Бројот на жртви во Џенова се зголеми на 35, 16 лица се повредени, а десетина исчезнати


Џенова, 15 август, 2018 - 10:01 (META) 

Италијанските власти потврдија дека бројот на загинатите при уривањето на надвозникот кај Џенова се искачи на 35, меѓу кои има и три деца, а 16 луѓе се во тешка состојба. Десетина се водат за исчезнати. Во Лигурија денеска ќе биде прогласена вонредна состојба.

Според официјалните соопштенија во моментот на уривањето, на мостот се наоѓале 30 до 35 возила. Дел од нив се уште се наоѓаат под урнатините.

Исто така во уривањето настрадале и неколку куќи, а евакуирани се околу 440 жители од околните згради во непосредна близина на мостот.

Италијанските медиуми пренесувајќи ги изјавите на официјалните лице објавија дека бројот на жртви најверојатно ќе расте. Досега од под уранатините се спасени четири лица кои биле извлечени живи. Министерството за транспорт објави дека ќе го урне и другиот дел од мостот.

– Ваков мост не се урива ни од невреме, ни од молњи, мора да ги пронајдеме виновниците- изјави заменик министерот за транспорт Едоардо Рикси.

Италијанскиот премиер Џузепе Конте го посетил местото на несреќата и за италијанската телевизија РАИ изјави дека е „шокантно да се види урнат мост и жртвите кои спасувачите ги извлекуваат“ и ги пофали стотината спасувачи кои на местото на несреќата ги спасувале луѓето кои паднале од 45 метри висина.

Голем број очевидци изјавија дека непосредно пред несреќата што се случила околу 11.30 часот по локално време, во мостот удрил гром. Тие сведочеа дека уривањето изгледало како апокалиптична сцена.


Бројот на жртви при уривањето на мостот во Џенова се зголеми на 22 лица


Џенова, 14 август, 2018 - 16:40 (META) 

Бројот на жртвите при уривањето на мостот во италијанскиот град Џенова се зголеми на 22 лица. Според италијанскиот заменик- министер за сообраќај, Едоардо Рикси, бројот на жртви ќе продолжи да расте.

– Неприфатливо е толку важен мост да не биде изграден на начин за да се избегне ваков вид на колапс. Се урна централниот дел на надвозникот, а најмалку 20 возила паднале од мостот – изјави Рикси.

Италијанските власти наведуваат дека спасувачките екипи трагаат по преживеаните.

Италјанскиот премиер Џузепе Конте во текот на денот ќе пристигне во Џенова, најавија од неговиот кабинет каде ќе остане и утре.

На местото на несреќата се ангажирани околу 200 пожарникари.


ОН: Материјалната штета од војната во Сирија е 345 милијарди евра


Бејрут, 9 август, 2018 - 10:40 (META) 

Војната во Сирија, која трае повеќе од седум години, предизвикала материјална штета на околу 345 милијарди евра, соопшија Обединетите нации (ОН).

Проценката беше објавена во Бејрут по состанокот на кој учествуваа 50 сириски и меѓународни стручњаци на ОН.

Од таму велат дека за време на војната се уништени различни објекти во вредност од повеќе од 334 милијарди евра. Целиот извештај ќе биде објавен во септември.

Во војната во Сирија од 2011 година настрадале повеќе од 350.000 луѓе, а неколку милиони Сиријци ги напуштиле домовите.


Бројот на загинати во пожарот достигна 76, прогласена тридневна жалост во Грција


Атина, 25 јули, 2018 - 9:40 (META) 

Бројот на жртви во пожарите во областа Атика се искачи на 76, но постои стравување дека ќе биде трицифрен, бидејќи е непозната бројката на исчезнати. Грчката влада вчера прогласи тридневна национална жалост.

Спасувачката акција продолжува со проверка на домовите и становите зафатени од пожарот, за евентуално да се откријат загинати или исчезнати граѓани. Волонтери, организации, граѓани, грчките општини, веќе започнаа хуманитарни акции за помош на настраданите.

Министерството за финансии одвои 20 милиони евра за потребите на општините и граѓаните што беа директно погодени, ќе се отвори специјална банкарска сметка за донации, додека пак за настраданите, предвидени се даночни олеснувања.


Во железничка несреќа во Турција загинаа најмалку 24 лица


Истанбул, 9 јули, 2018 - 12:12 (META) 

Најмалку 24 лица загинаа во железничка несреќа кога воз излета од шините на западот на Турција, соопштија турските власти за новиот биланс на жртвите.

На местото на несреќата која се случи во неделата на границата со Грција, рано утринава беше продолжена операцијата за потрага и спасување.

Патничкиот воз со вкупно 368 лица излета кај селото Сарилар кај Истанбул, на границата со Грција.Околу стотина возила на Итна медицинска помош како и воени хеликоптери се упатиле за помош на повредените патници.

Локалните власти соопштија дека несреќата се случила поради обилните дождови во тој регион.


Ден на жалост во Русија, поради пожарот во Камерово во кој загинаа 64 лица


Москва, 28 март, 2018 - 10:34 (META) 

Во Русија денеска е прогласен ден на жалост, поради жртвите во пожарот во сибирскиот град Камерово, во кој загинаа 64 лица, од кои 41 деца.

Руските знамиња ќе бидат спуштени на половина копје, а културните институции и медиумите ќе прекинат да емитуваат забавни содржини.

Пожарот избувна во неделата на 25 март, во трговскиот центар „Зимска вишна“. За сега причината за пожарот не е позната, а истрагата е во тек. Речиси сите загинати се задушиле од чадот.


Царовска: Потребно е отворање на засолништа за жртви на насилство


Скопје, 7 март, 2018 - 16:15 (META) 

По ратификацијата на Истанбулската конвенција, во Македонија треба да се воспостават 25 засолништа за жртви на насилство, најмалку пет кризни центри за жртви на силување и најмалку три центри за жртви на сексуално насилство. Треба да се отворат и повеќе од 20 центри за кризна интервенција, психолошко советување и бесплатна правна помош.

Според министерката за труд и социјална политика, Мила Царовска, ова треба да придонесе за зголемување на можностите за справување со насилството врз жената.

Таа информираше дека по ратификацијата на Истанбулската конвенција се подготвува Национален оперативен план со имплементација, кој ќе биде објавен наскоро откако ќе биде усвоен од Владата.

Според неа, неопходна е едукација на вработените во центрите за социјална работа, министерствата за здравство и за внатрешни работи и на судиите и на јавните обвинители кои, како што рече, мора да го препознаат насилството и да го санкционираат согласно тежината на стореното дело. Ова, како што потенцира, се клучни промени кои следат за прифаќање на Истанбулската конвенција и интегрирање во нашето општество.

Министерот за здравство, Венко Филипче, информираше дека на Катедрата за семејна медицина на Медицинскиот факултет во Скопје минатата година биле обучени 60 здравствени работници за справување со оваа проблематика, а оти е предвидено овие обуки да продолжат и годинава во соработка со Граѓанската организација „ХЕРА“ и со Фондот за население на ОН.

– Во наредниот период здравствените работници ќе добијат и специјализирани обуки на тема „насилство врз жени“ и „клинички менаџмент на силување“. Министерството за здравство како еден од клучните чинители во оваа сфера подготвува и протокол за обезбедување сеопфатен третман и нега при сексуално насилство – рече Филипче на настанот во организација на Канцеларијата на ОН во Македонија по повод Меѓународниот ден на жените.


Убиени напаѓачите на хотелот во Кабул, пет лица загинати


Кабул, 21 јануари, 2018 - 11:25 (META) 

Нападот на хотелот „Интерконтинентал“ во главниот град на Авганистан, Кабул е завршен, изјави портпаролот на Министерството за внатрешни работи на Авганистан, Надиб Даниш.

Четворицата напаѓачи се убиени, а 153 луѓе биле спасени, вклучувајќи и 41 странец.

По 13 часа судир со напаѓачите од хотелот, загинаа најмалку пет лица, меѓу кои и еден странец а вкупно шест се повредени за време на опсадата, изјавуваат официјални лица. Тројца од жртвите биле припадници на безбедносните сили.

Нападот се случи само неколку денови откако Амбасадата на САД во Кабул предупреди на евентуални напади врз хотели во Кабул.

До сега никој не презеде одговорност за нападот.


Поради снежното невреме и студот во САД, починаа најмалку 17 лица


Њујорк, 5 јануари, 2018 - 13:15 (META) 

Најмалку 17 лица починаа од студ, предизвикан од снежното невреме и поларни температури кои зафатија најголем дел од Соединетите Американски Држави. Сите летови од Њујорк и од Њу Џерсу се откажани поради силниот ветер и снежната бура која се најавува. Во Њујорк се очекува да наврнат од 15 до 20 сантиметри снег.

Таканаречената метеоролошка „циклон бомба“ е проследена со силен ветер и обилен снег, денеска го погоди североистокот на САД, поради што се затворени училиштата и државните институции. Покрај обилните врнежи од снег, до крајот на неделата се очекува и голем пад на температурите.

Утрово, околу 65.000 домаќинства и компании останаа без струја, а се очекува дека бројката ќе се зголемува. Вонредна состојба е прогласена и во Флорида, каде што снег заврна по 28 години.


Папата се моли за жителите на филипинскиот остров Минданао


Ватикан, 24 декември, 2017 - 18:04 (META) 

Папата Франциск изјави дека се моли за населението на Минданао, филипинскиот остров кој најмногу настрада од тропската бура и од поплавите.

Во денешното обраќање кон присутните на плоштадот „Свети Петар”, неколку часа пред литургијата за Бадник, папата рече дека бурата предизвикала бројни жртви и големи разурнувања.

Светиот отец истакна дека сака да го увери населението на Минданао дека се моли за него, дека се моли „милостив Бог да ги прифати душите на загинатите и да ги утеши сите, кои страдаат од оваа катастрофа”.

-Да се помолиме за овие луѓе – ги повика тој насобраните на плоштадот.

Во невремето кое го зафати овој филипински остров, загинаа повеќе од 200 луѓе, а околу 160 се водат за исчезнати.