Тунис им забрани на авиокомпаниите од ОАЕ да слетуваат на туниска територија


Тунис, 25 декември, 2017 - 10:09 (META) 

Тунис им забрани на авиокомпаниите од Обединети Арапски Емирати (ОАЕ), нивните авиони да слетуваат на туниска територија, соопшти денеска Министерството за сообраќај на Тунис.

Забраната следува два дена откако, туниската влада соопшти дека ОАЕ им забраниле на Тунижанките да слетуваат на нивна територија или ОАЕ да ја користат како транзитна земја, пренесуваат светските медиуми.

Од Министерство за сообраќај на Тунис велат дека, ги суспендирале летовите на компанијата „Емирејтс“, се додека компанијата не најде соодветно решение за летовите „во согласност со меѓународното право и договори“.

Тунис побара објаснување од амбасадорот во ОАЕ, кој известил дека, одлуката била краткорочна и рестрикциите повеќе не важеле.

И покрај тоа, групата за човекови права во Тунис ги осуди овие мерки и ги квалификуваше како „дискриминаторски и расистички“.


Собранието се обои портокалово


Скопје, 25 ноември, 2017 - 8:27 (META) 

Собранието на Република Македонија вчеравечер, заедно со голем број знаменитости низ светот, заблеска во портокалово во поддршка на ставањето крај на насилството врз жени и девојчиња, со што беше означен почетокот на глобалната кампања „16 дена активизам против родово базирано насилство“.

На настанот, кој го организираа Обединетите нации и Собранието на Република Македонија, се обратија претседателот на Собранието, Талат Џафери, премиерот Зоран Заев, министерката за труд и социјална политика, Мила Царовска, и постојаната координаторка на Обединетите нации во земјата, Луиза Винтон. Таа, цитирајќи ја изјавата на генералниот секретар на ОН, истакна дека „насилството врз жените во основа се однесува на моќта и ќе сопре само кога родовата еднаквост и целосното зајакнување на жените ќе станат реалност.”

Кампањата „16 дена активизам против родово базирано насилство“ има цел да ја подигне свеста и да поттикне конкретни чекори кои ќе помогнат да се стави крај на насилството врз жените и девојчињата во светот, а се случува секоја година во текот на 16 дена во периодот помеѓу 24 ноември – Меѓународниот ден за елиминација на насилството против жените и 10 декември – Меѓународниот ден на човековите права.

Во текот на овие 16 дена, во земјата ќе се одржат бројни активности кои ќе вклучуваат поддршка од јавни личности од различни сфери, можност сите да постираат свои пораки против насилството за да ја покажат својата поддршка на социјалните медиуми, како и низа дебати и работилници.


Седма година по ред, Ангела Меркел е највлијателна жена според магазинот „Форбс“


Њујорк, 1 ноември, 2017 - 20:47 (META) 

Магазинот „Форбс“ ја прогласи германската канцеларка Ангела Меркел за највлијателна жена во светот за 2017 година. Меркел на врвот на листата на „Форбс“ се наоѓа веќе седма година по ред. Листата на 100 највлијателни жени беше објавена денеска.

На второто место се наоѓа британската премиерка Тереза Меј, која доаѓа на местото на поранешната државна секретарка на САД, Хилари Клинтон. Таа на оваа позиција на „Форбс“ беше лани.

На трето место на листата на највлијателни жени е и Мелинда Гејтс, сопругата на основачот на компанијата „Мајкрософт“, Бил Гејтс.

Помеѓу десетте највлијателни жени во светот се и директорките на компаниите „Јутјуб“, „Фејсбук“, како и шефицата на Меѓународниот монетарен фонд, Кристин Лагард.


Терорист уби две жени на железничка станица во Марсеј


Марсеј, 1 октомври, 2017 - 16:37 (META) 

Две жени денеска беа убиени со нож од напаѓач кој на железничката станица во Марсеј извикувал „Алах е голем“. Тој потоа бил погоден и убиен од војниците кои интервенирале.

Полицијата вели дека според досегашните сознанија, станува збор за терористички напад.

Во моментов кај станицата и пошироко се спроведува голема безбедносна операција.

Марсеј во август искуси два слични напади, а во изминативе две години имаше десетици жртви во терористички напади.

Сличен напад вчеравечер се случил во канадскиот град Едмонтон.


Малку жени се сопственици на големи и на средни компании во Македонија


Скопје, 25 септември, 2017 - 14:50 (META) 

Во 73 проценти  од македонските големи и средни компании сопствениците се мажи, а 67 проценти се генерални менаџери, додека жени менаџираат во 33 отсто од компаниите, а само 27 проценти се сопственички.

Ова го покажуваат резултатите од истражувањето за родова застапеност на раководни позиции во Македонија, кое Институтот за комуникациски студии во соработка со Институтот „Изида Вита“ од Словенија го реализираше од април до јуни оваа година.

„Клучните пречки зошто жените не се промовираат на највисоките раководни позиции се нивната несигурност во способноста да ја извршуваат таа функција, затоа што работат на социјално одговорни цели и не се фокусирани само на постигнување финансиски цели и тоа што тие се воспитуваат да се грижат за семејството, а не да бидат жени со успешна кариера“, се вели во истражувањето.

Жените испитанички одговориле дека се соочиле со ситуации кога работеле долго време за да завршат некој проект, а потоа маж ја презел заслугата за тоа (18,8 проценти), дека се соочиле со стереотипи дека жените управителки се непријатни и заповедливи (13,8 проценти) или дека кога конкурирале за повисока позиција, работата ја добил маж иако нивното искуство и вештини биле на исто или дури повисоко ниво од неговите (12,8 проценти).

Голем процент од испитаниците сметаат дека родово балансирано управување ќе има позитивно влијание врз работењето на компанијата.

Истражувањето било спроведено на примерок од 1.200 големи и средни компании во Македонија, а во него учествуваа 304 испитаници вработени во компаниите.


Платформата за родова еднаквост бара поголема вклученост на жените на изборите


Скопје, 6 септември, 2017 - 15:08 (META) 

Платформата за родова еднаквост ги повикува подносителите на листите на кандидати за локалните избори да се заложат за родова балансираност.

Од таму потсетуваат дека во 1996 и во 2009 година ниту една жена не била избрана за градоначалничка, а на последните локални избори, во 2013 година, биле избрани 19 пати повеќе градоначалници отколку градоначалнички (76 мажи наспроти четири жени).

„Наспроти декларативните заложби, потсетуваме дека во составот на новата влада само на четири министерски позиции се жени. Од вкупно 67 именувани функционери и директори, вршители на должност на органи и на државни управи што се во надлежност на Владата, само пет се жени. Бараме од политичките партии родова балансираност на кандидатските листи на локалните избори и на сите следни избори, како клучен услов за поголема застапеност на жени на политичките функции, а со тоа и во рамноправното застапување на интересите на сите граѓани во земјата. Време е за 50:50“, се вели во соопштението на Платформата за родова еднаквост.

Во него се додава дека во предизборната програма на СДСМ, едно од ветувањата е зголемување на квотите за учество на жените во политиката за да се достигне сооднос 50:50 во 2020 година.

„Дополнително, во програмата на Владата за 2017- 2020 година се истакнува дека Владата ќе води политика на унапредување на правата на жените и зголемување на нивното учество во политичкиот, економскиот и во јавниот живот, како и воспоставување на посебно владино тело за родова рамноправност кое ќе се грижи за имплементација на родовата перспектива во креирање на политиките и на буџетите“, се додава во соопштението.


Во воздушни напади во Сирија загинале 29 лица


Рака, 9 август, 2017 - 19:17 (META) 

Сириската опозиција соопшти дека изминатите два дена во воздушни напади на северот на Сирија, кој е под контрола на Исламската држава, загинале најмалку 29 лица.

Коалицијата предводена од САД се обидува повторно да воспостави контрола на Рака, а силите предводени од Курдите, моментно контролираат половина од тој сириски град.

Опсерваторијата за човекови права соопшти дека воздушните напади се интензивирале во изминатите неколку дена и дека помеѓу загинатите имало девет жени и 12 деца.


Рохани именуваше две жени за потпретседателки на Иран


Техеран, 9 август, 2017 - 14:24 (META) 

Претседателот на Иран, Хасан Рохани, именуваше две жени за потпретседателки на државата, само еден ден откако се најде на удар на реформистите поради тоа што меѓу министрите во неговиот кабинет нема жени.

Масуме Ебтекар, која на меѓународната јавност ѝ е позната по портпаролската улога за време на заложничката криза во американската амбасада во Техеран во 1980 година, е именувана за потпретседателка за прашања за жените. Таа претходно го водеше ресорот екологија.

Лаја Јонеиди е поставена на местото потпретседателка за правни прашања, додека Шахиндот Моулаверди е именувана за специјална советничка за првата на граѓаните.

Критикувајќи го изоставувањето на жените министри од составот на новата влада, реформистичките политички сојузници на Рохани тврдат дека тој подлегнал на притисокот на верскиот естаблишмент во Иран.


Потребно е економско зајакнување на жените, порача Заев


Скопје, 14 јуни, 2017 - 13:05 (META) 

„Владата ќе работи на подигнување на свеста дека и жените и мажите се еднакво одговорни за домашните активности и за грижата за децата. Поделбата на оваа таканаречена неплатена работа е првиот чекор кон воспоставувањето родова еднаквост“, истакна премиерот Зоран Заев на обраќањето на конференцијата посветена на родовата еднаквост, организирана од Програмата за развој на ОН (УНДП), телото на Обединетите нации за родова еднаквост и за зајакнување на жените (UN Women) и од Меѓународната организација за труд (МОТ).

Тој истакна дека целта на Владата е да овозможи градинките да работат во две смени.

„Ја разгледуваме можноста да го зголемиме бројот на вработени во јавните детски градинки. Со тоа ќе им олесниме на родителите што работ и по 18 часот, да бидат спокојни на работното место. Во програмата предвидовме еднородителските семејства кои имаат плата пониска од просечната, да не плаќаат надоместок за градинка или за основно училиште“, истакна Заев.

Помеѓу мерките беше спомнато и флексибилно работно време за таткото во првите три месеци по раѓањето на децата.

Тој додаде дека потребно е да се намали товарот на неплатената работа на жените и да се унапреди нивната економска моќ.


ОН: Опаѓа бројот на жените во политиката


Њујорк, 16 март, 2017 - 12:08 (META) 

Бројот на жените на важни политички функции стагнирал минатата година во светот, се наведува во студијата на ОН, во која се изразува загриженост поради нерамноправноста на половите.

Само 17 отсто од жените биле шефови на држави или влади во 2016 година, додека во 2015 година тоа било 19 отсто. Кога станува збор за мандати, на разни избори во 2016 година, освоиле 22,3 отсто, додека во 2015 година биле 25 отсто.

– Резултатите се алармантни – наведе директорката на Агенцијата за жени на ОН, Фумзиле Мламбо-Нгсука, и додаде дека власта во светот претежно ја држат мажите.

Повеќето жени имаат министерски места во ресорите животна средина, енергетика или природни ресурси, како и социјални прашања.