ЗНМ бара судовите да применуваат, а не да толкуваат закони


Скопје, 5 јули, 2018 - 16:48 (META) 

Претседателот на Здружението на новинарите на Македонија (ЗНМ), Насер Селмани на средба со претседателот на Врховниот суд, Јово Вангеловски, побарал судот во најскоро време да ја разгледа иницијативата на Здружението, со која се бара Апелацискиот суд во Скопје да ги процесуира тужбите за клевета против онлајн медиуми согласно практиката на апелациските судови во Битола и Охрид.

Како што објави ПИНА во рамките на проектот „Опсерваторија на медиумските реформи“тужби во Основниот суд Скопје 2 Скопје за случаи за клевета и навреда во кои едната страна е новинар што работи во онлајн-медиум, се отфрлаат со образложение дека „порталот нема пасивна легитимација“ … Но, за други судови, како на пример во Охрид и Битола нема дилема дали порталите се медиуми или не, па тие постапуваат по тужбите.

Притоа, првиот човек на новинарското здружение порачал дека не е работа на судовите да го толкуваат Законот за граѓанска одговорност за навреда и клевета, туку треба стриктно да го применуваат.

– Обидот на Апелациониот суд да лиценцира медиуми ја ограничува слободата на говорот и е спротивно на практиката на Европскиот суд за човекови права и слободи – рекол Селмани.

Вангеловски пак рекол дека барањето на ЗНМ е проследено до Граѓанскиот оддел при Врховниот суд, кој следната недела се очекува да се состане.


ЗНМ бара да се прекине мандатот на членови на Советите на МРТ и на ААВМУ


Скопје, 29 јуни, 2018 - 12:18 (META) 

Ако опозицијата продолжува да се однесува неконструктивно и со фиктивна амандманска расправа во собраниската Комисија за транспорт, врски и екологија го блокира донесувањето на измените и дополнувањата на Законот за аудио и аудиовизуелни медиумски услуги за да ги заштити своите партиски војници, бараме собраниската Комисија за прашања на изборите и именувањата да утврди престанок на мандатот на тројца членови на Програмскиот совет на МРТ и на еден член на Советот на Агенцијата за аудио и аудиовизелни медиумски услуги (ААВМУ), затоа што при нивниот избор не е почитувана законската процедура и да почне постапка за избор на нови членови.

Тоа го порача Здружението на новинарите на Македонија (ЗНМ) денеска, велејќи дека е крајно време да се донесе законот што ја добил широката поддршка од новинарската заедница и ја поминал меѓународната експертиза од ОБСЕ и Советот на Европа, како клучен за почнување на медиумските реформи , кои треба да го подобрат квалитетот на новинарството.

Според претседателот на ЗНМ, Насер Селмани, тројцата членови на Програмскиот совет на МРТ се избрани спротивно на членот на законот кој вели дека членови на овој Совет на можат да бидат личности кои во изминатите пет години имаат извршувано јавна функција.

Како што за „Мета“ објасни извршниот директор на ЗНМ, Драган Секуловски, во Советот на ААВМУ проблем е тоа што еден од членовите е со несоодветно образование, односно со завршен Машински факултет и не ги исполнува условите за стручност на членовите на овој совет.

Селмани, изнесувајќи го ставот на ЗНМ, порача дека новите законски измени ќе го укинат коруптивниот систем за субвенционирање на домашна продукција во националните прватни телевизии и ќе овозможат непристрасен и лишен од политички влијание избор на советите на двете тела, а и ги намалуваат казните за медиумите. Но тој во него гледа и голем пропуст, што, како што вели, опозициските пратеници би требало да го исправат со барем еден од амандманите што ги поднеле, но тие тоа не го сториле, со што отворено застануваат само во заштита на нивните „партиски војници“.

– Единствениот недостаток на овој закон е што не обезбедува стабилно и одржливо финансирање на МРТ и ААВМУ, што е услов за нивната независност и професионалност. Чудно е што од околу 80 амандмани поднесени од пратениците на ВМРО-ДПМНЕ, ниту еден не се однесува на овој клучен недостаток на законот. Ова покажува дека главна преокупација на пратениците на опозицијата не е судбината на МРТ, туку, како преку одолговлекување на расправата да ги заштити нивните партиски војници во Програмскиот совет на МРТ и Советот на ААВМУ – рече тој.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на Фондацијата Отворено општество – Македонија.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата Отворено општество – Македонија.


ЗНМ: Загрижува фактот што незадоволни граѓани револтот го истураат врз новинарите


Скопје, 18 јуни, 2018 - 16:29 (META) 

Здружението на новинарите на Македонија остро ги осуди физичките напади на новинари и сниматели на протестот против договорот за името пред Собрание. Од таму велат дека загрижува фактот што незадоволните граѓани се уште нивниот револт го истураат врз новинарите и го повикаа МВР итно да ги идентификува напаѓачите и да ги изведе пред лицето на правдата.

Од Здружението го осудија приведувањето на новинарот на „Инфомакс“, Борислав Стоилковиќ, поради наводно одбивање да се легитимира и снимање во лице на припадниците на полицијата.

„Неразбирливо е тврдењето на МВР дека новинарот одбил да се легитимира кога од снимките додека е приведуван јасно се гледа неговата новинарска легитимација. Снимањето на полицајци на протести не може да биде основ за приведување на новинари затоа што таква забрана нема во ниту еден закон. Освен тоа, снимањето на однесувањето на полицијата на протести е од висок јавен интерес за да може да се регистрираат евентуалните злоупотреби“, велат од ЗНМ.

Истовремено, ЗНМ го осуди и однесувањето на новинарот Стоилковиќ, кој, како што велат од таму, наместо да известува од протестот станал директен учесник. ЗНМ преку соопштение до медиумите го потсетуваат Стоилковиќ дека говорот на омраза и повикување на насилство не се споиви со новинарската професија.


Селмани: Полицијата да научи дека новинарите не се непријатели


Скопје, 12 јуни, 2018 - 14:25 (META) 

Полицијата треба да научи дека новинарите, кои известуваат од протести не и се непријатели, туку исто така професионалци на службена должност, кои треба да се заштитат ако бидат нападнати од учесниците во протестот. Таа заштита ја заслужуваат согласно домашното и меѓународното право, порача претседателот на Здружението на новинарите на Македонија (ЗНМ), Насер Селмани, на работилницата во Скопје за подобрување на безбедноста на новинарите за време на критични настани, во организација на ЗНМ, МВР, со поддршка на ОБСЕ.

– Едногласни сме дека насилството врз медиумските работници е неприфатлива практика за една демократска земја. Како важен елемент во функционирање на демократските процеси тие имаат право да работат во амбиент без закани и притисоци. Нивната мисија за информирање на граѓаните и барање отченост од секоја влада нема да се исполни ако работат во услови на страв и несигурност – рече Селмани.

Работилницата е дел од напорите за подобрување на соработката меѓу новинарите и полицијата, откако МВР и ЗНМ во декември минатата година потпишаа меморандум за соработка.

Министерот за внатрешни работи, Оливер Спасовски, рече дека не смее да има толеранција за нападите врз новинарите.

– За жал во последните неколку години бевме сведоци на бројни напади и притисоци врз новинари. Нема никакво оправдување за ваквите напади. Ставот на владата е јасен и постојано го повторуваме – нула толеранција за каков било обид за загрозување на слободата на говорот и изразувањето – рече Спасовски.

Џеф Голдстајн, в.д. амбасадорот на ОБСЕ,  на отворањето на настанот рече дека насилството врз новинари не се само вербални и физички напади, туку и незаконски притворања, уништување имот, произволни рации во редакциите или во домот на новинарите, говорот на омраза, напади на социјалните мрежи и закани за сексуални напади врз новинарки.


Селмани до Поповски: Врзете си ги кучињата пред да биде предоцна


Скопје, 12 март, 2018 - 13:50 (META) 

Неколку десетици новинари денеска напладне излегоа на протест пред Владата за да побараат да се преземат мерки за заканите и навредите кои функционерот на ДУИ, Бекир Асани, му ги упати на претседателот на здружението на новинари, Насер Селмани.

На протестот, Селмани рече дека новинарите постојано се изложени на закани и притисоци и побара да се преземат мерки да се замолчат насилнциите.

– Не прифаќаме објаснување дека во владата има добри и лоши дечки затоа што владата е влада на Македонија. Не прифаќаме во Македонија да постојат две влади. Ние даноци плаќаме на оваа влада. Не е време владата да пишува осуди, тоа не е доволно и оваа влада има обврска да ги замолчи насилниците. Ако сега молчиме, ако моите колеги бидат замолчени, да знаете дека вие сте на ред, дека ќе дојдат утре по вас. Сакам да ве повикам да бидете будни затоа што еден режим што испративме и нема да дозволиме да се формира нов. Не им се плашам, не му се плашев на Никола Груевски кога неговите силеџии му се закануваа на моето семејство, не им се плашам на насилниците на ДУИ и на оние кои што молчат и седат во иста влада со нив – рече Селмани.

На почетокот на протестот пред владата дојдоа и министерот задолжен за комуникации, отчетност и транспарентност, Роберт Поповски, одговорниот за прес-тимот на владата, Зоран Бојаровски и владиниот портпарол, Миле Бошњаковски.

Поповски пред собраните новинари рече дека владата и сите партнери во владината коалиција изразуваат најостра осуда за сите напади врз новинари.

– Во име на владата и на сите партнери во владината коалиција изразуваме најостра осуда за сите напади врз новинарите што се случуваат. Ве уверувам дека оваа влада има нула толеранција за било какви закани, уцени и притисоци врз новинарите. Бидете уверени дека никој нема да биде заштитен – рече Поповски.

На ова реагираше Селмани кој му порача на Поповски „да си ги врзат кучињата“.

– Очигледно вие не правите доволно тој човек да се смири, затоа ви кажувам – врзете ги кучињата! Тоа се ваши кучиња, тие луѓе се дел од вашата коалиција, нема оправдување за ова. Тие мора да бидат врзани да не касаат затоа што кога ќе касаат ќе биде доцна– потенцираше Селмани.

Новинарите на протестот побараа да се обезбеди полициска заштита на претседателот на ЗНМ, Селмани и потенцираа дека нападот врз него е напад на сите новинари.


Новинарските организации реагираа: Заканите кон новинарите се атак врз демократијата


Скопје, 9 март, 2018 - 12:15 (META) 

Македонскиот институт за медиуми (МИМ), Советот за етика во медиумите на Македонија (СЕММ), Самостојниот синдикат на новинари и медиумски работници (ССНМ) и Институтот за комуникациски студии (ИКС) денеска категорично ги осудија упатените закани кон претседателот на Здружението на новинари на Македонија (ЗНМ) Насер Селмани.

Селмани вчера објави дека добил закани по живот од луѓе на ДУИ и дека МВР професионално постапила по пријавата, а Специјалниот претставник на ОБСЕ за слобода на медиумите, Харлем Дезир и целиот дипломатски кор во Скопје, овој инцидент го третираат многу сериозно во европски контекст после убиствата на новинари во Малта и во Словачка.

„За нас е целосно неприфатливо да се спречува слободата на изразување и професионалната работа на новинарите, која треба да биде ослободена од какви било притисоци и уцени. Упатувањето закани кон новинарите истовремено е атак врз демократијата и ограничување на можноста јавноста да има пристап до информации и идеи од различен вид. Ги повикуваме надлежните институции навремено да реагираат и да ги преземат неопходните мерки за да се расчисти случајот и да се спречи повторување на ваквите инциденти. Потсетуваме дека државата, во согласност со член 10 од Европската конвенција за човекови права, е одговорна за преземање на сите активни мерки со цел да се создаде и одржува поволна клима за слободата на изразување“, се вели во реакцијата од организациите и институтите.


Атанасова Точи и Лупевска Созен ги добија наградите за истражувачко новинарство на ЗНМ


Скопје, 28 февруари, 2018 - 16:52 (META) 

Здружението на новинари на Македонија денеска ги додели годишните новинарски награди за животно дело и за истражувачка сторија, по повод 72-годишнината од формирањето на ЗНМ.

Добитнички на наградата за истражувачко новинарство се новинарките Менче Атанасова Точи и Снежана Лупевска Созен, а наградата за животно дело му беше доделена на новинарот Љубомир Гајдов.

Лупевска Созен е наградена за емисијата „Код“, односно за настаните од 27 април во Собранието обработени во оваа емисија, а Атанасова Точи за сторијата за гинеколгот кој девет месеци лажел жена дека е бремена.

Претседателот на ЗНМ, Насер Селмани, рече дека тие се пример за тоа како треба да изгледа еден новинар во слободна и демократска земја. Потенцираше дека новинарите се уште се соочуваат со сериозни проблеми, како што е неказнивoста на насилството и реформата во медиумската законодавство.

„И покрај декларативната заложба на новата власт да се бори против практиката на неказнивост на насилството против новинари, сепак ниту еден напаѓач на новинар не е изваден пред лицето на правдата“, истакна Селмани.

Тој додаде дека во меѓувреме новинарите се соочуваат со нови форми на притисок, како што е обидот да им се врзат рацете на новинарите доделувајќи им безбедносни сертификати и практиката на големите компании да ги користат рекламите за притисок врз медиумите.

„Обединети и сплотени сме посилни и поиздржливи до денот кога слободата на говорот во Македонија нема да биде само мртво слово на хартија, туку ќе биде дел од нашиот живот“, порача претседателот на ЗНМ.

Годинава за наградата за истражувачки стории беа пријавени 25 новинари.


Кабинет на Иванов: Селмани е погрешно информиран, сертификатите се за соработници


Скопје, 26 февруари, 2018 - 16:28 (META) 

Кабинетот на претседателот на Република Македонија, Ѓорге Иванов, испрати соопштение до јавноста во кое ги негира наводите што денеска ги кажа претседателот на Здружението на новинарите на Република Македонија (ЗНМ), Насер Селмани, дека кабинетот издавал безбедносни сертификати на новинари.

Во реакцијата се вели дека Селмани бил погрешно информиран.

„Во процесот на спроведување на итните реформски приоритети врзани за прашања за безбедноста, но и законската обврска на Претседателот на Република Македонија да ја донесе стратегијата за одбрана, Советот планира активности во кои сметаме дека треба да бидат вклучени и стручни лица – новинари. Согласно законските одредби за работа за класифицирани податоци, новинарите треба да имаат издаден безбедносен сертификат од надлежен државен орган, ДБКИ. Во планираните активности очекуваме од новинарите да дадат сугестии за начинот на информирање на јавноста за подигнување на свеста и безбедносната култура за работа со класифицирани информации заради постоење на висок ризик од генерирање лажни вести и планиран истек на информации, што врши ерозија на институциите“, се вели во реакцијата од кабинетот на Иванов.

Денеска на прес-конференцијата во ЗНМ Селмани рече дека кабинетот на Иванов, практично им ги врзал рацете на околу 20 новинари со тоа што им понудил да им се издадат безбедносни сертификати без тие да имаат можност да дознаат како тоа ќе се одрази на нивната работа.


ЗНМ: Реизборот на Цветковски за директор не оди во прилог на реформите на МРТ


Скопјe, 14 февруари, 2018 - 14:53 (META) 

Здружението на новинари на Македонија смета дека резиборот на Марјан Цветковски за директор на Македонската радио-телевизија не оди во прилог на реформирање на јавниот сервис и неговото ослободување од политичка контрола, се вели во реакцијата на ЗНМ.

Од таму додаваат дека „изборот на Цветковски е резултат на силниот притисок што врз членовите на Програмскиот совет го правеа опозициската ВМРО-ДПМНЕ и владината ДУИ.“

„За жал, членот на ЗНМ, кој не го поддржа изборот на Цветковски, не успеа да ги убеди членовите на Советот новиот директор да биде искусен менаџер, кој не е поврзан со ниту една партија. Потсетуваме дека најмалку четворица членови на Советот кои гласаа за Цветковски, во оваа тело се избрани спротивно на законот. Членот 119, став 1 алинеја 2, од Законот за аудио и аудиовизуелни медиумски услуги, вели дека лицата кои во последните пет години биле носители на јавни функции, не може да бидат избрани за членови на Програмски совет“, се вели во соопштението.

Од ЗНМ го повикувааат Собранието да констатира неспоивост на функции и да ги разреши од Програмскиот совет на МРТ, Јагнула Куновска и Косана Мазнева, поранешни пратеници на ВМРО-ДПМНЕ, Агим Љека, поранешен амбасадор и Снежана Клинчарова, поранешен портпарол на Oпштина Бутел.

„ЗНМ предупредува дека реформирте во јавниот сервис не смеат да бидат предмет на политички пазар меѓу власта и опозицијата, на штета на јавниот интерес“, се додава во соопштението.

Претходно владиниот портпарол, Миле Бошњаковски, запрашан за реакција по изборот на Цветковски, рече дека „овој избор е на важност сè додека не го усвоиме Закон за аудио аудиовизуелни услуги“.

Според него, можно е законот да дојде на владина процедура веќе до крајот на оваа недела.

 
foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


ЗНМ договори соработка за полесен пристап на новинарите до информации од јавен карактер


Скопје, 1 февруари, 2018 - 16:55 (META) 

Здружението на новинарите на Македонија (ЗНМ) ќе потпише меморандум за соработка со Комисијата за заштита на правото за слободен пристап до информациите од јавен карактер, со што ќе отвори можност да се подигне нивото на општествена транспарентност и ќе им се олесни патот на новинарите до информации од државните институции. Тоа било договорено на денешната средба на претставници на ЗНМ и Комисијата.

Со меморандумот за соработка се предвидуваат обуки за новинарите за ефикасно користење на законската можност за слободен пристап до информации од јавен карактер, како и јавни кампањи кои ќе придонесат институциите да станат потранспарентни.

Според претседателот на новинарското здружение, Насер Селмани, преку поблиската соработка на двете тела, новинарите ќе дознаат повеќе за законот за слободен пристап до информации од јавен карактер, а кај граѓаните и кај институциите ќе се подигне свеста за важноста од отвореноста на институциите. Првиот човек на Комисијата, Ѓорѓи Сламков, вели дека наскоро треба да се донесе нов закон со кој треба да се овозможи подобро и поефикасно функционирање на ова тело.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.