Жителите на Штука порачуваат: Ако го отворат рудникот Иловица, за нас тука нема живот


Струмица, 25 октомври, 2018 - 16:23 (META) 

Пладне е. Пред селскиот дуќан во Штука, под падините на Огражден, насобрани петнаесетина, главно средовечни и постари луѓе. Помладите се на работа, на училиште, ги има и доста на печалба. Ова е уште еден од собирите на кои главна, всушност единствена тема на муабет е рудникот Иловица, кој го носи името на соседното село, иако е целосно во атарот на село Штука, како што објаснуваат.

Населението се занимава со земјоделие, произведуваат тутун, велат, порано биле рекордери во квалитет на тутунот, пиперот, посебно феферонки, домати. Сиромаштија е, додаваат, денес тешко се обработува земјата, ако не собере печурки од планина за да ги продаде, човек нема пари да си ги заврши полските работи.

„Плодовите од планината, тутунот и градинарството, досега не прехрануваа бидејќи беа чисти, квалитетни и затоа барани. Ама со рудникот, кој ќе ги купува нашите производи во иднина?“, прашуваат жителите.

Со рудникот, за нас ќе биде пропаст!

Жителите не знаат точно кога првпат слушнале за рудникот, но знаат дека во нивниот крај од дамнешни времиња копале по злато, не успевајќи да го најдат. Едни велат пред десетина години имало најави по весници и телевизии дека во нивниот крај имало злато и на бакар и дека во иднина ќе се отвори некаков рудник, но ништо прецизно.

„Кога дојдоа од „Еуромакс Рисорсис“, ни кажуваа дека извадената руда по пруга ќе се носи во Бучим на обработка.Тоа не ни се виде толку опасно, а и ние тука немаме познавања од рударството и немавме забелешки. Потоа ни кажаа дека рудата ќе се носи со камиони во Бугарија. И тоа некако го проголтавме. Но, откако ги видовме студиите стана јасно дека рудата е на 600 метри длабочина, рудникот го планираат од кај Иловичка река, брана ќе се прави на Штучката река, а меѓу двете реки, на месноста Кравичево ќе биде фабриката за дробење, перење, чистење на рудата и дека на лице место ќе се прави рудниот концентрат кој понатаму ќе се носи надвор.

Ние имаме сознанија дека, освен бакар и злато, во рудата во одреден процент има и плутониум. Замислете што ќе значи за подземните води кога ќе почне дупчењето, минирањето, потресите, вадењето на рудата во која има и отрови и опасни елементи, и сето тоа ќе се испира тука. Велат, браната нема да дозволи тие води да дојдат до селото. Ние не сме учени ама имаме здрав разум-еднаш кога ќе ја отворат планината и ќе почнат да се таложат отровите, назад нема, ќе биде пропаст!“, раскажува Иљо Малинов, кого го уважуваат во овој крај како борец против отворањето на рудникот.

Селаните велат дека браната полна со отровен талог буквално ќе им биде над главите, на 500 метри од нивните куќи.

„Во светот многу пониски брани со рудна јаловина попуштале и предизвикувале ужасни катастофи, потопувајќи населби, убивајќи луѓе и уништувајќи се пред себе. Во 1934 година имало катастрофален порој во Штука со однесени куќи и жртви, селото уште ја памети таа трагедија. Ние две илјади жители тука, сме први на удар, под нас се селото Сушица со 2.000 жители и целото струмичко поле. Браната е закана за здравјето и за безбедноста, а каде се отровите во почвата и во водите, каде е прашината, бучавата, експлозиите, стотиците камиони кои деноноќно ќе возат низ селото? Нема живот за нас ако се отвори рудникот Иловица!“, во глас извикуваат селаните со кои разговаравме, во обид да објаснат колкава опасност е идната брана и јаловиштето.

Злато и отрови од земјината утроба

Откако дознавме што точно ќе се прави, не можеме да седиме мирни, велат тие, додавајќи дека и во Иловица се со истото мислење.

„Малкумина наседнаа на прикаските на „Еуромакс Рисорсис“ дека нема да се користи цијанид и сулфурна киселина и, бидејќи се надеваат на работа во рудникот, сега наоколу зборат дека треба да се отвори рудникот, ама тие се едно комбе луѓе, си ги знаеме кои се. Еве, ги чекаме тука, нека дојдат и нека кажат тие што имаат да кажат“, велат жителите.

Тие објаснуваат дека недалеку од планираната локација на рудникот се наоѓа месноста Ѓупка каде пред околу стотина години биле правени бушотини.

„И ден денес околу бушотините, нема живот, сета вегетација е уништена. Еден мештанин, тврдејќи дека земјата од бушотините може да биде корисна, ја посипал по својата нива, за да го уништи метилот. И денес на таа нива ни тревка не расте ниту пак стока поминува. Е, до толку е отровна почвата извадена од утробата на земјата!

Пред околу три години, дојдоа да направат бушотини во ридот каде што го спремаат рудникот. Извадената земја од бушотините стоеше расфрлана околу местото каде се работеше… заврна еден силен дожд, калта се разлеа наоколу и навлезе во акумулација од која се снабдува селото со вода за пиење. Кусо по дождот сите риби во акумулацијата беа мртви! Кога ги прашавме од Министерството од што умреа рибите, ни одговорија – немале кислород, мал бил водостојот па затоа се удавиле. Е, па, сега е уште помал водостојот, а на рибите ништо не им фали“, раскажуваат жителите за „Мета“.

Има ли поголем рудник за злато од оваа наша плодна почва?

Како друга опасност која што ја посочуваат е дека од акумулацијата сите жители пијат вода. Најмногу се секираат за децата.

„Или ние можеме и да изумреме, важно рудникот да го отворат!“ довикнува налутено еден од жителите.

„Никој не ни гарантира дека отровите нема да навлезат во подземните води од кои сега пиеме вода, со која ги наводнуваме нашите ниви, ја поиме стоката. Ако се загадат, ќе мора да си одиме сите одовде. Но, каде?“, прашува Атанас Иванов, придружуван на собирот од својот син, основец.

„Имам три сина, имам куќа, убав живот во селото, и нивната иднина ја гледав тука, во Штука. Но, ако се отвори рудникот, за нас тука ќе нема живот. Зарем да си ги трујам моите чеда?“, додава тој.

Аргир Георгиев вели дека произведува зелка и ги прашува тие кои одлучуваат за рудникот, дали има поголем рудник на злато од оваа плодна почва?

„Утре, кога со мојот камион ќе донесам зелка на пазар во Скопје, ќе ме прашаат муштериите од каде ми е стоката. Од кај рудникот Иловица? Не фала, ќе кажат. И како да им се лутам кога знам каков загадувач ќе биде рудникот. Има ли поголема вредност од здрава, чиста и квалитетна храна, по која отсекогаш не познавале нас од струмичките села? Зошто да се уништи нешто што со векови постоело и ќе постои, за нешто што ќе работи една-две децении и потоа ќе се затвори, оставајќи зад себе пустош?“, вели Георгиев.


Ѓорчев, „благо речено“, излажа за бројот на иселени од Бугарија, Романија и Латвија по влезот во ЕУ (инфографик)


Скопје, 16 октомври, 2018 - 14:35 (META) 

Пратеникот од ВМРО-ДПМНЕ, Влатко Ѓорчев вчера во реплика во Собранието за време на седницата за уставни измени наведе неколку бројки со кои тврдеше дека три земји откако влегле во Европска Унија драстично им се намалил бројот на жители. Но, бројките му се погрешни.

– Да бидеме искрени, апсолутно докажлива манипулација е и невистина да се каже дека ако нам ни успеат евроатлантските интеграции ќе го сопреме иселувањето од Македонија. Ако се случат евроатлантските интеграции, тоа ќе помогне на безбедноста, на економијата, на инвестициите и на се останато, но погледнете ја Бугарија, изгубија 2,1 милиони жители. Романија од 23 милиони, на 19 милиони. Латвија од 2,4 милиони на 1,9 милиони… Апсолутно, благо речено невистина е дека евроатлантските интеграции ќе значи останување на младите генерации во Македонија. Тоа заеднички го посакуваме, но ако говорите афирмативно за договорот, не го користете тој аргумент затоа што апсолутно се оди кон емоциите на луѓето „гласајте за ова за децата да ви останат дома“ – вели Ѓорчев.

Податоците од Светска банка за бројот на населението во Бугарија, Романија и Латвија велат дека Влатко Ѓорчев – не ја кажува вистината.

Бугарија и Романија и се придружија на Европската Унија во 2007 година. Во 2007 година Бугарија имала 7.545.338, а во 2017 имала 7.075.991 жители. Тоа е намалување за 469.347 жители откако Бугарија влегла во ЕУ, што е далеку помалку од 2,1 милиони како што тврди Ѓорчев во Собрание. Всушност Бугарија никогаш немала 2,1 милиони жители повеќе од сега. Најмногу жители имала во 1988 година односно 8.981.446 жители.

Романија во 2007 година имала 20.882.982 жители, а во 2017 година според Светска банка избројани се 19.586.539 што значи намалување за 1.296.443 жители. Ѓорчев вчера рече дека во Романија од 23 милиони се намалиле на 19. Романија последен пат имала 23 милиони жители во 1991 година односно 23.001.155.

Латвија стана членка на ЕУ во 2004 година. Тогаш имала 2.263.122 жители, а во 2017 1.940.749 што е намалување за 322.373 жители. Бројката од 2,4 милиони жители што ја земал Ѓорчев за споредба е од 1998 година  кога Латвија имала 2.410.019 жители по што бројот почнал да опаѓа.


Во ЕУ ќе бидеме меѓу најсиромашните, најневработените и најкратковечните жители


Скопје, 14 септември, 2018 - 11:18 (META) 

Сите досегашни истражувања на јавното мислење покажуваат дека мнозинство македонски граѓани поддржуваат зачленување на Македонија во Европската Унија, а меѓу главните очекувања од евроинтеграциите се намалување на невработеноста и сиромаштијата и подобрувањето на квалитетот на живеење.

Ваквите очекувања се логични ако се земат предвид податоците за стапката на вработеност, очекувањата за траење на животот и бруто домашниот производ по жител според паритетот на куповната моќ во Македонија и земјите од ЕУ, кои откриваат дека нашата земја е на дното на листата земји рангирани по овие критериуми. Со оглед на тоа што граѓаните на рефрендумот закажан на 30 септември треба да одлучат дали ќе прифатат промена на името и зачленување на земјава во ЕУ и НАТО тие би требало да имаат слика за тоа како би изгледала Македонија во друштво на европските земји.

МК-ЕУ11a

 

Со стапка на вработеност од 70,3 отсто кај лицата на возраст од 20 до 64 години Македонија би била на претпоследното место во ЕУ по овој критериум веднаш зад Италија каде што стапката на вработеност изнесува 70,1 отсто. Со просечен животен век кај жените од 77,5 години и кај мажите од 73,4 години македонските граѓани би биле меѓу најкратковечните жители на ЕУ. Со БДП по жител според праритетот на куповната моќ кој во Македонија изнесува само 37 отсто од европскиот просек, македонските граѓани дефинитивно би биле најсиромашните жители на ЕУ.


Евростат: Македонија има 2.075.300 жители


Скопје, 27 јули, 2018 - 13:53 (META) 

Статистичката канцеларија на ЕУ, Евростат, соопшти дека според нејзиното истражување, Македонија во јануари 2018 година имала 2.075.300 жители, наспроти 2.073.700 во истиот период лани.

Македонија не спровела попис на населението од 2001 година, а директорот на Државниот завод за статистика Апостол Симовски неодамна најави дека новиот попис на населението ќе се спроведе за две години, односно во 2020 година од 1 до 21 април.

Според Евростат, проценката е дека Европската унија во јануари 2018 година броела 512,6 милиони жители. Зголемувањето на популацијата од 1,1 милиони жители во однос на истиот период лани се должи на миграцијата, бидејќи е забележан поголем број на починати лица од новородени.

Германија е најнаселена земја во ЕУ со 82,9 милиони жители. Следат Франција со 67,2 милиони, Велика Британија со 66,2 милиони жители, Италија 60,5 милиони, Шпанија 47,7 милиони и Полска со 38 милиони жители.


Во Валандово утре ќе се одржи референдум за рудникот Казандол


Валандово, 19 август, 2017 - 12:17 (META) 

Во Валандово утре ќе се одржи референдум на кој жителите од оваа општина треба да се изјаснат дали се „за“ или „против“ продолжување или стопирање на работата на рударскиот комплекс Казандол, но и дали да се отворат или не нови рудници за метални минерални суровини.

За референдумот да биде успешен, утре треба да излезат најмалку 5.200 граѓани со право на глас.

Валандово е четвртиот град каде што ќе се одржи референдум. Жителите на Гевгелија, Богданци и Дојран веќе се изјаснија против отворање рудници.


Во Дојран утре ќе се одржи референдум за рудниците Казандол и Башибоз


Дојран, 22 јули, 2017 - 12:12 (META) 

Дојранчани утре ќе излезат на референдум на кој ќе гласаат дали се „за“ или „против“ отворање рудници на територијата на нивната општина.

Тие стравуваат дека рудникот Казандол, но и потенцијалното отворање на Башибоз на планината Беласица, се еколошка закана по земјоделството, туризмот и за Дојранско Езеро.

Досега, референдуми се одржаа во Гевгелија и во Богданци, каде што жителите се изјаснија против отворање рудници, а референдум ќе се одржи и во Валандово на 20 август.


На референдумот во Богданци граѓаните гласаа против работата на рудникот Казандол


Гевгелија, 11 јуни, 2017 - 21:44 (META) 

Повеќе од 98 проценти од граѓаните што гласале на референдумот во Општина Богданци, се изјасниле против работата на рудникот Казандол и против отворање други рудници на територијата на нивната општина.

Излезноста на реферндумот била 61 проценти од гласачите.

На референдум за рудникот Казандол ќе излезат и жителите на Дојран на 18 јуни, а постапка за организирање референдум во тек е и во Валандово.

По Гевгелија, ова е втор успешен референдум преку кој граѓаните се обидуваат да ја заштитат животната средина и околината во која живеат.


Демонтирана бомба од Втората светска војна во Солун, евакуирани 75.000 лица


Солун, 12 февруари, 2017 - 13:49 (META) 

Властите во Солун денеска евакуирале 75.000 жители на градот поради демонтирање на бомба од Втората светската војна, тешка 227 килограми, пронајдена во темелите на бензинска пумпа, јавуваат грчките медиуми.

Евакуацијата почнала утрово во 7 часот, кога полицијата тргнала од куќа до куќа, во круг од два километри во западниот кварт Корделио, повикувајќи ги жителите да ги напуштат своите домови.

Пиротехничарите на грчката војска бомбата ја демонтирале и неутрализирале за само 30 минути, соопштиле локалните власти.

Сепак, допрва претстои нејзино транспортирање, поради што на жителите на квартот сè уште не им дозволено да се вратат во своите домови.

Поради интервенцијата денеска биле затворени главната автобуска и железничка станица, а црквите ја откажале неделната служба.

Градската управа закупила хотел со 175 соби, каде вчера биле сместени лица со тешкотии во движењето и нивните негуватели. Меѓу евакуираните биле и 450 бегалци, сместени во една поранешна фабрика во квартот.


Поради бомба од Втора светска војна, евакуирани 54.000 луѓе во Германија


Берлин, 24 декември, 2016 - 11:01 (META) 

Поради неексплодирана бомба од Втората светска војна, околу 54.000 луѓе треба да бидат евакуирани од баварскиот град Аугсбург. Станува збор за најголема евакуација во Германија од крајот на Втората светска војна.

Градските власти им наложија на жителите да ги напуштат своите домови до 10 часот изутрина на Божик, откако при градежни работи пронајдена е заборавена британска бомба, тешка 1,8 тони.

Евакуацијата ќе ја надгледуваат 800 полицајци кои ќе се погрижат техничарите да не почнат со деактивација додека сите жители не го напуштат градот.

Градските власти проценуваат дека поголемиот дел од жителите ќе се сместат кај семејствата или пријателите, а за другите ќе биде обезбедено сместување.


Жители од тетовско Горно Седларце го блокираа автопатот Тетово – Гостивар


Тетово, 25 ноември, 2016 - 16:22 (META) 

Автопатот Тетово – Гостивар попладнево беше блокиран околу половина час, од жители од тетовското село Горно Седларце кои протестираа кај наплатната рампа за излез од Тетово.

Тие се револтирани што мора да плаќаат патарина за влез и за излез од Тетово иако по овој автопат поминуваат само три и пол километри, колку што има од нивното село до Тетово.

– Некои  го користат цел автопат, а ние користиме само три и пол километри и исто плаќаме. Некои од жителите од Горно Седларце одат до Тетово и по неколкупати во текот на денот, и за одење и за враќање тоа се 60 денари. Ако ги соберете, еве, најмалку двапати одење до град, тоа се 120 денари. Ова е голема сума пари – изјави еден жител до тетовското село Горно Седларце, кој учествуваше на денешната блокада.

Жителите од Горно Седларце велат дека мора да се најде алтернативен пат за да стигнат до Тетово, а дотогаш бараат намалување на цената за патарината за нив.

– Ние не сме против плаќање патарина, но нека биде цената барем 10 денари, колку што го кориситме, сè додека не се изгради помошен пат од нашето село до Тетово. Ваков помошен пат институциите повеќепати ни ветувале, но од тоа нема ништо – изјави друг жител на Горно Седларце.

Мештаните велат дека ќе продолжат со блокадите сè додека не се исполнат нивните барања.

Од Агенцијата за државни патишта не успеавме да добиеме одговор, дали ќе одговорат позитивно на барањата на учесниците на протестот. Инаку, тетовското село Горно Седларце брои повеќе од 1.000 жители и е едно од поголемите села во Полошкиот Регион.