Од 8.000 до 20.000 евра казни за четири загадувачи во Скопје по вонредните контроли


Скопје, 8 јануари, 2019 - 15:05 (META) 

Во месец декември инспекторите за животна средина на Град Скопје извршиле осум вонредни контроли во индустриски објекти кои се под ингеренции на градот при што биле утврдени пречекорувања на емисиите на штетни гасови кај четири од нив, стои во Информацијата што ја изготви градскиот Инспекторат за активностите на инспекциите поврзани со справувањето со аерозагадувањето.

Загадувачите, чии имиња Градскиот инспекторат не ги објавува додека не заврши целокупната управна постапка, ќе бидат санкционирани согласно Законот за заштита на животната средина и Законот за квалитет на амбиенталниот воздух каде казните се движат од 8.000 до 20.000 евра.

Вонредното мерење на загадувањето се врши во соработка на инспекторите со акредитираната лабораторија за животна средина.

Според првиот човек на Градскиот инспекторат, Мирослав Богдановски, кај сите четири случаи се работи за пречекорувања на емисии на јаглероден моноксид.

Богдановски, одговарајќи на прашањето на „Мета“, најави вакви вонредни, ненајавени контроли на индустриските капацитети на целата територија на Скопје и во наредниов период, при што, како што кажа, веќе се лоцирани поголем број потенцијални загадувачи од индустрискиот сектор во градот.

Освен тоа, инспекторите за животна средина на Град Скопје, во изминативе три месеца извршиле по 2 редовни контроли на сите 40 инсталации кои подлежат на Б–Интегрирана еколошка дозвола.

Според Богдановски, воведувањето на 24-часовните дежурства на инспекциите како и за време на викендите, помогнало попрецизно и пореално да се утврди можното загадување на амбиенталниот воздух согласно дејноста која ја вршат правните субјекти, како и во зависност од технолошкиот процес на производство. Исто така, на адресата на градските инспектори од почетокот на функционирањето на телефонот 193 во трисменски дежурства пристигнале вкупно 38 пријави на граѓани по кои инспекторите веднаш постапиле.

Во декември биле контролирани и градежните локации во централното градско подрачје во другите општини, како и на територијата на Општина Аеродром каде се сконцентрирани поголемиот број од градилишта.

При тоа се контролирани 51 градилиште и врачени се осум казни и записници за перење на гумите, миење на улиците пред градилиштата и покривање на камионите кои излегуваат од градилиштата со церади, стои во извештајот на Градскиот инспекторат. Според извештајот, во периодот октомври-февруари кога има зголемено загадување на воздухот на територијата на Град Скопје се врши секојдневна контрола на градилиштата.


ЕУ ја забранува пластиката за еднократна употреба од 2021 година


Брисел, 19 декември, 2018 - 14:13 (META) 

Стапчиња за уши, чинии од пластика, лажици, вилушки, ножеви, потоа сламки за пиење, лажичиња за мешање пијалоци, вилувчиња за помфрит – сите изработени од пластика – како и чашите и садовите за брза храна од полистирен, од 2021 година ќе бидат забранети во Европската Унија.

Политичкиот договор за оваа забрана денеска го постигнаа Европскиот парламент и Советот на ЕУ, откако Европската комисија на крајот на мај годинава ја презентираше нацрт-директивата за забрана на пластиката за една употреба. Советот на ЕУ на 6 ноември почна преговори со Европскиот Парламент (ЕП) за новата забрана, коишто завршија успешно денеска. Следниот чекор е предлог-директивата да биде прифатена од амбасадорите на членките во ЕУ, по што ќе оди на изгласување во ЕП, а потоа на конечно усвојување во Советот на ЕУ.

Оваа директива е дел од големата Стратегија за пластиката на ЕУ а целта е да се намали количеството исфрлена пластика, од која најголемиот дел завршува во морињата и океаните, наштетувајќи му во огромна мерка на живиот свет таму.

Така, забранети ќе бидат десетте најприсутни пластични работи за една употреба, за кои има поеколошка алтернатива или можност да бидат целосно исфрлени. Освен стапчиња за уши, чинии од пластика, лажици, вилушки, ножеви, потоа сламки за пиење, лажичиња за мешање пијалоци, вилувчиња за помфрит – сите изработени од пластика – како и чашите и садовите за брза храна од полистирен, ќе бидат забранети и сите нешта изработени од охо-пластика и цевчињата за балони.

Еврокомесарката за животна средина, морски прашања и рибарски басени Кармену Вела рече дека со денеска постигнатиот договор меѓу ЕУ и ЕП е направен огромен чекор напред.

– Кога имаме ситуација една година дома во пластична кеса да донесеш риба, а следната година да ја донесеш истата кеса во риба, мора да работиме напорно и брзо. Среќна сум со денешниот договор меѓу Парламентот и Советот, направивме голем исчекор кон намалување на количеството на пластика за една употреба во нашата економија, нашиот океан,  и на крајот и во нашите тела – рече Вела.


Град Скопје подготвува елаборати за загадувањето на воздухот – за догодина


Скопје, 17 декември, 2018 - 13:37 (META) 

Двете испитувања на загадувањето на амбиенталниот воздух од возилата и од греењето на домаќинствата, предвидени во Програмата за животна средина за 2018 година во Скопје, од кои треба да произлезат конкретни мерки за намалување на загадувањето, ќе бидат завршени следната година, информираат од Град Скопје.

„Испитувањата, реализирани во соработка со „Фармахем“ и со Универзитетот „Гоце Делчев“ од Штип се во тек и се реализираат во фази. Досега е завршена првата (есенска) од предвидените четири фази, а преостанатите три ќе бидат реализирани во текот на следната година, по што ќе биде изработен и финален елаборат“, се вели во информацијата.

Испитувањата се вршат долж булеварот Илинден како пофреквентна сообраќајница и на улицата Аминта трети во близина на Министерството за земјоделство, како помалку фреквентна сообраќајница.

Во Програмата за животната средина за 2018 година стои дека првите испитувања биле направени во 2016/2017 година и дека за оваа година ќе се изврши семплирање и испитување на органски соединенија, тешки метали, азотни оксиди, сулфур двооксид, ПМ-10 и ПМ-2,5 на две крстосници во градот во текот на една година, нивна анализа во лабораторија, но и дека финалниот елаборат било предвидено да биде изработен годинава, за што биле одвоени три милиони денари од градскиот буџет.

Во Програмата за животна средина на Град Скопје за 2018 е наведено и дека во текот на грејната сезона 2016/2017 година биле извршени мерења на три различни локации во градот, две каде е доминантно греење со огревни дрва и една каде е доминантно греењето преку топлификациониот систем на Градот Скопје, но за да се потврдат заклучоците до кои е дојдено, потребно е да се направат дополнителни мерења во следната грејна сезона.

Ова испитување на амбиенталниот воздух преку семплирање на ПМ-10 и анализа на левоглукосанот во нивниот состав е започнато во 2018 година, според податоците добиени од информативната служба на Градот, се одвива според планираната динамика. Досега се собрани податоци за периодите лето и есен, а во наредниот период ќе се собираат податоци за зима и пролет, по што ќе има една временска целина која ќе биде предмет на компарации и анализи, се вели во информацијата од Град Скопје.

Градот соопшти дека за 2019 година е планирано е зголемување  на буџетот за заштита на животна средина, односно планирани 186 милиони денари, што претставува речиси 32 проценти во однос на буџетот за 2018 година во кој за овој сектор биле предвидени 141 милиони денари.


Владата го усвои буџетот за 2019, дополнет со амандмани за повеќе пари за животна средина


Скопје, 14 декември, 2018 - 12:41 (META) 

Владата на денешната 109. седница, го усвои дополнетиот предлог – буџет за 2019 година, усогласен соодветно на амандманите што произлегоа од комисиската расправа за буџетот во Собранието.

„Согласно амандманите кои дојдоа од владејачкото мнозинство и од опозицијата во собраниската амандманска расправа, во предлог-буџетот за 2019 година се направени дополнувања на буџетски износи во програмите за заштита на животната средина, со фокус на мерките за почист воздух, на локалната инфраструктура и на програмите за развој на планските региони, како и на зголемување на буџетската поддршка за работата на дел од министерствата, агенциите, управите и други органи на државната управа“, се вели во соопштението од Влада.

Соодветни интервенции по собраниската амандманска расправа за дополнителни буџетски износи се направени и за дел програмите на Универзитетот „Св. Кирил и Методиј“.

„На денешната седница на владата се утврдени и насоките за нивелирање на платите во културата за што активностите треба да започнат од јануари 2019 година, согласно буџетската динамика во претстојната година“, се додава во соопштението.

Вкупните приходи на буџетт за 2019 година се планираат на ниво од 210,8 милијарди денари, а расходите се планирани на ниво од 228,5 милијарди денари. Вака планираните приходи и расходи резултираат со намалување на буџетскиот дефицит на ниво од 2,5 проценти од БДП или 17,7 милијарди денари во апсолутен износ.

Планираниот дефицит е во согласност со Фискалната стратегија на Македонија 2019-2021, која на денешната седница на Владата беше усвоена како информација и која заедно со конечниот дополнет предлог за буџет за 2019 година, ќе се испрати на усвојување во Собранието.


ВМРО-ДПМНЕ: Власта не даде ниту денар за подобар квалитет на воздухот


Скопје, 11 декември, 2018 - 9:38 (META) 

СДСМ потроши седум милијарди евра, пари на граѓаните, без да вложи денар за намалување на аерозагадувањето, а сега безобразно и без срам бара донации од бизнисмените за борба против загадувањето на воздухот, порачува ВМРО-ДПМНЕ.

„СДСМ нема план како да ја извади државата од црнилото во кое ја потона. Скопје со денови е најзагаден град во Европа и помеѓу десетте најзагадени во светот. Во европскиот врв на најзагадени градови се и Битола и Тетово, ништо почист не е воздухот ниту во Струмица, Кочани и Тетово. Едноставно кажано Македонија се гуши, а власта не презема ништо, ниту денар од 7 милијарди евра буџет од две последователни години не е инвестиран во подобрување на квалитетот на воздухот, па сега наместо мерки и проекти, власта бара донации од бизнисмените, кои веќе еднаш дале пари во буџетот преку даноците, пари од кои дел требало да завршат и за подобрување на квалитетот на воздухот“, порачува најголемата опозициска партија.
ВМРО-ДПМНЕ предлага четири мерки за подобрување на состојбата со амбиенталниот воздух.

„1. Во услови на загаденост над Мерните дозволени концентрации, во тек над 7 последователни дена, да се овозможи бесплатен градски превоз додека трае загадувањето.
2. Инспекциските служби, како на државно, така и на локално ниво, да работат во зимски услови 24 часа и јавно, секој ден со име и презиме, да ги обзнанат најголемите загадувачи и, согласно тоа, мерките кои ги презеле.
3. Да се чистат сите диви депонии, особено да се инспектираат секојдневно оние локации каде што се пали отпадот со намера и да се изречат казнени мерки.
4. Да се овозможи целосна бесплатна здравствена заштита на граѓаните, посебно на децата и хронично болните, за кои е констатирано дека причината е загадувањето“, се вели во соопштението од партијата.


Шилегов: Сега ми се потсмеваат, но „зелените“ мерки ќе донесат резултати


Скопје, 27 ноември, 2018 - 12:46 (META) 

Свесен сум дека сум предмет на потсмев поради поднесената кандидатура на Скопје за Европска зелена престолнина, но уверен сум дека мерките кои ги предвидовме и на кои посветено ќе работиме, ќе донесат резултати. Самото прифаќање на кандидатурата на Град Скопје, која ја ветив во мојата изборна програма, е признание дека нашата стратегија е добра, порача градоначалникот на Скопје, Петре Шилегов, на работилницата „Главните градови соочени со проблемите поврзани со животната средина” што денеска се одржува во ЕУ Инфо  центарот во Скопје, во организација на Францускиот институт од Париз.

– Да имавме порано вакви стратегии, ќе немавме ваква животна средина – истакна Шилегов.

Набројувајќи ги досега преземените мерки за унапредување на состојбата со амбиенталниот воздух, тој го наведе засилениот мониторинг на загадувачите, кој, според него, веќе ги дава првите резулати, како и подигањата на зелени површини во градот и обновувањето на досегашните, обележувањата на возилата со налепници, субвенции за граѓаните за купување печки на пелети, за електрични возила, за чистење оџаци како и обезбедените пари за купување 40 автобуси на гас.

DSC_0039

Како среднорочна мерка за справување со аерозагадувањето во Скопје, Шилегов го наведе преземањето на топловодната мрежа.

– Сите студии досега покажаа дека загревањето на домаќинствата со цврсти горива е главниот предизвикувач на загадувањето на воздухот со ПМ честички, а во моментов дури 70.000 домаќинства во Скопје се надвор од градската топловодна мрежа – рече Шилегов, најавувајќи дека наскоро ќе бидат овозможени подобри услови грѓаните да бидат вратени на парно греење.

– Покажувањето со прст кон индустријата како главен загадувач е дефокусирање од проблемот – рече Шилегов.

Борбата со аерозагадувањето стана програма на Владата, истакна заменик-министерот за животна средина Јани Макрадули во своето излагање на семинарот.

– За аерозагадувањето на Скопје, доминантен  проблем е греењето. Загадуваат домаќинствата со мокри дрва, со горење пластика, моторни масла, но често немаат друг избор. Ние мора да им понудиме алтернатива – рече Макрадули.

Според него, во 2018 година се регистрира намалување на загадувањето во однос на претходните години, што наводно се должи на тоа што се чисти повеќе и што се зголемени контролите. Истовремено, порача Макрадули, социјалната состојба на одредени семејства не смее да се користи за собирање политички поени.

Претставувајќи ја стратегијата на владата за чист воздух, Макрадули истакна дека за нејзината реализација Владата веќе има поддршка од неколку меѓународни институции.


O2: Справувањето со загадувањето да се вклучи во буџетот – или оставка!


Скопје, 13 ноември, 2018 - 9:38 (META) 

Во предлог-буџетот за следната година во ниту едно место не се споменува заштитата на животната средина и намалување на загадувањето. Тоа потврдува дека овој проблем е небитен за Владата, порача Иницијативата О2.

„Комплетниот дебакл што оваа Влада го доживеа во однос на справување со загадувањето и заштита на природата, овој предлог-буџет само го констатира. После година и пол од формирање, две години од изборите, оваа Влада комплетно потфрли и не го спроведе она што го вети во областа на животна средина. Како итни реформски приоритети во првите 6 месеци, требаше  да се воспостави Фонд за животна средина, во кој директно ќе се слеваат средствата добиени од такси за животна средина. Секој таков денар требаше да се намени исклучиво за проекти за подобрување на квалитетот на животната средина“, порачува иницијативата.

Еко-активистите велат дека на врв на сè, со ребалансот на буџетот за годинава се скратени над два милиони евра за заштита на животна средина.

„А се гушиме во загадување, мониторинг станици не работат, инспектори нема доволно, нема опрема за мерење, нема акредитирани лаборатории, нема доволно и адекватни субвенции за премин на домаќинствата во загревање кое нема да загадува, нема соодветен јавен транспорт што би ја намалил употребата на возила, законите стојат во место, правилници и уредби не се носат, …. и ова е само во областа на аерозагадувањето. Тонеме“, велат од Иницијатива О2.

Иницијативата бара итно да се измени буџетот за следната година и во владината програма „Унапредување на животната средина“ да се внесе посебна потпрограма  „Справување со аерозагадувањето“ или во спротивно Владата да поднесе оставка.


Властите во Тетово не казниле никого за фрлање градежен шут


Тетово, 25 октомври, 2018 - 11:36 (META) 

Тетовските власти во текот на изминатите девет месеци не казниле ниту едно лице за фрлање градежен шут. Според податоците обезбедени од „Порталб.мк, во последните девет месеци, во полошкиот регион полицијата има казнето вкупно 24 лица за фрлање отпадоци според членот 14 од Законот за јавна хигиена, кои вклучуваат фрлање на догорчиња од цигари, гуми за џвакање и други отпадоци, но не казнила ниту едно лице за фрлање отпадоци според членот 14-а, односно фрлање градежен шут.

– Во текот на минатите девет месеци годинава, припадници на Секторот за внатрешни работи (СВР) – Тетово имаат изречено 24 казни за прекршување на законот за јавна чистота. Додека што се однесува до членот 14-а од законот за јавна чистота, не сопреле или пак санкционирале ниту едно лице во врска со отпадоци и испуштање на фекална канализација – вели Марјан Јосифовски, портпарол на СВР Тетово.

Од Општина Тетово, за „Порталб“, потврдуваат дека од август 2018 досега, општинскиот инспекторат санкционирал 10 претпријатија за загадување на животната средина, но ниту една од овие казни не се однесува на фрлање на градежен шут или отпадоци во поголеми количини.

Инаку, Општина Тетово нема депонија за тврди материјали и поради тоа градежните отпадоци се фрлаат по јавни површини. Властите треба да се потрудат што поскоро да ги исполнат ветувањата, со што ќе се спречи хаосот со неконтролираното фрлање на овој вид отпадоци.

Според законот, физичките лица кои ќе бидат фатени како фрлаат градежни отпадоци се казнуваат со глоба во износ од 150 до 200 евра, а правните лица со по 4.000 евра.

Преку апликацијата  „E-репорт“ граѓаните можат да известат за несовесно поведение на физички и правни лица кои со нивни постапки ја загадуваат животната средина.


Увозот на стари возила двојно поголем поради стравот од нови прописи (инфографик)


Скопје, 10 октомври, 2018 - 16:01 (META) 

Драстично зголемен, во некои моменти и двапати поголем, бил увозот на користени возила во првите седум месеци од годинава во однос на истиот период во 2017 година, а ова количество на увезени стари автомобили, автобуси и товарни возила од јануари до јули годинава е многу блиску до количеството увезени возила во целата мината година. Тоа го покажуваат бројките објавени на веб-страницата на Царинската управа.

Според Ана Чоловиќ – Лешоска, директорка на „Еко-свест“, тоа најверојатно се должи на стравувањето на поединците и фирмите што печалат од продажбата на стари возила од неодамна најавените заострувања на бариерите за увоз, односно забрана за увоз на постарите возила со еуро 4 и еуро 5 стандард.

Одредени измени за намалување на загадувањето се веќе изготвени, и тие треба да придонесат за намалување на загадувањето.

– Новите норми за кои една година наназад се дискутираше во владината Интерсекторска работна група за справување со аерозагадувањето, во која учествувам и јас како претставник на еколошките организации, како што беше известено, наскоро ќе бидат потпишани од министерот за економија. Со нов правилник, возилата според степенот на емисии кој го покажуваат при техничкиот преглед ќе добијат категоризација со боја, односно лепенка во боја и ќе се воведе систем за сообраќајно зонирање во Скопје. При енормно загадување на пример, во зелена зона ќе може да возат само возила со зелена налепница, односно со највисок стандард и најниски емисии – објаснува таа.

Бројките што ги објави Царинската управа за увезени автомобили од јануари заклучно со јули годинава говорат оти биле увезени 16.734 употребувани автомобили, наспроти 3.562 нови. Во истиот период, увезени се 1.386 товарни моторни возила наспроти 459 нови и само три нови автобуси наместо 108 купени во странство на старо.

Во цела пак 2017 година во земјава се увезени 22.964 користени автомобили, 2.135 товарни возила и 140 стари автобуси.

Како што вели директорката на „Еко-свест“, иако донекаде може да се има разбирање за мерката да се дозволи увоз на стари автомобили за да се овозможи личен комфор и обнова на возниот парк на граѓаните, таа е дел од лошите стратегиски одлуки во врска со превозот што се донесувани во изминатите три децении.

– Од една страна, јас го разбирам моментот секому да му се дозволи да има комфор. Но тоа е многу комплексно прашање, оти дали со тоа што ние овозможуваме комфор на некои граѓани, не го влошуваме останатиот „комфор“ на живеење во почиста средина на сите граѓани. И дали сите тие луѓе што купија стари возила не можеа пред тој момент да прераснат во критична маса и да побараат да се уреди јавниот сообраќај, за да може сите да имаат културен, економичен, достапен, навремен, јавен сообраќај?  Но, политиката на популизам отиде во друга насока. а јавниот сообраќај се доведе во страшно лоша ситуација – заклучува Ана Чоловиќ – Лешоска.

Во борбата со загадувањето на воздухот, Албанија е во финалната фаза на забранување увоз на возила кои не ги исполнуваат еуро 5 стандардите, односно возила што се постари од 10 години. Во Македонија последното ограничување стапи на сила на 1 јули 2016 година, кога беше забранет увозот на возила со еуро 3 стандардот, така што земјава со дозволата за увоз на возила со еуро 4 каска зад Албанија.

Пишува: Сашо Спасоски


Трасата на гасоводот на Водно останува, но изменета и скратена


Скопје, 22 август, 2018 - 11:10 (META) 

Во соработката со екологистите постигнавме компромис за максимално да ги намалиме штетите на животната средина од изградбата на магистралниот гасовод на Водно, трасата е скратена и со тоа за 70 отсто се намалува опфатот на природата што ќе биде засегната, а појасот по кој ќе се гради е намален од 25 на 10 метри и за тоа ќе се исечат 2 хектари, оносно онолку дрва колку што во еден дел се трошат за загревање во Скопје, порачаа на прес-конференција во Владата денеска скопскиот градоначалник Петре Шилегов, министерот за транспорт и врски Горан Сугарески, заменик-министерот за животна средина Јани Макрадули и директорот на АД Македонски енергетски ресурси (МЕР), Бајрам Реџепи.

На прес-конференцијата беше посочено дека поради повеќе причини е невозможно да се напушти трасата преку Водно, а за возврат на тоа, гасоводот да оди од северната страна на Водно, односно делумно по Скопска Црна Гора.

Макрадули на почетокот на прес-конференцијата, истакнувајќи ги придобивките од користењето на гас како енергенс за затоплување во светски рамки, рече дека овој гасовод и севкупната гасификација ќе придонесат многу за поздрава животна средина не само во Скопје, туку и во Тетово и Гостивар.

– Министерството за животна средина не го дава Водно за стихијно градење, туку за плански стратешки проект како што е гасификацијата. Анализите од Европа покажуваат дека со користење гас, ПМ честичките во воздухот се намалиле за 31%. Во Скопје, доколку не промениме ништо, честичките ПМ 10 и ПМ 2,5 во 2023 година ќе се зголемат за 31% во однос на 2015. А ако преземеме мерки, како што е гасификацијата, ќе се намалат за 70% – рече тој, посочувајќи дека е направена студија и дека министерството постојано ќе ги следи градежните активности.

За изменетиот проект по кој ќе продолжи изградбата на гасоводот, министерот за транспорт и врски, Горан Сугарески, порача дека Владата го слушнала гласот на екологистите и затоа се направени промени, кои ќе значат многу за природата.

– И ние не го даваме Водно, тоа е заедничко богатство и нема да дозволиме на кој било начин да ја загрозиме животната средина и да наштетиме на природата. Го слушнавме вашиот глас, гласот на граѓаните и екологистите, и направивиме промени на проектната документација. МЕР изработи нова траса со која се намали опфатот на дрвна маса што ќе треба да се исече – од 3.000 кубни метри на 1.400 кубни метри. Трасата се намалува од 25 на 10 метри широчина, и со тоа ќе бидат засегнати само 0,07% од вкупната шума на Водно – рече Сугарески.

Бајрам Реџепи, директорот на МЕР известувајќи за трите гасоводни делници, рече дека од Штип до Неготино, потег долг 36 километри се завршени 90 отсто од градежните работи и се очекува да завршат до крајот на годинава, а на гасоводните делници  Неготино – Битола (92 километри) и Скопје – Тетово – Гостивар (76 километри + 10 километри за кракот за Тетово) се завршени 25 отсто од работите и се очекува да бидат пуштени во функција во 2020 година.

– Низ Водно ќе минат 9 километри, ќе се вгради подземна гасоводна цевка, потоа теренот ќе се враќа во првобитна положба, ќе се прави рекултивација и по неколку месеци нема да се познава каде е копано. МЕР веќе плати на Град Скопје за рекултивацијата – рече Бајрами, појаснувајќи дека ако се послуша барањето на екологистите на гасоводот, работите ќе се одложат за цели пет години.

– Барањето на невладините е бескомпромисно и тие бараат траса на Скопска Црна Гора. Тоа во оваа фаза е невозможно. Тоа нема да биде подобро решение од еколошки аспект од сегашното, оти и таму ќе се сече повеќе шума, ќе поминува низ ерозивен терен, што не е препорачливо за гасовод. Исто така, ќе треба да минува низ густо населени места и да се вкрстува со главниот извор на водоснабдување на Скопје, што е недозволиво – рече директорот на МЕР.

Скопскиот градоначалник Петре Шилегов порача дека Скопје не е изолиран остров и „затоа немаме право да стоиме на патот на гасификација на Тетово, Гостивар и Кичево.

– Но Скопје не може да биде жртва, затоа во преговори со Влада обезбедивме Скопје да добие  од МЕР 43 милиони денари за рекултивација на теренот на Водно. Потоа, пошумување на Скопска Црна Гора со еден милион евра од Министерството за одбрана за да спречиме нови поплави и да ја подобриме животната средина. Добивме и владина поддршка за зелени коридори по реките Лепенец и Серава, како и пари за заштита на Водно и кањонот Матка. Обезбедивме и мерка да се постават филтри на оџаците на пет големи институции во Скопје – се пофали Шилегов.

Тој рече дека ова е првпат „некој да чепка на Водно, а да се обезбеди ревитализација потоа“ и повтори дека трасата е скратена за 4 километри, а широчината од 25 на 10 метри.

– Ова е доказ дека кога има одговорна власт што ги слуша граѓаните е можна промена. Да потсетам, трасата е проектирана во 2015 година, а градежна дозвола е издадена во декември 2016 година, во претходната власт – рече Шилегов.