МВР (и ЈО) по 9 постапувања за малолетничка дозволија системот да остане „труден“


Скопје, 21 февруари, 2018 - 10:36 (META) 

Од постапувањето, односно несоодветното постапување на МВР и на ЈО (другите задолжени не се исклучени од одговорноста), сите институции во државата останаа „трудни“, исто како и граѓаните кои мораат да се соочат со овој срам од нефункционирањето на правната држава, пишува „Вистинимер.мк

Министерството за внатрешни работи во консултација со надлежно јавно обвинителство излегоа со сооопштение пред неколку дена околу случајот со малолетничката–штитеничка на државата во кое цениме дека има извртена вистна, т.е. спин:

Во врска со случајот со 12-годишното девојче штитеник на ЈУ за згрижување на деца со воспитно-социјални проблеми, од страна на МВР постапувано е од крајот на 2016 и во текот на 2017 година и 2018 година и според евидентираните оперативни сознанија и комуникација со надлежното ОЈО, ја информираме јавноста за следното:

Малолетното девојче во текот на споменатиот период е девет пати пријавувано за исчезнато лице од страна на вработени во социјално-згрижувачките установи, при што во сите девет случаи е постапувано од страна на соодветните полициски служби.

[Извор: МВР – Соопштение, датум: 16.02.2018]

Kontraspin-foto-Vistinomer-1024x281-e1500652724996

Контраспин: МВР во соопштение за јавноста изнесе тврдење дека 9 пати е постапувано од страна на соодветни полициски служби по пријави дека е исчезнато лице од Јавна установа за згрижување на деца со воспитно-социјални проблеми, што го сметаме како своевидно извртување на вистината односно спин.

Во моментот додека се пишува овој текст, во јавноста е потврдено дека уште две малолетнички–штитетнички на соодветната ЈУ се или биле трудни, при што едната ја прекинала бременоста, додека другата одбива и сака да го роди дететото. Самото ова сознание, заедно со претходниот случај на 12-годишното девојче, кое неодамна абортираше, го отвора сомнежот дали МВР постапувало или „постапувало“.

Консултирајќи искусни полициски службеници кои биле и на високи функции во системот, може да се најде разбирање за нивната теза дека МВР е сведено во многу случаи како да станува збор за невладина организација, а не за институција задолжена за откривање и гонење на криминалот и заштита на безбедноста на граѓаните, пред сè, поради Законот за кривична постпка од 2013 година, кога главна улога во истрагата му е дадена на јавниот обвинител.

Но, тоа што може да се најде разбирање, секако не смее да значи амнестија за МВР и префрлање на вината само кај Јавното обвинителство, кое, пак, очигледно, според неколку тврдења, не сторило речиси ништо (досегашна истрага на Канцеларија на НП, изјава на Министерката за труд и Социјална политика Мила Царовска и веб страницата на Обвинителството, каде не може да се најдат активности за посочениот период).

Имено, додека топката се префрла од МВР кон ЈО, бидејќи МВР тврди дека се до почетокот на оваа година го известило ЈО во посебни извештаи, МВР треба да одговори зошто по 9 пријавувања за исчезнатото лице, реагирале експресно дури на 14.11.2017, кога од болницата во Велес добиле известување дека малолетничката е донесена кај нив во бессознание. Тогаш конечно системот профункционирал, девојчето го испитувале и од Институтот за судска медицина, па врз основа на наодот МВР, дури на 19-ти февруари поднела кривична пријава против некој си Е.Х, до ОЈО, а и натаму го испитувала случајот, односно истрагата продолжува и против други лица.

Повеќе прочитајте на „Вистиномер.мк“.


73-годишен охриѓанец блудничел врз седумгодишно девојче


Охрид, 7 јуни, 2016 - 14:16 (META) 

Охриѓанка, на возраст од 32 години, во полициската станица во Охрид пријавила дека 73-годишен сограѓанин, со иницијали Т.Т., извршил полов напад врз нејзината седумгодишна ќерка.

Додека девојчето се враќало од училиште по улицата Св. Климент Охридски, сторителот го задржал и извршил полови дејства врз неа.

Т.Т. е приведен и задржан во полициската станица во Охрид за понатамошна постапка.
Полицијата презема мерки за целосно расчистување на случајот.


Унгарија: Не постапуваме лошо со бегалците


Будимпешта, 10 септември, 2015 - 14:33 (META) 

Унгарската полиција ги отфрли обвинувањата дека во таа земја се постапува лошо спрема бегалците, кои и понатаму пристигнуваат во големи групи на патот кон Западна Европа.

Портпаролката на полицијата, Викторија Чисек-Ковач, рекла дека мигрантите на пунктовите што ги контролира полицијата близу границата со Србија добиваат медицнска нега.

Таа рекла дека наводите за злоупотреба се „чисти лаги“ и дека мигрантите „се чуваат редoвно“.

Директорот на „Хјуман рајтс воч“ за вонредни ситуации, Питер Брукерт, вчера по посетата на бегалскиот камп во Унгарија, рекол дека спрема барателите на азил се постапува како спрема животни.

– Луѓето се држат во огради како животни, на сонце, без храна и вода и без медицинска помош кога стигнуваат болни. Неприфатливо е луѓето да се третираат како животни на прагот на Европа – изјави Брукерт.

Унгарската полиција соопшти дека околу 1.000 полицајци се на должност на границата со Србија, каде од вчера примени се околу 3.321 мигрант.


Француски војници злоупотребувале деца во Централноафриканската Република


Париз, 30 април, 2015 - 20:06 (META) 

Нова афера ја тресе Франција откако директорот за теренски операции на канцеларијата на Високиот комесаријат за човекови права при Обединетите нации (ОН) во Женева, Андрес Компас, на обвинителството во Париз му доставил интерен извештај на ОН за сексуална злоупотреба на деца во Централноафриканската Репубилка, во која учестувале припадници на француските мировни сили, пренесуваат медиумите.

Компас го доставил документот до француските власти откако ОН не презеле ништо за да го запрат насилството врз децата, од кои дел биле на осумгодишна возраст.

Самиот Компас, како што пишува лондонски „Гардијан“, бил суспендиран по откривањето на извештајот.

Францускиот претседател, Франсоа Оланд, изјавил дека доколку некои војници се однесувале лошо, тој нема да има милост кон нив. Од обвинителството соопштиле дека повеќе војници се под истрага.

Како што пренесуваат медиумите, во интерниот извештај кој протекол во јавноста, стоело дека француски војници сексуално злоупотребувале деца, на возраст од 8 до 15 години, во замена за храна и за пари, а сето тоа, наводно, се случувало во кампот за бегалци во главниот град Банги, во првата половина од минатата година.