!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ЗЕЛС бара итен датум за локални избори за да не дојде до колапс на општините


Скопје, 9 мај, 2017 - 16:37 (META) 

Функционирањето на голем број општински јавни установи ќе се доведе во прашање, а околу 45.000 вработени во локалната самоуправа, оштинските претпријатија и во образованието ќе останат без плата.

На ова денеска предупредија градоначалниците на Скопје, Куманово и на Гостивар, но и членови на Заедницата на единиците на локалната самоуправа (ЗЕЛС), Коце Трајановски, Зоран Дамјановски и Невзат Бејта, бидејќи нивниот и мандатот на советниците во општините им истекува на 15 мај, а нови локални избори не се закажани.

„Ќе се доведат во прашање функционирањата на општински јавни установи и тоа сите културни, образовни институции на локално ниво, како музеи, театри, домови на култура, на противпожарни служби, спортски објекти, зоолошки градини и слично. Градежни дозволи нема да се издаваат. Градежното земјиште, со кое управува локалната самоуправа, веќе нема да се оттуѓува или да се дава под закуп“, предупреди Трајановски.

Тој вели дека ќе престанат сите почнати и ќе се запрат планираните инвестиции, како во инфраструктурата на општините, така и во сите други објекти што се надлежност на локалната самоуправа.

„Нема да може да се врши исплата на комуналии, како струја, вода и слично, во сите институции на локално ниво, што ќе значи дека истите институции, а, пред сè, градинките и училиштата, ќе треба да се затворат, а децата да се испратат дома. Нема да можат да се склучуваат бракови во државава. Само да потсетам дека при секое склучување брак, официјални сведоци се претставници на општинските совети“, додаде Трајановски.

Поради тоа, ЗЕЛС денеска апелираше парламентот итно и без одложување, а најдоцна до петок оваа недела, да најде решение. Една од можностите е измена на Изборниот законик.

„Наместо првата половина на мај, како што стои во Изборниот законик, треба да се утврди нов датум за одржување на локалните избори. До Уставниот суд е доставена иницијатива од Министерството за локална самоуправа за да се разгледаат одредени членови на Изборниот законик и од Законот за локална самоуправа, а во однос на мандатите на градоначалниците и на претставниците на општинските совети“, истакна Трајановски.

Уставниот суд утре на седница треба да ги разгледува иницијативите за укинување на членови од Законот за локална самоуправа и на Изборниот законок, со што би се овозможило продолжување на мандатот на градоначалниците и на советите на општините.


Ослободен началникот на СВР Куманово, обвинува за монтиран случај и за заплашување


Куманово, 13 декември, 2016 - 21:56 (META) 

Началникот на СВР Куманово, Стојанче Величковиќ, кого полицијата вечерва се обиде да го уапси, е пуштен откако полицијата, по наредба на Основно јавно обвинителство, извршила претрес во неговиот дом.

Величковиќ рече дека полицајците влегле во неговиот дом во 16.40 часот, дека извршиле претрес и дека барале документи и списи од изборите.

– Во 16.40 дојдоа, упаднаа кај мене дома со униформи, со маски и со автомати и ми го преплашија семејството. Почнаа да прават претрес. Не гледам каде сме направиле грешка затоа што изборите беа спроведени фер и демократски. Ова е монтиран процес од Митко Чавков и инспектори што се заштитени како бели мечки. Сакаат да ме заплашат за победата во Куманово. Сакаат да ме затворат и да ме заплашат. Изборите во Куманово беа спроведени регуларно. Инспекторот беше коректен, ми соопшти дека се работи за некоја наредба, бараа некои списи кај мене. Ми го гледаа тефтерот, бараа некои документи. Наредбата е од Основно јавно обвинителство од Скопје. Целта е да ме заплашат зашто работам професионално. Ова е тенденциозно, фингирано, но јас ќе ја истерам ситуацијата до крај – вели Величковиќ.

Пред Величковиќ, изјава даде градоначалникот на општина Куманово, Зоран Дамјановски, кој рече дека обидот за апсење е дрзок, но ги повика граѓаните да го сочуваат мирот.

– Денеска се случи немил настан. Веќе видена работа. Не можат да ги прифатат нивните неуспеси на изборите. Упаднаа во куќата на началник, а зошто, не знае ни тој самиот. Сметам дека ова што го прават е крајно дрско, особено во оваа драматична ситуација за Македонија зашто уште се пребројуваат гласовите. Се обраќам до сите граѓани да го соочуваат мирот и достоинството и да се бориме со демократски средства за слободата – рече Дамјановски.

Додека полицијата беше во домот на Величковиќ, пред куќата се собраа група граѓани да му дадат поддршка. Тие извикуваа „Нема правда, нема мир“.


Кумановскиот СВР му поднесе кривични пријави на градоначалникот Дамјановски


Куманово, 7 септември, 2016 - 14:43 (META) 

Секторот за внатрешни работи Куманово му поднесе две кривични пријави на градоначалникот на Општината, Зоран Дамјановски, со кои го товари за злоупотреба на службената положба и овластувања.

Во првиот случај, Дамјановски и двајцата раководители на општинските сектори за урбанизам и за инспекциски надзор се осомничени за пропусти околу реконструкцијата и пуштањето во употреба на раскрсницата меѓу булеварот Трета македонска ударна бригада, булеварот Октомвриска револиција и улицата Бранко Богдански-Гуцман.

„Првопријавениот (Зоран Дамјановски н.з.) во ноември 2008 година ги пречекорил своите овластувања спротивно на Законот за градење и Законот за јавни патишта при што одобрил и ја пуштил во употреба реконструираната крстосница во Куманово, помеѓу булеварот Трета македонска ударна бригада, булеварот Октомвриска револиција и улицата Бранко Богдански-Гуцман, иако знаел и бил должен да знае дека за тоа е потребна употребна дозвола“, стои во дневниот билтен на МВР за кривичната пријава.

Двете службенички, пак, се товарат за пропусти околу техничката документација и за тоа што не бил вработен општински инспектор за јавни патишта.

„Поради ова, од периодот на неофицијалното пуштање во употреба на крстосницата до денес се имаат случено 31 сообраќајна незгода, во кои три лица го загубиле животот, шест лица добиле тешки телесни повреди, 26 лица добиле телесни повреди, а вкупната причената материјална штета изнесува 1.455.000 денари“, стои во дневниот билтен на МВР.

Кумановскиот градоначалник, во вториот случај за кој му е поднесена кривична пријава, е третоосомничен. Тој се товари дека не постапил по решение од управниот инспектор од Куманово во врска со узурпација на државен имот и им дозволил на неколкумина жители на улицата Веселин Вујовски да го користат имотот на штета на државата.

Кривичните пријави против кумановскиот градоначалник доаѓаат пет дена по именувањето на Оливер Спасовски за министер за внатрешни работи во привремената влада за спроведување на изборите на 11 декември. Спасовски и градоначалникот Дамјановски освен сопартијци, се и сограѓани.