Истражување: Mажите повеќе од жените се на социјалните мрежи


Скопје, 6 декември, 2018 - 11:23 (META) 

Интернет пенетрацијата е зголемена на 79,3 проценти опфат на домаќинствата во првото триемесечjе од 2018 година, наспроти 73,6 проценти во истиот период минатата година, вели претседателката Асоцијација за е-трговија на Македонија, Нина Ангеловска.

Таа додава дека има подобрување и во начинот на пристап потребен за обавување на е-трговија.

„Во Македонија 79,2 проценти од популацијата на возраст од 15 до 74 години употребило интернет или околу 1,3 милиони жители. Од тоа машкиот пол повеќе (80,9 проценти) од женскиот (77,4 проценти). 97,5 од младите на возраст од 15 до 24 години употребиле Интернет, а најмалку употребувале Интернет во старосната група од 55 до 74 години (46,7 проценти) во изминатите 12 месеци. Речиси секој ден интернетот го користат 68,7 проценти од популацијата од 15 до 74 години и тоа пак повеќе мажите од жените. За да пристапат до Интернет најмногу користеле мобилен или паметен телефон дури 68,8 проценти од Интернет-корисниците, потоа од лаптоп 41,1 проценти, од десктоп 36,5 проценти и 14 проценти пристапиле од таблет“, вели Ангеловска.

Таа додава дека граѓаните на Интернет најмногу зборувале и учествувале на „Фејсбук“ и тоа 64,8 проценти од Интернет-корисниците, но помалку од минатата година односно 83,8 проценти.

Што се однесува до користење на Интернет за социјални мрежи кое е најголемо, мажите (68,6 проценти) многу повеќе од жените (60,9 проценти) учествувале на социјалните мрежи. Исто така спрема минатата година


„Женски форум“: За 18 месеци, 60 жени жртви на семејно насилство во Тетовско


Тетово, 4 декември, 2018 - 16:30 (META) 

За 18 месеци, помош побарале 60 жртви на семејно насилство во Tетовско, од кои сите се жени. За оваа бројка информираат од невладината организација „Женски форум“ во Тетово, каде што жртвите имаат можност да побараат и добијат поддршка, како и бесплатна правна помош.

Од организацијата велат дека, овие бројки се нереални за тоа колку навистина има жртви на семејно насилство, а причините за непријавувањето се различни.

– Бројката не е реална, имајќи предвид дека многумина и не пријавуваат семејно насилство. Причините најчесто се страв, како и економска зависност. Сепак, сме задоволни што и тие 60 побарале помош. Сите биле прифатени и поминале низ сите фази на давање поддршка, како правна, така и институционална. Нашата организација соработува со сите релевантни институции засегнати од овој проблем- истакна адвокатот од секторот за правна помош на организацијата, Верица Тимосиеска.

Организацијата од 25 ноември, па се до 10 декември реализира низа активности за подигнување на свеста и информирање на граѓаните за сите детали околу семејното насилство и можноста за поддршка и помош.

– „Женски форум“ спроведува проект за бесплатна правна помош, кој е поддржан од Обединетите нации. Исто така одржавме и улична кампања, се со цел иницирање на заедништво во борбата против семејното насилство – рече Тимосиеска.

„Женски форум“ го промовираше и протоколот кој подразбира меѓусебна соработка со правните, здравствените и институциите за социјална работа, како и општината. Преку него се очекува на жртвите да им се пружи поефикасна услуга.


Жените претприемачи во земјава треба да се насочат кон ИКТ и СТЕМ секторот


Охрид, 3 октомври, 2018 - 15:56 (META) 

Пазарот е заситен од нано професиите како малите салони за убавина и малите фризерски салони. Марта Пејоска веќе четири години е сопственичка на единствената галерија и атеље за изработка и дизајн на современ накит и филигран во Охрид. Вели дека единствен начин да ја оствари својата визија е преку претприемништвото.

Пејоска е само една од храбрите млади девојки и жени, потенцијални и постојни претприемачи, како и заинтересирани страни од државните институции и граѓанското општество, која преку проектот WE MAKE ќе бидат поттикнати да се насочат кон женското претприемништвото, извозот и иновациите, вклучувајќи го ИКТ и СТЕМ секторот, зелената економија, како и социјалното претприемништво.

-Сакаме да направиме продор на младите девојки, на младите жени, да влезат во една сфера којашто е попрофитабилна и која што е нормално носи еден бенефит како и за нив како прептриемачи исто така и за фамилијата и исто така и за опшптеството – потенцира Валентина Дисоска – претседател на Здружение на бизнис жени.

Податоци за тоа колку од жените претприемачи се дел од ИКТ и СТЕМ секторот, се уште нема, па така иако во едукациските процеси односот е 50-50%, сепак со нив во земјава се уште суверено владее посилниот пол. Пазарот е доволно заситен со професиите кои на еден начин го одбележаа женското претприемништво во ова измината деценија, како козметичари, фризерки итн. Другите професии нудат можности за посериозен бизнис кој пак нуди поголема заработувачка, но и поголема одговорност.

-Токму кон тоа сме насочени да ги поттикнеме младите жени да сфатат дека одговорноста не е нешто од кое што треба да се плашат, тоа е пат кој треба да се изоди, а бенефициите се многу поголеми. Од оние микропертпријатија или нано претпријатија од типот, правиме нокти, шминкаме итн, дури и тие компании можат да пораснат во големи бизнис центри како велнес центри итн – објаснува Дисоска.

WE MAKE проектот ќе биде имплементиран во избрани општини од осумте плански региони: Битола, Струга, Велес, Тетово, Куманово, Штип, Струмица и Скопје. За време на овој проект активно ќе бидат споделени најдобрите практики од Хрватска и ЕУ. Една од специфичните цели на овој проект е формирање на Националната асоцијација за женско претприемништво (ЖП) и Платформите за зајакнување на екосистемот за претприемништво во Македонија и имплементација на Нацрт Националната Стратегија за развој на ЖП 2017-2020.


Саудиска Арабија почна да им издава возачки дозволи на жените


Ријад, 6 јуни, 2018 - 11:21 (META) 

Властите на Саудиска Арабија почнаа да издаваат возачки дозволи на жени, само три недели од стапување на сила на кралската наредба со која им се дозволува на жените да управуваат со возило.

Агенцијата за сообраќај на Саудиска Арабија наведе дека почнала да ги менува меѓународните возачки дозволи за саудиски дозволи, непосредно пред 24 јуни кога жените и службено ќе почнат да возат.

Саудиска Арабија е единствена земја во светот во која жените до сега немаа право да управуваат со возило.

Во септември 2017 година кралот Салман најави дека забраната ќе биде укината во јуни 2018.


Елези: Жените во руралните средини се соочуваат со пречки на пазарот на труд


Виена, 15 мај, 2018 - 10:39 (META) 

Заменик министерот за финансии, Ширет Елези учествува на конференцијата организирана од Светска банка на тема „Развивање на потенцијалот за економски раст – преку подобрување на родовата еднаквост“, која се одржува во Виена.

Елези истакна дека родовата еднаквост и учеството на жените на пазарот на капитал имаат придонес кон зголемување на економскиот раст. Таа посочи дека жените на пазарот на труд се соочуваат со пречки, и тоа повеќе жените во руралните во однос на жените во урбаните средини.

„Преку Фискалната стратегија 2019-2020 и новиот закон за буџети, особено внимание ќе се посвети на родово одговорно буџетирање. Веќе во 2018 година има напредок, преку планирање со родова буџетска анализа во линиските министерства, и одредување индикатори за следење на родови програми“, додаде Елези.

Конференција на Светска банка има за цел зголемување и зајакнување на родовата еднаквост на регионално и меѓународно ниво, како и за подобрување на мониторингот на обврските преземени за родова еднаквост.


Квиз: Проверете ги вашите знаења за половата застапеност на пазарот на труд


Скопје, 25 април, 2018 - 12:30 (META) 

Анализата на податоците од Анкетата за работната сила на Државниот завод за статистика покажува дека во Македонија постои нерамномерна полова распределба на работните места и на платите. Проверете ги вашите знаења во однос на половата застапеност на пазарот на трудот во Македонија преку овој интерактивен квиз.

Објавените визуелизации се дел од проектот D.A.T.A. – Data Analytics for Transparency and Accountability имплементиран од Фондацијата за интернет и општество „Метаморфозис“.

Овој проект е делумно поддржан од Амбасадата на САД. Мислењата, откритијата и заклучоците или препораките изнесени овде се на имплементаторите/авторите, и не ги одразуваат оние на Владaта на САД.


Шекеринска: Бројот на жените во одбраната не е на задоволително ниво


Скопје, 8 март, 2018 - 13:30 (META) 

Состојбата со бројот со жените во АРМ не е доволно добра, но таква е ситуацијата во речиси сите армии и во европските, кои се неколку чекори понапред во однос на Македонија, порача денеска вицепремиерката и министерка за одбрана Радмила Шекеринска на трибината на тема „Родова перспектива во одбраната”, организирана по повод 8 Март – Меѓународниот ден на жената.

Нагласи дека бројот на офицерки во АРМ се зголемува, но не доволно брзо и додаде оти е уверена дека наскоро ќе има подобрување на ова поле.

Министерката истакна дека при приемот на питомците оваа година во Воената академија повеќе од половината од кандидатите биле девојки, кои биле меѓу најдобро пласираните во однос на успехот, тестирањата и физичката подготвеност.

– Ако се откажете од 50 проценти од своето население, со образложение дека таму едноставно не треба да има амбиции, сте се откажале од потенцијално добри офицери, подофицери, војници. Анализите на НАТО во одреден дел од мисиите покажуваат дека има одредени предности, кои ги имаат жените, полесно можат да остварат контакт со локалното население, на пример со жените во некое авганистанско село – посочи Шекеринска.

Потпретседателката на Собранието, Фросина Ташевска – Ременски, на присутните им порача дека се надева дека во блиска иднина на ваквите настани на пример ќе биде промовирана првата жена генерал во Македонија.

– Ќе бев многу посреќна ако денеска тука промовиравме генерал-жена, можеби да испромовираме женска единица за специјални задачи. Можеме да се пофалиме дека направивме голем чекор напред, пробивме многу бариери – порача Ташевска – Ременски.

Вицепремиерот задолжен за европски прашања Бујар Османи истакна дека од процената на состојбата на жените во едно општество може да се направи проекција за можноста за избувнување на конфликт, односно војна.


„Евростат“: Жените во ЕУ се 16 проценти послабо платени од мажите


Брисел, 8 март, 2018 - 10:46 (META) 

Статистичката служба на Европската Унија, „Евростат“ објави дека жените во Европската Унија во 2016 година, во просек, биле за 16,2 отсто послабо платени од мажите, односно во просек заработиле 84 евроценти од секое евро кое го заработил маж.

Во цела ЕУ, разликите во платите се намалени малку и тоа во просек за 0,6 процентни поени, од 2011 до 2016 година.

Помеѓу земјите-членки во 2016 година, разликите во платите се движеле од само пет отсто во Романија и Италија, до над 25 проценти во Естонијa.

Во Чешка и Германија таа разлика во плати е од речиси 22 проценти.


Хелсиншки: 78 отсто од жртвите на физичко насилство се жени, треба промена на законите


Скопје, 8 март, 2018 - 9:59 (META) 

Жените во Македонија се уште се соочуваат со дискриминација по основ на пол и род во сите општествени процеси, без притоа да имаат заштита на нивните права, велат од Хелсиншкиот комитет за човекови права.

Од таму потсетуваат дека текстилните работнички, жените од руралните средини, жените Ромки, жените жртви на насилство, жените со попречености, спаѓаат меѓу најранливите групи во нашето општество, за кои државата се уште не презема суштински мерки кои би го подобриле нивниот социјален и општествен статус.

„78 отсто од жртвите на физичко насилство се жени додека 98 отсто од сторители на семејно насилство се мажи. Од 2008 до 2016 година, регистрирани се 70 фемициди од кои 15 се случиле само во периодот од 2013 до 2016. Над три четвртини од случаите на семејно насилство не се пријавени во ниту една јавно достапна служба. Најчестата причина поради која девојчињата го напуштаат училиштето се малолетничките бракови. 81 процент од вработените во текстилната, кожарската и чевларската индустрија се жени и тие се едни од најниско платените работнички со 35 отсто пониска просечна плата од просечната плата на државно ниво“, се вели во соопштението.

Според Хелсиншки комитет, ратификувањето на Конвенцијата на Советот на Европа за превенција и борба против насилството врз жената и семејното насилство, позната како Истанбулска конвенција, претставува најзначајниот чекор, кој оваа Влада го направи во борбата со насилството врз жените и домашното насилство.

Но, постсетуваат дека изминатиов период бевме сведоци на неколку случаи на насилство врз жени, вклучително и сексуално насилство врз малолетно девојче, штитеник на Јавната установа за згрижување деца со воспитно-социјални проблеми „25 мај”3, кои претставуваат само примери на целосно нефункционалниот систем за грижа и заштита на жените и девојчињата.

„Од овие причини бараме државата итно да започне со промена на законската рамка и собирање на статистички податоци за регистрирање на сите форми на родово базирано насилство, да обезбеди сервиси за жените и девојчињата жртви на насилство и да им обезбеди заштита на сите жени чии права секојдневно се прекршуваат“, апелираат од Хелсиншки комитет.


Во Македонија има 283.834 вработени жени – најголем дел во приватниот сектор


Скопје, 8 март, 2018 - 9:51 (META) 

Државниот завод за статистика објави податоци за жените во Македонија по повод 8 Март, Меѓународниот ден на жената.

Според нивната последна статистика за 2016 година, вкупниот број на вработени жени изнесува 283.834 од кои 74,8 отсто се вработени во приватни компании.

Бројот на дипломирани жени изнесува 6.787 или 58 отсто од вкупниот број на дипломирани студенти. Жени магистри на науки изнсува 1.107 или 58,9 отсто од вкупниот број на магистри, а на доктори на науки 111.

Во текот на денот вработените жени поминуваат 15 отсто на слободни активности, а невработените 21 отсто.

Жените во урбаните средини на забава и култура поминуваат просечно дневно по два часа и 16 минути што е двојно повеќе од жените во руралните средини односно еден час и 13 минути.

Жените во Македонија се почесто се одлучуваат да раѓаат по едно или две деца. Во домаќинствата кои имаат деца, жените просечно дневно поминуваат по еден час и 57 минути во нивно згрижување.

Од сите домашни активности на жените, 16 отсто отпаѓаат на чистење на станот.

Жените живеат 77,4 години или 4 години подолго од мажите.