!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Димитров по средбата со Габриел: Ова е многу охрабрувачки ден за Македонија


Берлин, 6 септември, 2017 - 20:56 (META) 

Шефот на македонската дипломатија, Никола Димитров, како исклучително охрабрувачки ги оцени пораките од Берлин по денешната средба со министерот за надворешни работи на Германија, Зигмар Габриел.

– Добивме исклучително охрабрувачки пораки од Берлин, исклучителна поддршка за правецот по кој тргнавме и во однос на домашната агенда „3-6-9“ и во однос на проактивната надворешна политика, фокусирана на инвестирање политички капитал во добри односи со соседите. Самиот факт што на само неколку недели пред големи и важни парламетарни избори најдоа време за нас е еден убав сигнал и од министерот Зигмар Габриел и од главните луѓе во кабинетот на канцеларката Ангела Меркел и тоа е еден многу охрабрувачки ден за Македонија – изјави Димитров по средбата.

Тој истакна дека на средбата биле договорани некои детали, било разговарано за Берлинскиот процес и за важноста Балканот да не заостане премногу економски зад Европската Унија.

– Има расположение да се инвестира не само во политичка поддршка, туку и во еконосмки проекти кои граѓаните ќе ги почуствуваат во секојдневието, во патишта, но и во бизниси. Заклучивме дека реформите треба да се земат многу сериозно, а и ние самите во Македонија знаеме дека тоа мора да го направиме со оглед на лекцијата од кризата. Од друга страна, мора и европската перспектива да е реална и зaтоа имаме заедничка прилика и одговорност да ја искористиме оваа шанса – рече Димитров.

Одговарајќи на новинарско прашање дали Германија е подготвена да помогне на тој пат, Димитров се осврна прашањето за името со Грција и изјави дека според него, потребно е да се смени контекстот со кој македонската јавност гледа на овој проблем.

– Ако ние утре сакаме да бидеме пријатели и сојузници со Грција, не можеме да стигнеме до тоа ако начинот е борба или надмудрување. Факт е дека главната одговорност е кај нас и кај нив – Македонија и Грција, меѓутоа, исто така, факт е дека овој проблем влијае на европската политика кон регионот и затоа мислам дека ќе најдеме начин сите заедно да го придвижиме ова прашање напред и многу е важно тоа да биде низ дијалог – изјави Димитров.


Габриел: Опозицијата да не го блокира импресивниот старт на новата влада


Берлин, 6 септември, 2017 - 19:05 (META) 

Македонската влада направи импресивен почеток со поставувањето на своите приоритети на прашањата со соседите, на амбициозните реформски проекти и на позитивните чекори, истакнал министерот за надворешни работи на Германја, Зигмар Габриел, на денешната средба со шефот на македонската дипломатија, Никола Димитров, во Берлин, се наведува во соопштението на германското МНР.

Габриел нагласил дека тоа што е важно е што најавените реформи се спроведуваат и дека реформските процеси во Македонија повторно добиваат интензитет, како и дека само на тој начин Македонија ќе може да напредува на својот пат кон евроатлантска интеграција.

– Исто така, сакам да испратам апел до актуелната опозиција да не го блокира овој добар початок на новата влада и да не одбива конструктивно да соработува со неа, бидејќи сето ова нема да биде на сметка само на европската перспектива на земјата, туку и на граѓаните во земјата, кои се надеваат на видлив напредок и на подобрување во нивните животи – рекол Габриел.

Тој посочил дека Германија ја поддржува евроатланстаката перспектива на Македонија, но дека реформите мора да се спроведат бидејќи нема да има отстапки за време на процесот на пристапување кон ЕУ и кон НАТО.

– Германија ја поддржува евроатлантската перспектива Македонија – како и на другите земји од Западен Балкан. Ова го правиме политички, но исто така и практично, со совети и со акција. Пролетта, почнав иницијатива за нов поттик во рамките на Берлинскиот процес, кој постои од 2014 година. Задоволен сум што на самитот на Западен Балкан во јули во Трст, првите предлози можеа да бидат одобрени. Заедно со нашите партнери во Европската Унија работиме на интензивирање на нашата поддршка. Во исто време, сепак, нема да има отстапки за време на процесот на пристапување. Реформите треба да се спроведат – порачал Габриел.

Тој, како што се наведува во соопштението, на Димитров и на премиерот Заев им ги честитал првите 100 дена од формирањето на Владата.


Димитров во еднодневна посета на Берлин – ќе се сретне со Габриел


Берлин, 6 септември, 2017 - 9:33 (META) 

Шефот на македонската дипломатија, Никола Димитров, денеска во Берлин со својот германски колега, Зигмар Габриел, ќе разговара за интензивирањето на политичкиот дијалог и ќе побара засилена поддршка од Германија за спроведување на реформските приоритети, соопшти македонското Министерство за надворешни работи.

За време на еднодневната посета на Берлин, која е на покана на Габриел, Димитров ќе се сретне и со советникот за надворешна и за безбедносна политика на канцеларката Ангела Меркел, Кристоф Хојзген, како и со високи претставници на двете најголеми германски фондации „Конрад Аденауер“ и „Фридрих Еберт“.


Димитров утре во Берлин ќе се сретне со Габриел


Берлин, 5 септември, 2017 - 19:17 (META) 

Министерот за надворешни работи, Никола Димитров, утре ќе престојува во еднодневна работна посета на Берлин, на покана на шефот на германската дипломатија, Зигмар Габриел.

На средбата, како што соопштија од македонското МНР, се очекува да бидат разменети мислења за понатамошно интензивирање на политичкиот дијалог, како и да биде пренесено очекувањето за засилена поддршка и за помош од Германија во исполнувањето на клучните реформски приоритети.

За време на посетата на Берлин, Димитров ќе се сретне и со советникот на канцеларката Ангела Меркел за надворешна и за безбедносна политика, Кристоф Хојзген, како и со високи претставници на двете најголеми германски фондации „Конрад Аденауер“ и „Фридрих Еберт“.


Турција нема да влезе во ЕУ се додека Ердоган е на власт, вели Габриел


Берлин, 25 август, 2017 - 14:12 (META) 

Турција никогаш нема да стане членка на Европската Унија се додека со неа владее Реџеп Таип Ердоган, изјави германскиот министер за надворешни работи Зигмар Габриел, обвинувајќи го турскиот претседател дека не ги сфаќа сериозно пристапните преговори со ЕУ.

– Јасно е дека во оваа состојба Турција никога нема да стане членка на ЕУ. Не затоа што не ги сакаме, туку затоа што турската влада и Ердоган брзо се оддалечуваат од сето тоа за кое се залага за Европа – вели Габриел во интервју за германскиот весник „Билд“.

На прашање дали би им препорачал на германските државјани да патуваат во Турција, Габриел рече дека тоа не може да го направи со мирна совест.


Во Берлин Димитров ќе бара помош за почеток на преговорите со ЕУ


Скопје, 22 август, 2017 - 17:24 (META) 

Министерот за надворешни работи Никола Димитров за време на посетата на Берлин, на 6 септмеври, ќе побара Германија и Европската Унија да и помогнат на Македонија целосно да ја реализира евроатлантската интеграција.

– Ова е шанса и за ЕУ и за Германија да покажат дека не само што можат да помогнат да се стопира кризата и да не оди подлабоко, туку и да помогнат кога има добри работи и добар развој, да се донесе работата до конечен успех – рече Димитров на денешната прес-конференција во Владата.

Прашан дали на средбата со неговиот колега Зигмар Габриел ќе побара вклучување на Германија во решавањето на спорот за името со Грција, Димитров рече дека е поважно е да се обезбеди почеток на пристапните преговори. Тој истакна дека Македонија ја научила својата лекција, но дека и ЕУ има лекција која треба да ја научи.

– Нашата реформска лекција, мислам дека ја научивме. Лекцијата за Европа треба да биде дека е рискантно и штетно една земја да се остава во чекалната зад затворени врати, и за ЕУ и за НАТО. Примарната одговорност за тие заклучени врати ја имаме ние и соседите со кои имаме отворени прашања, во случајот Грција, но и европската политика има минус и одговорност за таквата ситуација. Убеден сум и дека ова е шанса и за Грција – рече Димитров.


Димитров на 6 септември во дводневна посета на Германија


Скопје, 22 август, 2017 - 13:29 (META) 

Шефот на македонската дипломатија, Никола Димитров на 6 септември ќе замине во дводневна поета на Германија, каде ќе се сретне со германскиот министерот за надворешни работи на Германија, Зигмар Габриел.

Главна тема на разговорите ќе биде планот „3-6-9“, неговата реализација и плановите на новите влада за подобрување на добрососедските односи, како и за враќање на земјата на евроатлантскиот пат. Засега не се знае дали спорот за името со Грција ќе биде разгледано на средбата, ниту пак за евентуалното вклучување на Германија во решавањето на проблемот.

Како што дознаваме од дипломатски извори, засега на агендата на дводневната посета на Димитров се наоѓа само средбата со Габриел, но не се исклучува можноста да има средби и со други германски политичари, како и со претставници на тинк-тенк организации.


Димитров ќе оди во Берлин на средба со Габриел


Скопје, 21 август, 2017 - 16:21 (META) 

Шефот на македонската дипломатија, Никола Димитров претстојниот период ќе оди во Берлин, каде ќе има средба со својот германски колега Зигмар Габриел.

Посетата на Димитров се наведува во денешното соопштение на Министерството за надворешни работи, по повод примањето на копиите од акредитивните писма на новоименуваниот, вонреден и ополномоштен амбасадор на Германија во Македонија, Томас Норберт Герберих.

„Амбасадорот Герберих изрази задоволство што во наредниот период ќе ја води германската амбасада во пријателска Македонија, пренесувајќи ги притоа пораките на охрабрување од официјален Берлин за политиките и активностите на новата македонска Влада, како во делот на амбициозната реформска агенда, така и во контекст на новиот позитивен пристап во односите со соседите. Во оваа смисла, пренесе и целосна поддршка за европската и евроатланската перспектива на Македонија, со очекување за што поскоро и конкретно поместување на процесот на интеграција во ЕУ и НАТО. Претстојната посета на министерот Димитров на Берлин и средбата со својот германски колега Габриел, претставува дополнителна потврда во оваа насока“, стои во соопштението од МНР.

Димитров на средбата со новиот амбасадор ги поздравил „одличните и пријателски односи меѓу двете земји, посочувајќи дека тековната динамична соработка во повеќе полиња од заемен интерес сведочи за заедничката волја за надградување на севкупната билатерална размена“.


Меркел сака да се приклучи кон лудилото на Трамп за вооружување, смета Габриел


Берлин, 14 август, 2017 - 15:01 (META) 

Изборите во Германија се референдум за тоа дали земјата ќе се приклучи кон „лудилото за вооружување“ на американскиот претседател Доналд Трамп, смета лидерот на германската Социјалдемократска партија, Зигмар Габриел, кој е и германски министер за надворешни работи.

Тој ја обвини канцеларката Ангела Меркел дека му се умилкува на Трамп со нејзината „посветеност“ за зголемување на буџетот за одбраната.

– Изборите во септември ќе бидат гласање и за тоа дали Германија ќе остане мирна или ќе се приклучи кон лудилото на Трамп за вооружување – вели Габриел.

Како и Трамп, како што рече Габриел, и Меркел и нејзината партија сака „да вложува пари во оружје“, пренесува белгискиот портал „Политико“.


Германија: По години безуспешни преговори, Бугарија и Македонија најдоа решение


Берлин, 1 август, 2017 - 15:23 (META) 

„Денеска Бугарија и поранешната југословенска Република Македонија потпишаа историски договор за добрососедство во Скопје. Го поздравувам многу тоа што по многу години безуспешни преговори, се најде консензуално решение на отворените прашања. Со тоа двете држави испраќаат важен сигнал за успешна билатерална, но и регионална соработка на Балканот и за понатамошната евро-атлантска интеграција на ПЈР Македонија“, порача германскиот министер за надворешни работи, Зигмар Габриел, по повод потпишувањето на Договорот за добрососедство помеѓу Бугарија и Македонија.

Во изјавата што ја пренесе германското министерство за надворешни работи, Габриел посебно го нагласува фактот дека потписот на договорот се става помалку од два месеца од стапувањето на функција на новата македонска влада.

– Убеден сум дека новата влада во Скопје ќе продолжи да го спроведува овој вид конструктивна соработка консеквентно со сите соседи. Исто така, ги поздравувам напорите на новата влада, по долгогодишна стагнација, сега конечно да почне со итно потребните реформи за приближување кон ЕУ – вели шефот на германската дипломатија.