„Еуромакс рисорсис“ смета дека доставила сè што можело за Иловица


Скопје, 13 април, 2018 - 14:08 (META) 

„Еуромакс рисорсис“, компанијата со инвеститори од Канада, САД и Велика Британија, денеска се огласи со реакција за одлуката на Владата на нејзината 63, седница, со која го задолжи Министерството за економија да ја продолжи постапката со која од компанијата – концесионер на рудникот за бакар и и злато на локалитетот Иловица, треба цда ја докомплетира документацијата.

Компанијата смета дека доставила сè што можела, а за некои работи попречила политичката криза.

„Компанијата смета дека ги има доставено сите неопходни документи што произлегуваат од концесијата, а кои можеа да се достават, имајќи предвид дека одредени процеси доцнеа поради политичката криза во Македонија и ограничената моќ на одлучување на техничката Влада која беше поставена поради државната Комисија за борба против корупцијата“, се вели во реакцијата од „Еуромакс рисорсис“.

„Еуромакс рисорсис“ вели дека со инвестиција од 343 милиони евра проектот за развој на рудникот за бакар и злато во Иловица – Штука е една од најголемите инвестиции во Македонија од осамостојувањето до денес. Компанијата вели дека одлучила да се откаже од употребата на цијанид, употребувајќи модерна рударска технологија, а преку работата на рудникот ќе  придонесе за развој на економијата што ќе резултира со раст на бруто домашниот производ од 3% на годишно ниво.

„Во текот на изградбата на рудникот, во првите две години, проектот ќе создаде над 3.200 директни и индиректни работни места. Просечната нето плата во рудникот ќе биде 16.000 евра по вработен на годишно ниво. Изградбата на рудникот ќе биде во вредност од 180 милиони евра, а локалните компании ќе можат да работат на овој проект во период од две години колку што е планирана изградбата на рудникот. Со стартот на операциите на проектот, за различни економски активности во следните 22 години ќе бидат потрошени 1,6 милијарди евра во локалната и во националната македонска економија или 74 милиони евра на годишно ниво. Дополнително, по основ на даноци и концесиски надомест од проектот во Македонија ќе се инкасираат 528 милиони евра или просечно на годишно ниво околу 24 милиони евра“, велат од канадската компанија.


Цената на златото се зголеми откако Северна Кореја истрела ракета кон Јапонија


Пјонгјанг, 29 август, 2017 - 13:55 (META) 

Цената на златото се приближи до највисокото ниво за годинава, откако Северна Кореја истрела балистичка ракета кон Јапонија.

Овој настан ги поттикна инвеститорите на сигурно инвестирање, поради зголемување на тензиите помеѓу Пјонгјанг и САД и сојузниците.

Цената на златото оваа година се зголеми за 15 проценти, остварувајќи пораст секој месец.


Украдени златници, девизи и накит од куќа во Кичевско


Кичево, 27 август, 2017 - 12:51 (META) 

Две непознати маскирани лица вчера наутро ограбиле куќа во кичевското село Мамудовци, при што одзеле 63 златни пари (даблони), 360 швајцарски франци и друг разновиден златен накит, со што причиниле материјална штета од околу 30.000 евра, соопшти полицијата.

Напаѓачите околу 10 часот влегле во куќата и со спреј-солзавец ја испрскале Р.А. (75) по очите, а потоа физички ја нападнале. Откако извршиле пребарување, ги пронашле и одзеле парите и останатите предмети, по што го напуштиле местото на настанот. На Р.А. и била укажана лекарска помош во Медицинскиот Центар-Кичево, каде и биле констатирани телесни повреди.

Увид извршиле јавен обвинител и увидна екипа од Полициската станица Кичево. Полицијата презема мерки за пронаоѓање на сторителите и за целосно расчистување на кривичното дело.


„Цивил“: Во Гевгелија гласањето до 17 часот без поголеми проблеми


Гевгелија, 23 април, 2017 - 17:42 (META) 

Недоволна информираност на граѓаните за референдумското прашање и за процедурите за спроведување на референдумот, помали пропусти во работата на избирачките одбори,  како и проблеми со избирачкиот список, се клучните забелешки на набљудувачите на „Цивил“ – Центар за слобода за текот на референдумот во Гевгелија до 17 часот.

Референдумот во Гевгелија, што треба да донесе решение дали Општина Гевгелија ќе дозволи отворање рудници или не, според информациите на надзорниот тим на „Цивил“ – Центар за слобода, почнал со навремено отворање на сите 37 избирачки места.

Досега, според извештаите на набљудувачите, заклучно со 17 часот, референдумот поминал во мирна атмосфера.

„Од ОИК Гевгелија известија дека излезноста до 13 часот е околу 40 отсто. Според неофицијални податоци од нашите набљудувачи, излезноста на референдумот на повеќе избирачки места во Гевгелија до 17 часот надминала 50 отсто од регистрираните гласачи во општината“, известија од „Цивил“.

Право на изјаснување на референдумот имаат нешто повеќе од 19.000 жители на Општина Гевгелија, на 37 избирачки места.


Гевгеличани денеска решаваат дали да се отвораат нови рудници


Гевгелија, 23 април, 2017 - 10:14 (META) 

Жителите на Гевгелија денеска на референдум треба да одговорат на прашањето дали се „за“ или „против“ отворање нови рудници на територијата на општината. Како што пренесоа медиумите, Владата изминатиот период дала концесии на меѓународни компании за геолошки истражувања на две локации во општината Гевгелија, односно на падините на планината Кожуф.

Активистите на Граѓанското здружение „Спас за нас“ од Гевгелија, кое ја почна иницијативата за референдумот, стравуваат дека деталните геолошки истражувања ќе се вршат со експлозив и со голема механизација, а при одвојувањето на златото од рудата ќе се користи цијанид, што негативно ќе влијае на животната средина и на здравјето на луѓето.


Гевгеличани утре на референдум ќе одлучуваат за рудниците на Кожуф


Гевгелија, 22 април, 2017 - 12:48 (META) 

Жителите на Гевгелија, утре на референдум ќе одлучуваат дали се „за“ или „против“ отворање рудници за злато на територијата на општината. Како што пренесоа медиумите, Владата изминатиот период дала концесии на меѓународни компании за геолошки истражувања на две локации во општината Гевгелија, односно на падините на планината Кожуф.

Активистите на Граѓанското здружение „Спас за нас“ од Гевгелија, кое ја почна иницијативата за референдумот, стравуваат дека деталните геолошки истражувања ќе се вршат со експлозив и со голема механизација, а при одвојувањето на златото од рудата ќе се користи цијанид, што негативно ќе влијае на животната средина и на здравјето на луѓето.

За референдумско изјаснување поради истите причини, како што пишува „МКД“, се подготвуваат и општините Валандово и Кавадарци.

Во Валандово, украинската компанија „Сардич“ веќе доби концесија на 35 години за рудникот за бакар Казандол и до крајот на годината треба да почне со експлоатација на рудата.


Пад на берзите по победата на Трамп, поскапува само златото


Вашингтон, 9 ноември, 2016 - 11:10 (META) 

Светските финансиски пазари веднаш и тоа негативно реагираа на веста за победата на Доналд Трамп на американските претседателски избори. Берзите покажуваат драматичен пад, а се зголемува само цената на златото, што е вообичаена ракција на инвеститорите во време на неизвесност и на криза.

Американскиот долар исто така изгуби од својата вредност, како и европските валути, меѓу кои и руска рубља.

За време на кампањата, Трамп се закани дека ќе ги поништи трговските договори и дека ќе ги врати работните места во САД.

Тој, исто така, се закани дека ќе воведе трговски бариери и дека ќе го блокира увозот од земји како што се Мексико и Кина.

Германското здружените на индистријалците го предупреди Трамп да не воведува протекционистички мерки кои ги вети за време на кампањата, порачувајќи му дека тоа може да ѝ наштети и на американската економија и на германскиот извоз.


Се зголеми количеството на монетарно злато во државните девизни резерви


Скопје, 21 октомври, 2016 - 14:45 (META) 

Народната банка го зголеми количеството на монетарно злато во девизните резерви на Македонија преку постапка на претопување на пригодни ковани пари и на одземени златни предмети во монетарно злато.

На тој начин, Народна банка стекна нови шест прачки монетарно злато со пазарна вредност од околу 2,6 милиони евра, кое во целост ги задоволува стандардите за квалитет утврдени на пазарот на благородни метали во Лондон.

– Оваа постапка се реализира во согласност со одлуката на Владата за претворање на пригодните ковани пари во монетарно злато и во согласност со измените и со дополнувањата на Законот за управување со конфискуван имот, имотна корист и одземени предмети во кривична и во прекршочна постапка, според кои на Народната банка ѝ беа отстапени дефинитивно одземени златни предмети од Агенцијата за управување со одземен имот – се вели во соопштението на Народна банка.

Пригодните ковани пари и одземените златни предмети беа испратени на постапка на претопување во швајцарска топилница, по што функционално се претворија во монетарно злато и се вклучија во девизните резерви на државата.

На тој начин, се зголеми количеството на монетарно злато во девизните резерви на Македонија за 2.288 унци, односно од 218.875 унци се искачи на 221.163 унци злато.


Запленети злато и платина на граничниот премин Богородица


Гевгелија, 14 септември, 2016 - 16:27 (META) 

Царинските службеници на граничниот премин Богородица, на македонско-грчката граница, вчера заплениле околу еден килограм златна жица во парчиња и 57 грама платина, соопшти денеска Царинската управа.

Како што информираат оттаму, вредноста на запленетото злато и платина е проценета на околу 38.000 евра.

Златото и платината биле сокриени во пластичен сад наполнет со ориз, што цариниците го нашле во возило што го управувал германски државјанин, кој вчера околу 8.15 часот се пријавил за излез од Македонија. Тој бил заедно со уште еден сопатник, а на цариниците им рекол дека нема ништо за пријавување.

„При преглед на багажниот простор од возилото, во една патничка торба со прибор за автомобил, во пластичен сад наполнет со ориз, царинските службеници пронајдоа 948 грама златна жица во парчиња и 57 грама платина во парчиња. По направена проценка од стручни лица, констатирано е дека златната жица е со чистота од 24 карати, чија вкупна берзанска вредност изнесува 36.000 евра, додека гранулите преставуваат благороден метал платина со берзанска вредност од 1.630 евра. Вредноста на непријавената стока изнесува 2.322.849 денари, а висината на избегнати царински давачки е 426.418 денари“, стои во соопштението од Царинската управа.

Инспекторите од одделението за истраги при Царинската управа по документирањето на целиот случај и по прибирањето на сите материјални докази поднеле кривична пријава до Основното јавно обвинителство Гевгелија против осомничениот, кој се товари за криумчарење.

Судија на претходна постапка на осомничениот му одредил притвор од осум дена.


Украдени 45.000 евра и поголемо количество злато од куќа во Битола


Битола, 20 август, 2016 - 13:23 (META) 

Непознат сторител извршил тешка кражба, при што одзел околу 45.000 евра и поголемо количество злато од куќа во Битола во сопственост на М.Ц.(1943) на улица Стрежевска.

СВР-Битола презема мерки за пронаоѓање на сторителот.