!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Нема да преговараме за плaќање на ѕидот со САД, соопшти шефот на мексиканската дипломатија


Вашингтон, 27 јануари, 2017 - 11:30 (META) 

Министерот за надворешни работи на Мексико,  Луис Видегарај, рече дека неговата земја е подготвена да разговара со САД за да се одржат добрососедските односи, но за плаќање на ѕидот на американско-мексиканската граница „нема преговори“.

– Постојат работи за кои не се преговара, работи за кои не може да има и нема да има преговори. Фактот што е речено дека Мексико треба да плати за ѕидот е нешто што едноставно не подлежи на преговори – рече Луис Видегарај на прес-конференција во амбасадата на Мексико во Вашингтон.

Во врска со изјавата на американскиот претседател Доналд Трамп дека сака да наметне нов данок од 20 отсто за стока увезена од Мексико, за да ја финансира изградбата на ѕидот, Луис Видегарај рече дека таквиот данок ќе ги направи мексиканските производи поскапи за американските потрошувачи.

Трамп изјави дека сака да наметне нов данок од 20 отсто за стока увезена од Мексико за да го финансира ѕидот на јужната граница на САД, соопшти вчера портпаролот на Белата куќа, Шон Спајсер.

Засега не се наведува како би функционирал данокот, но Спајсер рече дека спаѓа во пакетот даночни реформи за кои размислува Конгресот на САД.


Трамп го потпиша указот за изградба на ѕид на границата помеѓу САД и Мексико


Вашингтон, 26 јануари, 2017 - 9:32 (META) 

Американскиот претседател Доналд Трамп го потпиша указот за изградба на ѕид на границата меѓу САД и Мексико. Претседателот на Мексико, Енрике Пења Нието, изрази жалење и ја осуди таквата одлука.

– Мексико не верува во ѕидови. Неколкупати кажав дека Мексико нема да плати за ѕидот – напиша Пења Нието на „Твитер“.

Тој размислува дали да ја откаже планираната посета на Вашингтон на 31 јануари.

Ѕидот што треба да се гради на границата со Мексико, треба да спречи незаконско влегување во САД од Мексико.

Американскиот претседател Трамп рече дека новиот ѕид ќе чини помеѓу 4 милијарди и 10 милијарди долари, но од Универзитетот во Масачусетс наведуваат дека изградба на ѕид долг 1.609 километри ќе чини помеѓу 27 и 40 милијарди долари.


Трамп: За 90 дена ќе имаме извештај за „руското хакирање“


Њујорк, 11 јануари, 2017 - 20:00 (META) 

Новоизбраниот американски претседател, Доналд Трамп, денеска во Њујорк ја одржа првата прес-конференција.

Првото прашање на кое одговори беше за скандалот околу наводното хакирање, а Трамп изјави дека „зад тоа стои Русија, но учествувале и други поединци и земји“.

Трамп истакна дека разузнавачките агенции се многу важни и затоа ќе бидат вработени нови лица. Посочи дека за 90 дена ќе има извештај за хакирањето за да се запре таквиот нов феномен.

На прашањето за неговиот однос со Русија, Трамп наведе дека „доколку на Путин му се допаѓа Трамп, тогаш тоа е предност“ и дека со него како претседател, Русија многу повеќе ќе ги почитува Соединетите Американски Држави.

Трамп на прес-конференцијата повтори дека зголемените даноци за бизнисите надвор од границата ќе останат и ќе бидат спроведени, но и дека ѕидот со Мексико дефинитивно ќе биде подигнат.

– Го почитувам Мексико, претставниците и народот. Не ги обвинувам нив што ги искористија САД, но ѕидот мораме да го подигнеме. Се спроведува план за собирање пари за реализација, но штом ќе го средиме тоа, ќе подигнеме ѕид кон таа земја – изјави меѓу другото Трамп.

Трамп исто така најави дека неговиот приватен бизнис ќе им го препушти на своите синови и дека тој целосно ќе се повлече.

Инаугурацијата на Трамп ќе се одржи на 20 јануари.


Турција до април ќе го заврши ѕидот на границата со Сирија


Анкара, 9 декември, 2016 - 20:43 (META) 

Турција ќе заврши со градењето на ѕидот долг 900 километри долж границата со Сирија до април следната година.

– Ѕидот ќе биде целосно готов до април. Трошоците не се високи, а зад него поставуваме дополнителни мерки за гаранција на безбедноста, како и кули. Сетоа ова треба да ја зголеми безбедноста на Турција – изјави Ергун Туран, претседателот на компанијата ТОКИ, која гради две третини од ѕидот.

Официјална Анкара со ѕидот сака да ги спречи припадниците на Исламска држава да влезат во земјата.


Ѕид повисок од Берлинскиот се гради во минхенско предградие


Минхен, 7 ноември, 2016 - 14:58 (META) 

Ѕид висок четири метри се гради во минхенско предградие, со намера да се одвојат локалните жители од бегалците кои треба да се сместат во мигрантскиот камп кој сè уште е во изградба, јавува РТ. Во кампот треба да бидат сместени околу 160 деца бегалци кои се без придружба. Заштитниот ѕид се гради поради поплаките на жителите од минхенското предградие.

Контроверзниот ѕид се гради со дозвола од минхенскиот управен суд. Покрај локалните поддржувачи на изградбата, има и жители што го осудуваат овој проект. Еден од нив е гувернерот на предградието, Гвидо Бушолц.

– Ѕидот привлече многу внимание бидејќи ќе биде повисок од Берлинскиот ѕид, кој беше висок 3,6 метри. Кога се зборуваше за интеграција на мигрантите, замислував нешто навистина поинакво – изјави гувернерот Гвидо Бушолц.

Според објавените снимки од градежните активности на ѕидот, забележливо е дека не станува збор за класичен ѕид изграден од малтер и од тули, туку од големи блокови решетки, исполнети со камења.


Папата Франциск смета дека Доналд Трамп не размислува христијански


Мексико сити, 18 февруари, 2016 - 19:40 (META) 

Папата Франциск ги стави под знак прашалник христијанските убедувања на кандидатот за претседател на Соединетите Американски Држави (САД) од редовите на Републиканската партија, Доналд Трамп, кој повикува на подигнување ѕид долж границата со Мексико, пренесува „Би-Би-Си“.

„Личност која размислува само за градење ѕидови, каде и да било, а не за градење мостови, не е христијанин“, изјавил папата пред крајот на својата посета на Мексико.

Коментарот на папата Франциск се однесува на изјавите на Трамп на неговите јавни настапи, во кои како претседателски кандидат најавува и дава отворена поддршка на поставувањето ѕид на границата со Мексико, како и депортирање на речиси 11 милиони имигранти без документи.

Американскиот бизнисмен, пак, во обраќање на собир во сојузната држава Јужна Каролина, како одговор на коментарите на папата рекол дека „е срамно за еден верски лидер да ја преиспитува верата на друг човек“.

„Ниту еден лидер, особено верски, нема право да ја преиспитува религијата или верата на друг човек. Папата искажа негативни работи за мене бидејќи Мексиканците го убедиле дека Трамп не е добар човек“, пренесува „Би-Би-Си“ дел од изјавата на Трамп.


Милановиќ: Нема да подигнеме ѕид на границата со Србија


Ријека, 20 октомври, 2015 - 17:23 (META) 

Хрватскиот премиер Зоран Милановиќ денеска повтори дека Хрватска нема да подигне ѕид на границата со Србија и порача дека ситуација со бегалците е под контрола.

– Низ Хрватска, Словенија и, до пред некој ден, низ славната Унгарија само се минуваше – рече Милановиќ во Ријека и додаде дека треба да се слушаат што говорат земјите кои можат да им бидат за пример на оние кои подигаат ѕидови.


Папата Франциск: Ѕидовите ќе паднат


Рим, 28 септември, 2015 - 19:14 (META) 

Папата Франциск денеска порача дека оградите за бегалците, како таа што ја подигна Унгарија на границата со Србија, нема да траат долго.

– Вие знаете како завршуваат ѕидовите. Сите ѕидови паѓаат, денес, утре или по 100 години. Ѕидовите не се решение. Проблемот останува – рече папата при неговото враќање во Рим, по својата прва посета на САД.

Папата додал дека би сакал да ја посети Кина, со која Ватикан моментално нема официјални дипломатски односи.

Врховниот поглавар на католичката црква беше во десетдневна посета на САД и на Куба.


Унгарија ја заврши оградата од бодликава жица на границата со Србија


Будимпешта, 30 август, 2015 - 11:59 (META) 

Заврши поставување на бариерата од бодликава жица во должина од 175 километри, долж границата со Србија, соопштија унгарските власти. Жицата е поставена за да го спречи преминувањето на мигрантите на нејзина територија.

Ова го соопшти министерството за одбрана, кое додаде дека зад бодликавата жица, армијата гради и 4 метра високата ограда.

Унгарија која е земја членка на Европската Унија и на Шенген зона пресретна 140 илјади мигранти кои доаѓаат од воени зони од Блискиот Исток и Африка.


Српската народна партија бара да се изгради ѕид на границата со Македонија


Белград, 16 август, 2015 - 17:15 (META) 

Српската народна партија (СНП) смета дека Србија треба, по примерот на Унгарија, да подигне ѕид на границата со Македонија, затоа што само така може да се спречи приливот на мигранти.

„Крајно време е да почнеме да се однесуваме како секоја друга земја од западна Европа која на прво место го става својот, а не туѓиот интерес“, се вели во соопштението на СНП.

Од партијата потсетуваат дека според дефинициите на ОН и ЕУ, бегалци се оние кои бегаат од војна, азиланти се лица кои се загрозени во татковината поради своите политички ставови, а мигранти се оние кои се преселуваат во потрага по подобар живот.

„Во Србија немаме официјален став за која категорија луѓе станува збор, освен што секојдневно пристигнуваат алармантни вести од официјални кругови дека до крајот на годинава ќе бидат поднесени 100.000 барања за азил, што нас ќе не чини дополнитилни 150 милиони евра, а во јужниот дел од земјата ќе се гради монтажен град за дури 400.000 азиланти“, се вели во соопштението на партијата.

Според СНП, Собранието на Србија треба да ја спречи можноста мигрант да побара право на азил ако веќе поминал низ сигурна земја, а тоа се Грција и Македонија, а не побарал таму азил.

„Јасно е дека ЕУ сака мигрантите трајно да останат во Србија и затоа само наивен човек може да помисли дека Брисел не го поддржува градењето на ѕидот на границата на Унгарија и Србија“, додаваат од партијата.