Скандалозната „Кембриџ аналитика“ прогласи банкрот


Лондон, 3 мај, 2018 - 10:36 (META) 

Британската интернет-аналитичка компанија „Кембриџ аналитика“, којашто се најде во центарот на скандалот поради злоупотребата на личните податоци на над 80 милиони корисници на „Фејсбук“ во политички кампањи, соопшти дека прогласува банкрот.

„Кембриџ аналитика“ има седиште во Велика Британија, а синоќа челниците на компанијата им соопштиле на вработените да ги вратат своите картички и компјутерите, затоа што компанијата престанува со работа.

Првите луѓе на компанијата за британските медиуми изјавиле дека после скандалот кој што изби околу „Фејсбук“, „Кембриџ аналитика“ ги загубила сите големи клиенти, по што компанијата морала да прогласи банкрот.

Портпаролката на компанијата, Кларенс Мичел за „Би-би-си“ изјавила дека таа компанија во последните месеци била на мета на бројни неосновани обвинувања и покрај сите обиди да ги исправи работите. Според Мичел, активностите на „Кембриџ аналитика“ не само што не биле илегални, туку тие биле широко распространети во онлајн огласувањето како и во политичките активности.


Тинејџер направил профил на покојник на „Фејсбук“, па им пишувал на роднините


Тетово, 31 јули, 2017 - 14:22 (META) 

Тинејџер од Тетово влезе во полицискиот билтен бидејќи направил лажен профил на „Фејсбук“ со податоци од покојник, па потоа преку него им пишувал на роднини и на пријатели на починатото лице.

СВР Тетово поднел известување за кривично дело злоупотреба на лични податоци против 15-годишникот, откако на 5 јули еден тетовец утврдил дека е направен лажен профил на неговиот покоен татко и го пријавил случајот. По пријавата, полицијата во соработка со „Телеком АД“ – Скопје, утврдила од која  ИП-адреса е отворен лажниот профил, по што е извршен претрес во домот на малолетникот.