!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Поради снежното невреме и студот во САД, починаа најмалку 17 лица


Њујорк, 5 јануари, 2018 - 13:15 (META) 

Најмалку 17 лица починаа од студ, предизвикан од снежното невреме и поларни температури кои зафатија најголем дел од Соединетите Американски Држави. Сите летови од Њујорк и од Њу Џерсу се откажани поради силниот ветер и снежната бура која се најавува. Во Њујорк се очекува да наврнат од 15 до 20 сантиметри снег.

Таканаречената метеоролошка „циклон бомба“ е проследена со силен ветер и обилен снег, денеска го погоди североистокот на САД, поради што се затворени училиштата и државните институции. Покрај обилните врнежи од снег, до крајот на неделата се очекува и голем пад на температурите.

Утрово, околу 65.000 домаќинства и компании останаа без струја, а се очекува дека бројката ќе се зголемува. Вонредна состојба е прогласена и во Флорида, каде што снег заврна по 28 години.


Папата се моли за жителите на филипинскиот остров Минданао


Ватикан, 24 декември, 2017 - 18:04 (META) 

Папата Франциск изјави дека се моли за населението на Минданао, филипинскиот остров кој најмногу настрада од тропската бура и од поплавите.

Во денешното обраќање кон присутните на плоштадот „Свети Петар”, неколку часа пред литургијата за Бадник, папата рече дека бурата предизвикала бројни жртви и големи разурнувања.

Светиот отец истакна дека сака да го увери населението на Минданао дека се моли за него, дека се моли „милостив Бог да ги прифати душите на загинатите и да ги утеши сите, кои страдаат од оваа катастрофа”.

-Да се помолиме за овие луѓе – ги повика тој насобраните на плоштадот.

Во невремето кое го зафати овој филипински остров, загинаа повеќе од 200 луѓе, а околу 160 се водат за исчезнати.


20 лица загинаа во поплавите во Грција


Атина, 19 ноември, 2017 - 17:37 (META) 

Тело на исчезнат маж е пронајдено во близина на автобуската гаража во атинската општина Мандра, со што бројот на загинатите во поплавите што го зафатија грчкиот главен град се зголеми на 20 лица.

Големото невреме, проследено со обилни врнежи од дожд, во петокот ја погоди Атина поради што беа затворени повеќе сообраќајници.

Припадниците на пожарникарската служба досега спасиле 96 лица кои биле заробени во нивните автомобили или куќи.


Расте бројот на жртви од земјотресот во Ирак и Иран


Багдад, 13 ноември, 2017 - 20:56 (META) 

Бројот на жртви во силниот земјотрес кој ја погоди областа на иранско-ирачката граница во иранската провинција Керманшах порасна на 407.

Бројот на повредените во земјотресот со магнитуда од 7,3 степени според Рихтер се искачи на 6.700, соопшти иранската Канцеларија за кризни ситуации.

Според американската геолошка служба, епицентарот на земјотресот е регистриран југозапоадно од градот Халабаџ. Неколку ирански и ирачки градови се без електрична енергија, а од страв од дополнителни потреси над 1.000 луѓе се на улица.

Иранскиот сеизмолошки центар регистрирал повеќе од 50 дополнителни потреси, а се очекуваат уште.


Статистика на МВР: Мажите најмногу вршат семејно насилство, а жените се најчести жртви


Скопје, 9 октомври, 2017 - 13:09 (META) 

Во првите шест месеци од оваа година, полицијата поднела кривични пријави против вкупно 388 лица осомничени за семејно насилство, покажуваат статистичките податоци на Министерството за внатрешни работи.

Од вкупниот број на сторители на ова кривичното дело, според статиските, 94 отсто се мажи. Во најголем број од пријавените случаи или во вкупно 161 случај, насилството било извршено од сопруг, во 84 случаи од син и во 21 случај од татко.

Најранлива категорија во семејното насилство и понатаму се жените, кои во 75 од пријавените случаи биле жртви на насилство. Покрај нив, жртви на семејно насилство се и родителите и децата.

„Според начинот на извршување, најзастапено е физичкото насилство, во дури 323 од случаите, во 17 случаи е пријавено физичко насилство со ладно оружје и во еден случај со употреба на огнено оружје. При семејно насилство, на жртвите во 58 отсто од случаите им се нанесени телесни повреди, а во 39 отсто од случаите се работи за кривично дело загрозување на сигурноста. Најчесто семејните насилства се извршени во состојби на растројство и тоа во 164 од случаите“, стои во соопштението на МВР,

Во првите шест месеци, како што покажуваат статиските на МВР, регистрирано е и едно убиство на сопруга и два обиди за убиство.


Силен земјотрес во Мексико


Мексико Сити, 19 септември, 2017 - 21:33 (META) 

Земјотрес со интензитет од 6,8 степени според Рихтеровата скала е регистриран денеска во централната мексиканска сојузна држава Пуебла, сопшти сеизмолошката агенција на Мексико.

Земјотресот се случува десетина дена по претходниот катастрофален што одзеде повеќе десетици жртви.

Засега нема информации за жртви или предизвикани материјални штети од новиот земјотрес.

Мексиканските медиуми јавија дека земјотресот бил почувствуван и во главниот град Мексико Сити, каде голем број жители во паника ги напуштале своите домови и работни простории.


Трамп: Америка нема да дозволи да биде застрашена


Њујорк, 11 септември, 2017 - 19:53 (META) 

Претседателот на САД, Доналд Трамп, рече дека Америка никогаш нема да го заборави нападот на 11 септември 2001 година и додаде дека нема да дозволи да биде застрашена.

– Ужасот и страдањата од тој тежок ден ни се врежани во сеќавањата засекогаш – изјави американскиот претседател на церемонијата во Пентагон, каде што се урна еден од четирите авиони што ги киднапираа членови на Ал каеда.

Трамп нагласи дека терористите, доколку поведат напад на земјата, „нема да можат да се скријат на земјината топка“.

Во Њујорк илјада луѓе се собраа пред споменикот изграден на местото каде што беа кулите близначки. На церемонијата присуствуваше градоначалникот Бил де Блазио и неговиот претходник Мајкл Блумберг.


Ураганот Ирма ја погоди Куба и оди кон Флорида


Мајами, 9 септември, 2017 - 12:30 (META) 

Ураганот Ирма денеска, откако зајакна до бура од петти степен, сe насочи кон Флорида, оставајќи зад себе уништување и многу загинати луѓе на Карибите. Ирма претходно ја погоди Куба, а во подрачјето на Карибите и на Флорида предизвика можеби најголема евакуација во историјата на тој предел.

Бројката на жртви на Ирма се искачи до 21 лице, откако ураганот го погоди крајбрежјето на Куба со ветрови со максимална брзина од 260 километри на час, соопшти Националниот центар за урагани на САД.

Ирма е на околу 485 километри од Мајами и се движи на запад со околу 20 километри на час. Се очекува ураганот попладнево по локално време да стигне до Флорида.

Властите во Флорида повикаа 5,6 милиони лица, повеќе од една четвртина од населението да се евакуираат пред налетот на Ирма. Гувернерот на Флорида Рик Скот веќе неколку дена ги повикува жителите на државата, особено оние кои живеат во крајбрежните региони. да се евакуираат.

Две нуклеарни централи во Флорида ќе бидат затворени поради Ирма. Компанијата оператор „Флорида пауер енд лајт“ соопшти дека ќе ги затвори централите „Тарки поинт“ и „Сент Луси“ пред ураганот да стигне на копното.

Ирма ги погоди Куба и Бахамите, како и источниот дел на Карипскиот Регион, нанесувајќи катастрофални штети. Биланост на жртвите изнесува 21, но постои можност тој да се зголемува.

Истовремено, ураганот Катја го достигна мексиканското крајбрежје кај градот Теколутла. Бурата е од прва категорија и е проследена со ветрови од 120 километри на час.

Во Атлантскиот Океан ураганот Хозе се зајакна речиси до бура од петта категорија со ветрови со брзина од 250 километри на час. Хозе речиси во чекор го следи ураганот Ирма.


18 жртви на Боко харам во Нигерија


Абуџа, 2 септември, 2017 - 11:00 (META) 

Припадниците на екстремистичката група Боко харам убија 18 лица на североистокот на Нигерија, соопштија нигериските власти.

Нападот е извршен ноќта помеѓу четвртокот и петокот на границата со Камерун, а екстремистите со ножеви ги убивале жртвите.

Нападот го потврди и претставникот на цивилните сили.

Зачестеноста на нападите се зголеми во последните неколку месеци, при што убиени се 172 лица.


Владата го осуди нападот во Барселона и сочувствува со семејствата на жртвите


Скопје, 18 август, 2017 - 11:36 (META) 

Владата на Република Македонија го осуди терористичкиот напад во Барселона и изрази жалење до семејствата на жртвите како и до државите од кои доаѓаат, информираат од влада.

Од владата се надеваат дека, граѓаните на Барселона и туриститите веќе се безбедни.

„Длабоко и искрено сочувствувам со семејствата на жртвите од синоќешниот терористички напад во Барселона. Нашата порака до Шпанија и цела Европа е дека во овој момент кога тагуваме за жртвите, осудата на омразата и насилството мора да биде одлучна и силна. Истовремено мораме да ги зајакнеме заложбите кои промовираат единство и слобода, наспроти поделбите и дискриминацијата“, порача премиерот Зоран Заев.