерството за информатичко општество и администрација (МИОА) и министерот без ресор, задолжен за комуникации, отчетност и транспарентност, Роберт Поповски.
foom-logo-disklejmer

Текстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Советот на ААВМУ едногласно го отфрли барањето да се одземе лиценцата на ТВ „24 Вести“


Скопје, 5 декември, 2017 - 15:40 (META) 

Едногласно, иако претходно имаше одредени дилеми кај некои членови, Советот на Агенцијата за аудио и аудиовизуелни медиумски услуги (ААВМУ) на денешната седница го одби барањето од „Канал 77“ да се одземе лиценцата на телевизијата „24 Вести“.

Прифаќајќи ја информацијата од стручните служби, Советот го отфрли барањето на предлагачот, чиј идентитет се криеше до самиот крај на решавањето за оваа точка од дневниот, а во однос на дилемите на некои членови, директорот на ААВМУ, Зоран Трајчевски, појасни дека стручните служби веднаш ќе извршат проверка дали постои поврзаност на телевизијата „24 Вести“ со фирма од Австрија што врши радиодифузна дејност, со што би се создала недозволена медиумска концентрација.

Во дискусијата, пред да се пристапи кон гласањето, и Трајчевски и претседателот на Советот, Лазо Петрушевски, појаснија дека во однос на барањето за одземање на лиценцата, не е можно тоа да се стори затоа што дури и да постои недозволена медиумска концентрација, првин се дава долг рок на радиодифузерот да го отстрани проблемот, а дури потоа може да се одземе лиценца.

– Ако денешната информација биде прифатена, не значи дека Агенцијата во иднина нема да истражува за сопственичката структура. Ние тоа го правиме редовно за секој медиум. Но, ако имаме основа за сомневања, ќе се почне постапка за недозволена медиумска концентрација, а не за одземање лиценца. Ние пред две години имавме постапка кај истиот што е предлагач и му дадовме рок да го реши тоа – рече Трајчевски.

На самиот крај, пред гласањето, на претседателот на Советот, Лазо Петрушевски, му се испушти дека „Канал 77“ стои зад барањето да се одземе лиценцата на „24 Вести“.

Инаку, расправајќи по претходна точка, Советот не дозволи промена на сопственичката структура на телевизијата.

Ако тоа се одобри, како што кажаа од стручната служба, би се создала недозволена медиумска концентрација зашто физичкото лице од барањето да стане и единствен основач и управител на телевизијата „24 Вести“ е директен роднина на сопственикот на оператор што реемитува програми, односно кабелскиот оператор „Телекабел“.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Останувањето на Трајчевски на чело на ААВМУ е сензитивна тема, вели Османи


Скопје, 24 ноември, 2017 - 13:44 (META) 

Европската комисија и Владата се многу сензитивни во поглед на каков било реваншизам врз партиска и политичка основа, рече денеска вицепремиерот за европски прашања, Бујар Османи, прашан дали има препорака од Европската Унија, за директорот на ААВМУ, Зоран Трајчевски, и понатаму да остане на челната функција на агенцијата.

– Целта на реформата на јавната администрација е таа да се задснова на системот за унапредување преку заслуги, односно преку квалитет во работењето. Во одредени институции што сме ги утврдиле како најсензитивни, ќе се внимава во делот на именување – рече Османи, додавајќи дека сите именувања мора да бидат според законската процедура, транспарентни и без никакви елементи на политички и на партиски реваншизам.

Зоран Трајчевски беше назначен за директор на ААВМУ во април 2012 година, а шестгодишниот мандат му завршува во април следната година.

Стратегијата за деполитизација и за професионализација на јавната администрација треба да биде донесена до крајот на годинава, а истовремено треба да биде формиран и совет што ќе го координира спроведувањето на стратегијата.


Трајчевски: Не планирам да поднесам оставка на барање на политичка партија


Скопје, 30 октомври, 2017 - 12:11 (META) 

Директорот на Агенцијата за аудио и аудиовизуелно услуги (ААВМУ), Зоран Трајчевски, денеска ги отфрли обвиненијата на лидерот на ВМРО-ДПМНЕ, Никола Груевски, како и барањето да си поднесе оставка од раководната позиција.

– Агенцијата за аудио и аудиовизуелни услуги работи во согласност со законите и не постои притисок врз медиумите. Не планирам да поднесам оставка на барање на лидер на политичка партија – изјави Трајчевски за „Мета“.

Лидерот на опозициската ВМРО-ДПМНЕ, во синоќешното обраќање по вториот круг од локалните избори, рече дека не ги признава резултатите и оти бара одржување на предвремени парламентарни избори според пржинскиот модел. Тој, исто така, побара и смена на директорот на ААВМУ, поради тоа што агенцијата не реагирала на притисоците што се вршеле врз медиумите за време на изборната кампања.


Трајчевски: За овие избори медиумите известуваат порамномерно и попрофесионално


Скопје, 12 октомври, 2017 - 19:51 (META) 

За овие локални избори медиумите известуваат далеку порамномерно и попрофесионално во споредба со претходните два изборни циклуси, каде беше забележано нерамномерно известување и воочлива координација, рече директорот на Агенцијата за аудио и аудиовизуелни медиумски услуги (ААВМУ), Зоран Трајчевски, на денешната дебата на тема „Известување на медиумите во изборна кампања, искуства и предизвици“, што се одржа во Клубот на новинари.

Трајчевски истакна дека годинава првпат судот во Скопје постапил во законски рок по пријава на ААВМУ и донел пресуда за само 48 часа по поднесувањето. Според него, судот сè уште не ги решил предметите на AАВМУ поднесени пред две години.

Насер Селмани, претседател на Здружението на новинарите на Македонија (ЗНМ), рече дека постои тренд на намалување на нападите врз новинарите. За разлика од предвремените парламентарни избори во декември минатата година, кога беа регистрирани два физички напади на новинари, во оваа изборна кампања нема ниту еден физички напад, а регистрирани се само вербални закани.

– Полицијата почна сериозно да ги истражува нападите, но загрижува фактот дека од 54 напади ниту еден напаѓач не е казнет од судовите. Тоа покажува јасна политика на неказнивост. Само 10 случаи се целосно истражени и поднесени се пет кривични и уште толку прекршочни пријави. Со политиката на неказнивост не можеме да очекуваме подобрување на слобода на говорот – рече Селмани, кој се заложи за изградба на ефикасен институционален механизам за превенција на насилство против новинари, во кој ќе учествуваат полицијата, обвинителството и судот.

Дебата во Клубот на новинари беше организирана од „Онлимит медиа“ и од ЗНМ, а финансиски поддржана од „Цивика мобилитас“.


ААВМУ, АЕК и медиумите да се заштитат од политичко мешање


Скопје, 28 септември, 2017 - 15:04 (META) 

Да се донесат законските измени со кои се предвидува двотретинска согласност на парламентарците при именување  на членовите на Советот на Агенцијата за аудиовизуелни медиумски услуги (АВМУ) и да се намали  рекламирањето на власта, пред се на локално ниво, во електронските медиуми и да се елиминира можност за политичко влијание во медиумите, се едни од главните цели што треба да се постигнат за да се овозможи поголема независност на електронските медиуми и во нивното контролирање.

Тоа беше кажано на денешната презентација на извештајот на Евротинк – Центар за европски стратегии, НВО „Инфоцентар“, Транспарентност Македонија и Хелсиншкиот комитет за човекови права. Тоа е третиот тримесечен извештај на работата на Агенцијата за аудио и аудиовизуелни медиумски услуги (АВМУ) и Агенцијата за електронски комуникации (АЕК) подготвен во рамките на проектот „Мониторинг на ефикасноста, ефективноста, транспарентноста и одговорноста на регулаторните тела за медиумите – PROformance Watch“.

АВМУ во изминатото тромесечје одржала солидно ниво на транспартеност и отчетност, а од пет медиумски организации биле побарани законски измени за предлагање и именување членови на Советот на АВМУ, но процесот е закочен. Тоа во Собранието треба да се направи како што е предвидено и членовите на овој Совет да се избираат со двотретинско мнозинство за да се постигне вистинска независност на агенцијата и нејзината работа, побара Зоран Фидановски од Здружението на новинарите на Македонија во дискусијата по презентацијата.

Како што рече комуникологот Сефер Тахири во презентацијата, според извештаи на ЗНМ и според други согледувања, уште се регистрира големо мешање на власта во електронските медиуми, а тоа, како што рече, се случувало и преку рекламирањето на власта. На тоа се спротивстави Зоран Трајчевски, директорот на АВМУ, кој рече дека рекламирањето на власта во последните две години е речиси елиминирано. Фидановски во одговор посочи дека тоа рекламирање е присутно главно на локално ниво, во поглед на пренесување на извештаи од Советите на општини и разни соопштенија.

– АВМУ треба да биде независно тело. Клучот е во политичката независност од власта, но тоа е лесно да се каже, а тешко да се оствари – рече Тахири.

Покрај него, за работата на АВМУ и АЕК говореа и Горан Лазаров, проектен координатор од Евротинк и Билјана Бејкова, извршна директорка на НВО Инфоцентар.

 

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ – Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка од „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


АВМУ вели дека не сака да зависи од Владата, невладините денеска ќе кажат што не одговара


Скопје, 28 септември, 2017 - 10:28 (META) 

Директорот на Агенцијата за аудио и аудиовизуелни медиумски услуги (АВМУ), Зоран Трајчевски, вчера порача дека со укинувањето на радиодифузната такса и финансирањето на Агенцијата од страна на bуџетот ќе се наруши независноста на оваа институција.
Денеска неколку невладини организации ќе презентираат извештај токму за АВМУ.

– Укинувањето на радиодифузната такса и финансирањето од буџетот значи целосно уривање на независноста на институцијата и ставање под капата на Владата. Ако постоела таква практика, ќе била применета и во другите европски земји. Ова е популистички чин со кој сакаат да се исполнат предизборни ветувања, за жал, и на опозицијата и на позицијата, не водејќи притоа сметка дека се уништува функционирањето на Агенцијата, која претходните 20 години, поради финансиската независност, можеше да ја врши улогата во општеството – порача вчера Трајчевски.

Одговарајќи на новинарски прашања во врска со подготовката на нов закон за медиуми, Трајчевски рече дека неговиот личен став е оти се работи за текст на закон кој е спротивен на европските директиви. Рече дека агенцијата не е вклучена во новиот закон.

Денеска ќе биде презентиран третиот извештај за работата на АВМУ, кој го подготвуваат  „Евротинк“ – Центар за европски стратегии, НВО Инфоцентар, „Транспарентност Македонија“ и Хелсиншкиот комитет за човекови права.

– Во изработката на законот, ние не сме вклучени и сметам дека се работи за работна верзија која се изработува. Логично е да има јавна расправа и да бидат вклучени сите субјекти кои се засегнати од законот – рече Трајчевски во изјава за медиумите.


Трајчевски: Независноста на АВМУ ќе се наруши ако се стави под капата на Владата


Скопје, 5 септември, 2017 - 14:18 (META) 

Укинувањето на радиодифузната такса и финансирањето на Агенцијата за аудио и аудиовизуелни медиумски услуги од буџетот ќе ја наруши независноста на институцијата и ќе ја стави под капата на Владата, оцени денеска директорот на АВМУ, Зоран Трајчевски, на отворањето на Конференцијата со регулаторните тела за медиумите од Бугарија, Косово, Србија, Црна Гора, Хрватска и од Словенија, организирана по повод 20 години од основањето на Агенцијата.

Тој истакна дека ако постоела таква практика, ќе била применета и во другите европски земји.

– Ова е популистички чин со кој сакаат да се исполнат предизборни ветувања, за жал, и на опозицијата и на позицијата, не водејќи притоа сметка дека се уништува функционирањето на Агенцијата, која претходните 20 години, поради финансиската независност, можеше да ја врши улогата во општеството – изјави Трајчевски.

Во врска со подготовката на нов закон за медиуми, Трајчевски истакна дека негов личен став е дека се работи за текст кој е спротивен на европските директиви. Тој истакна дека АВМУ не е вклучена во изготвувањето на законот и оти веројатно станува збор за работна верзија.

– Логично е да има јавна расправа и да бидат вклучени сите субјекти кои се засегнати од законот – рече Трајчевски.

 

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата „Отворено општество – Македонија“.