!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Нема регионален развој без железничко поврзување


Скопје, 16 октомври, 2017 - 15:33 (META) 

Еврокомесарката за транспорт, Виолета Булц, која денеска учествува на „Самит 100“, на средбата со министерот за транспорт и врски, Горан Сугарески, порачала државите од Западен Балкан повеќе да се поврзат железнички и да ги искористат парите од ЕУ за таа намена.

Сугарески информираше дека темата на разговор била да се забрза железничкото поврзување помеѓу Македонија и Бугарија, за кој се одвоени 70 милиони евра по потпишувањето на Договорот за транспортна заедница. Исто така, важно е да се искористат финансисиите што се на располагање за железничката  делница Битола – Кременица за поврзување со Грција.

Крајниот рок за комплетно железничко поврзување со соседна Бугарија е од 2025 до 2027 година.

Еврокомесарката Булц порача дека без меѓугранично транспорно поврзување, не е можно да се развива заедничката економска средина на шесте држави од Западен Балкан. Таа гледа посветенот кај сите министри за транспорт од регионот по потпишување на Договорот за транспортна заедница што следеше по десетгодишни преговори.

– Инвестициите во инфраструктурата се многу значајни бидејќи секој процент вложен во инфраструктурата значи 2,4 проценти потенцијален пораст на БДП во наредните четири години. Затоа инвестициите во инфраструктурата се битни за сите држави од Западен Балкан и се надевам дека наскоро ќе видиме некој резултат покрај потпишувањето на договорот – рече Булц.


Сугарески: ЕУ додели грант од 35,4 милиони евра за изградба на патот Градско – Дреново


Скопје, 23 август, 2017 - 14:55 (META) 

Министерството за транспорт и врски во име на Владата потпиша нов билатерален договор со Европската Унија за ко-финансирање на проектот за „Изградба на експресниот пат на делницата Дреново – Градско, како дел од крак 10-Д на патниот Коридор 10“, информираше денеска министерот за транспорт и врски, Горан Сугарески.

Тој додаде дека овој нов договор со ЕУ е од исклучително значење за модернизирање на патната инфраструктура во Пелагонискиот регион.

– Европската Унија, подржувајќи ги напорите на новата Влада, донесе одлука да се вклучи во финансирањето на експресниот пат од Градско до Дреново со грант, а не заем, во износ од 35,4 милиони евра. Со договорот се предвидува градежните работи на оваа делница долга 15 километри да започнат до крајот на 2017 година и да се завршат во рок од две години. Делницата Градско – Дреново ќе се гради на ниво на експресен пат кој ќе ги задоволи сите сообраќајни и безбедносни стандарди – изјави Сугарески.

Тој додаде дека изградбата на патот Градско – Дреново е прва фаза. Втората фаза која предвидува изградба на делницата од Фаришка до Дреновска клисура е во тек, но се соочуваат со проблеми на кои секојдневно работат за да се надминат.

– За третата фаза од Тројаци до Плетвар, вклучително и влезот во Прилеп, сме во напредни преговори повторно со Европската Унија за да обезбедиме дополнителни средства. Очекуваме некаде крајот на 2019, почетокот на 2020 година да имаме комплетно нов експресен пат од Градско до Прилеп – додаде Сугарески.

Министерот за транспорт и врски информираше дека во рамките на Секторската оперативна програма за транспорт 2014-2020, од страна на Европската Унија, одвоени се вкупно 108,9 милиони евра за проекти за подобрување на патната и железничката инфраструктура долж мрежата на европски транспортни коридори кои поминуваат низ територијата на Македонија.

Од овие 108,9 милиони евра планирано е, 60 милиони евра да бидат искористени и за изградба на пругата кон Бугарија конкретно делницата Крива Паланка – Деве Баир. Дел од овие средства ќе се искористат и за изградба на последната фаза од експресниот пат до Прилеп.


Сугарески информираше за деталите за изградбата на железничката мрежа со Бугарија


Скопје, 5 август, 2017 - 12:58 (META) 

Министерот за транспорт и врски, Горан Сугарески, денеска информираше за деталите од меморандумот за разбирање помеѓу Македонија и Бугарија за развој на железничката мрежа.

Тој истакна дека потпишувањето на овој меморандум е услов за одржлив економски пораст и развој во регионот.

– Со меморандумот се обврзуваме во наредниот период да ја доизградиме и да ја модернизираме пругата до границата со Бугарија, а исто така владата на Бугарија се обврза да ја доизгради пругата до нашата граница, со што целосно ќе го заокружиме железничкото поврзување. Вкупната должина што треба да се доизгради до границата со Бугарија е околу 89 километри. Изградбата претходно е поделена на три делници и ние како Влада ќе се движиме во рамките на таквите планови бидејќи постапките за сите три делници се веќе почнати – изјави Сугарески.

Тој додаде дека делницата Куманово – Бељаковце е во фаза на реализација, а средствата во висина од 46 милиони евра се обезбедени од Европската банка за обнова и развој.

– Пругата требаше да биде готова уште минатата година, но поради одредени проблеми со проектната документација и нерешените имотно-правни односи, градбата е пролонгирана до 2018 година. Во делот од Бељаковце до Крива Паланка во должина од 34 километри, во завршна фаза е постапката за изработка на техничката документација. Постапката за изведувач е почната и се очекува до средината на идната година да имаме избрано градежна фирма што ќе го гради овој дел од пругата. Според планираното, оваа делница ќе биде завршена до 2021 година. И за изградбата на оваа делница, средствата се веќе обезбедени од Европската банка за обнова и развој во висина од 145 милиони евра – додаде Сугарески.

За третата секција од Крива Паланка до границата со Бугарија во должина од 24 километри, во завршна фаза е изработката на проектната документација. Се проценува дека изградбата би чинела помеѓу 350 и 400 милиони евра.

– Бугарија со меморандумот се обврза модернизација на железничката линија од Софија до Ѓуешево да биде завршена до крајот на 2026 година (веќе постои пруга на оваа линија), а делот од Ѓуешево до граница со Македонија да биде завршена до крајот на 2027 година – изјави Сугарески.


Желeзничкиот сообраќај е нормализиран, владата постигна договор со штрајкувачите


Скопје, 7 јуни, 2017 - 13:58 (META) 

Владата и вработените кои штрајкуваат во „МЖ – Транспорт“ постигнаа договор за прекин на блокадата на железничкиот сообраќај. Вицепремиерот за економски прашања, Кочо Анѓушев, изјави дека Владата во наредниот период ќе се заложи за обезбедување што поголем обем на работа на „Македонски железници“, а се разгледува и идејата за либерализација на железничкиот транспорт.

Анѓушев нагласи дека покрај договорот за зголемување на додатоците за плата и за коефициентот на сложеност во наредниот период ќе продолжат разговорите за барањата за условите за работа, ХТЗ опремата и специфичноста на работното место.

– Многу е важно да се обезбеди што повеќе работа, односно македонските компании да возат што повеќе преку домашната железница, а секако и компанијата да се прилагоди на тоа да биде конкурентна во цените во однос на другите видови транспорт – изјави Анѓушев.

Тој посочи дека Владата ќе има исклучително позитивен пристап кон сите претпријатија во државна сопственост и ќе се обиде од нив да направи профитабилни фирми.


Компаниите бараат функционалност на Коридорот 10 зашто нема алтернатива


Скопје, 16 март, 2017 - 14:59 (META) 

Воспоставувањето целосна инфраструктурна функционалност на Коридорот 10 и обезбедувањето непречен пристап на стоките од и до пристаништето во Солун треба да биде приоритет, бидејќи во моментов нема алтернатива.

Ова е еден од заклучоците на тркалезната маса на тема „Сигурност во снабдувањето со стоки и со нафтени деривати – Можности и алтернативи“, која се одржа во Стопанска комора на Македонија.

– Инфраструктурата, царинските премини и терминали на коридорот Исток – Запад не се доволни и не се соодветни за редовно снабдување со стоки, а особено за нафтени деривати во подолг период. Инцидентно, може да помогне во одредени ситуации, кога има нарушување на снабдувањето преку Коридорот 10. Краткорочно гледано, во случај на нарушување на снабдувањето со деривати и со други стоки, неопходна е диверзификација на превозните средства (користење на железница и автоцистерни или камиони) и користење на повеќе влезни и излезни царински премини во државата – се предлог-заклучоците на тркалезната маса, информираат од Стопанска комора.

Еден од предлозите бил и промена на легислативата за зголемување на капацитетот на резервоарскиот простор кај трговските компании, како услов за добивање лиценци за трговија.

– Со заокружување на процесот на приватизација на пристаништето во Солун, односно негово давање под концесија, како и со либерализација на пристапот кон грчката железничка инфраструктура и влез на приватни оператори, ќе се овозможи либерализирање на односите по повеќе основи (избегнување на можни штрајкови, подобрување на брзината на испораките, намалени трошоци) – велат од Стопанска комора.

Преку пристаништето во Солун поминале 3.322.000 тони стока во 2016 година и 4.056.840 тони во 2015 година, од кои, во увоз и во извоз, количеството на стока за Македонија за 2016 година е 885.000 тони.


Грчките блокади и замрзнатиот Дунав ја оптоварија железницата, се бара вагон повеќе


Скопје, 6 февруари, 2017 - 12:00 (META) 

Железничкиот превоз e оптоварен и капацитетите на возовите се целосно исполнети, алармираа македонските компании кои бараат алтернативен превоз поради блокадата на граничниот премин Евзони од страна на грчките земјоделци, која трае веќе една недела.

Директорот на Македонска железница „Транспорт“, Никола Костов за „Мета“ вели дека нема прекин на железничкиот сообраќај и редовните коминтенти се сервисираат навремено, но побарувачката за железнички превоз е повеќекратно зголемена.

– Потребата за железнички сообраќај преку Солун е зголемена и поради замрзнувањето на Дунав, па преносот на стока е пренасочен преку солунското пристаниште. Дополнително, побарувачката е зголемена и поради штрајкот на грчките земјоделци – вели Костов.

Тој додава дека од директорот на грчки железници побарал поголем влез и излез на возови, како и да го продолжат работното време.

– Влегуваат и излегуваат три до четири воза дневно, а бараме таа бројка да биде барем 10. Исто така побаравме од нив да работат 24 часа, бидејќи сега нивното работно време е од 7 до 18 часот – додава Костов.

Претходно, директорот за продажба во „Макстил“, Јане Адамчевски, изјави дека тие како компанија индиректно се загрозени од блокадата на границата.

– Заради специфичноста на производите, транспортот од и кон Солун го правиме преку железнички пат. Но, сега, заради блокада на границата, сите превозници се ориентираа кон железнички превоз. Побарувачката за овој транспорт е зголемена, а капацитетите на македонската и на грчката железница се ограничени и не можат да одговорат навремено на овој обем на побарувања. Поради тоа планираната и нормална динамика на испорака на производите е загрозена – изјави Адамчевски за „Мета“.

Грчките земјоделци не само што не најавуваат дека ќе ги тргнат блокадите, туку се закануваат дека протестите ќе ги радикализираат.

Земјоделците се закануваат дека доколку владата не одговори на барањето, ќе го блокираат и граничниот премин кај Дојран, како и железничката линија кон Македонија кај Идомени.


Грчките земјоделци се закануваат и со блокада на преминот кај Дојран и на железницата


Атина, 6 февруари, 2017 - 10:38 (META) 

Грчкиот граничен премин Евзони останува затворен од блокадата на грчките земјоделци, кои со блокирање на граници и на автопатшта низ земјата реагираат против владината политика кон нив.

Нема најава дека земјоделците ќе се повлечат деновиве од граничниот премин на македонско-грчката граница, кој е блокиран точно една недела. Напротив, земјоделците се закануваат дека доколку владата не одговори на барањето за суштински дијалог со нив за клучни промени, дека ќе го блокираат и граничниот премин кај Дојран.

„Очекуваме владата да одговори на нашето барање за суштински петдневен дијалог со учество на премиерот Алексис Ципрас. Ако не се однесуваат кон нас сериозно, ќе ги интензивираме нашите активности и ќе стигнеме и до царината на Дојран“, изјави Томас Карипидис, претседател на сојузот на земјоделци од општината Пеониа и член на комитетот на земјоделците штрајкувачи кои блокираат на Евзони.

Земјоделците бараат промени во три сектори и тоа цена на производство, осигурување и даноци.

Додека трае блокадата, влезот од Македонија во Грција се одвива главно преку преминот Дојран и тоа со тешкотии и со долги чекања за влез и излез од државата. Земјоделците се закануваат дека може да почнат и со ненадејни блокади на железничката линија кон Македонија кај Идомени, што дополнително ќе го отежни товарниот сообраќај од Грција кон Македонија и кон ЕУ.

Лани бегалците во кампот кај Идомени три месеци ја блокираа железничката линија, создавајќи огромни проблеми за грчките извозници и транспортери, за македонските и странските компании и клиенти кои пренесуваат стока преку солунското пристаниште и железничката линија Солун – Скопје.


Блокадата кај Идомени го преполови профитот на грчката железница


Солун, 21 декември, 2016 - 14:11 (META) 

Бегалската блокада на железничкиот премин кај Идомени на македонско-грчката граница драстично го преполови профитот на грчката железница „Треносе“. Како што пренесува весникот „Прото тема“, загубите од неколкумесечната блокада на железничката линија поради протестите на бегалците се 2,5 пати повисоки од профитот на железницата, кој годинава се очекува да биде нешто повеќе од 2 милиони евра.

Според весникот, за 15 отсто се очекува да биде намален и целосниот обем на работа на железницата во товарниот транспорт. Поради блокадата на Идомени, а подоцна и поради штрајкот на солунското пристаниште, голем дел од странските компании, меѓу кои и македонски, чекаа со недели да им бидат испорачани производи и контејнери. Овој проблем доведе до тоа странските клиенти наместо да ја користат брзата железничка линија Солун – Скопје кон Западна Европа, да ги користат возовите од Солун кон Софија, кои патуваат еден и пол ден подолго, создавајќи дополнителна финансиска штета од околу 10.000 евра по воз.

За железницата да не дозволи повторно да дојде до проблеми како годинава, кога производите и контејнерите на голем број странски, домашни и македонски компании беа заглавени и во неможност да се извезат од Грција, „Треносе“ веќе имаат алтернативни идеи и планови. Во однос на Македонија, грчката железница е во преговори со нафтената компанија ЕКО за пренос на нафта и на горива кон нашата држава и Бугарија.

Грчката железница во процесот на приватизација ја купија италијанските железници, но сè уште не се знае кога ќе биде одобрено преземањето.


Големи зборови и нула реализација се симбол на СДСМ, обвинуваат од ВМРО-ДПМНЕ


Скопје, 3 септември, 2016 - 16:33 (META) 

Бетонските столбови од пругата кон Бугарија се сиот спомен на владеењето на СДСМ во Македонија, реагираа од владејачката ВМРО-ДПМНЕ на прес-конференцијата на Благој Бочварски од СДСМ.

Од ВМРО-ДПМНЕ велат дека големите зборови и нула реализација се вистинскиот симбол на сè што СДСМ правел во државата – ветувал и ги лажел граѓаните.

„Затоа СДСМ е непријатно изненаден кога се соочува со конкретни проекти и ветувања кои се реализираат. Во очајнички обид да ги манипулира граѓаните сега, кога и во СДСМ знаат дека бегање од избори и сигурен пораз нема, фабриката за афери се служи и со небулозни тези во кои ВМРО-ДПМНЕ е виновна за реконструкцијата на пругата Ниш – Прешево. Надвор од умот. Од друга страна, за разлика од СДСМ кој една шајка не закова во железницата, ВМРО-ДПМНЕ навистина е „виновна“ за ремонтот на железничката делница Табановце – Куманово (12 км) и Миравци – Смоквица (12 км), инвестиција од 7 милиони евра – пишува во реакцијата на владејачката партија.

Од ВМРО-ДПМНЕ додаваат и дека СДСМ е партијата која за железницата не мрднала со прст, освен кога требало да се украдат парите за пругата кон Бугарија.


Штрајк на британските железничари


Лондон, 8 август, 2016 - 11:37 (META) 

Стотина илјади патници кои секојдневно од Лондон патуваат со воз се соочуваат со првиот од вкупно петте најавени дена од штрајкот на железничарите, што е најголем прекин на возниот сообраќај во последните 50 години во Велика Британија.

Синдикатот на железничарите бара кондуктерите повеќе да не мора да ги отвораат и затвораат врата на возовите.

Најновиот прекин на железничкиот сообраќај на Лондон е дополнителен удар за патниците кои досега беа изложени на рестрикции поради преголемиот број на боледувања кај железничкиот персонал во текот на минатиот месец.

Од југот на Лондон поаѓаат околу 341 воза, што претставува 15 отсто од вкупниот редовен возен сообраќај. Спорот кој предизвика штрајк е обврската на кондуктерите да ги отвораат и затвораат вратите на возот.

Унијата РМТ, еден од најборбените британски синдикални организации, бара да се зголеми бројот на возовите кои опслужуваат само машиновозачи.

Претставниците на синдикатот и компаниите се обидоа да преговараат, но тоа заврши без успех откако превозникот изјави дека за време на штрајкот нема да пуштат во промет ниту еден воз кој сообраќа само со машиновозач.

Главниот менаџер на овој оддел на железницата, Чарлс Хортон изјави дека „Унијата РМТ ги изневерила сите“, како и оти нивниот штрајк е „непотребен, неприфатлив и неоправдан“.