!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Протест против одлуката на жирито на театарскиот фестивал во Прилеп


Прилеп, 17 јуни, 2017 - 13:41 (META) 

Ансамблот на Народниот театар „Војдан Чернодрински“ од Прилеп на синоќешното затворање на истоимениот фестивал, протестираше против одлуките на жирито. Во име на актерите од ансамблот, Владимир Ѓорѓијоски кажа дека публиката заслужува многу повеќе од каприците и од личните интереси на членовите на жирито, јави „Десет без десет“.

Тој вели дека се поклонуваат на публиката како единствен меродавен оценувач, со надеж дека нештата во македонскиот театар ќе тргнат на подобро.

52. издание на Македонскиот театарски фестивал „Војдан Чернодрински“ вчера заврши во Прилеп, со мјузиклот „Тајно моја“ на Македонската опера и балет.

Наградата за животно дело на фестивалот му беше доделена на академик Митко Маџунков, кој е претседател на жирито. Членови на жирито се уште Слободан Деспотовски и Братислав Димитров.

Најмногу награди на „Војдан Чернодрински“ собра Театар „Комедија“. Претставата „Трудна приказна“ на театар „Комедија“ ја понесе наградата за најдобра претстава, а беа доделени и четири признанија – за главна женска улога, која беше доделена на директорката на театарот, Јелена Жугиќ, како и  наградите за споредна машка и женска улога и за текст.

Во седумте фестивалски дена на 52. издание на МТФ „Војдан Чернодрински“, публиката виде 20 претстави, промоции на театарска литература и изложби.


Овации на Фестивалот на монодрамата за репликата „Власта ја уби интелигенцијата“


Битола, 5 мај, 2016 - 13:14 (META) 

„Власта ја уби интелигенцијата!“ Токму оваа реплика на актерот Емил Рубен во претставата „Животот е прекрасен“ доби громогласен аплауз на синоќешното отворање на 18. Интернационален фестивал на монодрама „Битола 2016“.

Голем дел од публиката во театарот не остана рамнодушна на репликите во кои препозна поврзаност со актуелните случувања во државата, особено на тие во кои се критикуваше власта, за партизирање на сите сегменти од уметноста.

Од друга страна, пак, дел од публиката покажа негодување кога во официјалниот протокол беше најавено меѓународното жири на чело со актерот Петар Темелковски, во кое, меѓу другите членува и драматургот Братислав Димитров од Македонија.

Многумина гласно коментираат дека годинава актерите на фестивалот ќе ги оценуваат членови на Граѓанското движење за одбрана на Македонија (ГДОМ).

Почетокот на фестивалот помина во исчекување на публиката каква герила-акција ќе биде приредена за градоначалникот Владимир Талески од членовите на „Протестирам“. Талески влезе на претставата од задниот влез на театарот откако беше информиран дека герилците го чекаат со транспаренти „Честито аболиција“ и „Долу маските “.

Незнаејќи какво изненадување го чека, Талески и за време на паузата помеѓу двата чина во претставата остана да седи на своето столче.

Претставата на режисерот Александар Морфов „Животот е прекрасен“, во изведба на Македонскиот народен театар (МНТ), синоќа во Центарот за култура – Битола го означи почетокот на Фестивалот на монодрама, на кој учестуваат актери од САД, Литванија, Србија, Албанија, Хрватска, Бугарија, Ерменија, Израел и од Македонија.

На фестивалот ќе бидат изведени 17 монодрамски остварувања, од кои 13 во официјалната фестивалска конкуренција, а четири како придружен дел на фестивалската програма.

Во меѓународното жири, покрај Темелковски и Димитров, членуваат и Билјана Крајчевска од Македонија, Нина Мазур од Украина и Иван Лео Лемо од Хрватска.

– Монодрамите се есенцијален театар. Фасцинантно е што сè може да се каже за еден час, колку што обично трае една монодрама, но тоа е и дополнително тешко за еден актер да успее да ја задржи својата и концентрацијата на публиката – рече хрватскиот режисер Лемо, лански победник на фестивалот во Битола.


„Бибер“ објави збирка раскази на тема помирување


Сараево, 5 април, 2016 - 14:45 (META) 

Книжевно-активистичкиот тим „Бибер“ денеска соопшти дека е објавена збирка кратки раскази на тема помирување, избрани на конкурсот што беше објавен минатата година.

Во збирката има 25 избрани ракази, меѓу кои и на авторите Владимир Табашевиќ, Надиа Герас и Слаѓана Љубичиќ, кои се наградени на конкурсот.

Обајвените и наградените раскази ги избра жирито во состав Дорунтина Баша, Фарук Шехиќ и Бојан Кривокапиќ.

Во збираката сите раскази се објавени на босански, хрватски, црногорски, српски, македонски и на албански јазик.

„Промоциите на збирката ќе бидат одржани во текот на мај во Сараево, Скопје и во Белград, а се надеваме, подоцна, и во други градови во регионот“, велат од тимот на „Бибер“.

„Бибер“ е книжевно-активистички тим формиран околу идејата дека уметноста може да инспирира општествена промена.


Избрано жирито за „Иск-фактор“


Загреб, 17 февруари, 2015 - 11:31 (META) 

Емина Јаховиќ, Владо Георгиев, Јелена Розга и Џибони се членови на новото жири на „Икс-фактор“. Босанската пејачка Емина Јаховиќ беше член на жирито и минатата сезона, кога победник беше Данил Кајмакоски.

Покрај неа ќе седат српскиот шармер Владо Георгиев, русокосата хрватска пејачка Јелена Розга и легендарниот Џибони.

Шоуто ќе почне на 22 март.