Патнички воз излета од шините откако удрил во карпа, повредени нема


Гостивар, 18 февруари, 2019 - 11:10 (META) 

Патничкиот воз кој сообраќа на линијата Кичево – Скопје утрово излетал од шините во близина на гостиварските села Лакавица и Падалишта, објави Центарот за управување со кризи.

Во несреќата немало повредени.

Возот удрил во карпа, а пото аизлетал од шините. Предизвикана е материјална штета, сообраќајот на тој дел од пругатa е во прекин и се врши увид.

Ова е втор инцидент во јавниот сообраќај, по автобуската несреќа во средата попладнето животите ги загубија 14 лица, кога автобусот на „Дурмо Турс“ што сообраќал на редовна линија од Скопје до Гостивар излета од автопатот Скопје – Тетово и се преврте кај селото Ласкарци.


Петмина мртви откако воз удри автобус кај Ниш


Ниш, 21 декември, 2018 - 14:21 (META) 

Во голема несреќа што се случи утрово, кога воз удри автобус на „Ниш Експрес“ близу српскиот град Ниш, животите ги загубија пет лица, а се стравува дека бројката на жртви може да расте, бидејќи во Клиничкиот центар во Ниш во критична состојба се уште двајца 16-годишници.

Како што јавуваат српските медиуми, на обележан премин, но без рампи, на пругата кај Доње Меѓурово воз што сообраќал на линијата Ниш – Прокупље околу 7.30 часот удрил во автобусот во кој, покрај возрасните, имало и многу средношколци што оделе на училиште. Автобусот бил преполовен, а задниот дел од возот излегол од шините.

Во несреќата загинале двајца возрасни и едно 15-годишно момче, а подоцна во текот на операциите во Клинички центар Ниш починале 42-годишна жена и 15-годишна средношколка.

Глетката била ужасна, а според српските медиуми, полицајците, медицинскиот персонал и пожарникарите на местото на несреќата плачеле додека ги извлекувале повредените.

Повредени биле 27 лица, сите од автобусот, а во тешка состојба се десетмина.


Најмалку седуммина загинати во Анкара во железничка несреќа


Анкара, 13 декември, 2018 - 11:02 (META) 

Најмалку седум луѓе загинаа, а 46 се повредени во несреќа на железничката станица Марсандиз во главниот град на Турција утрово. Брз воз кој бил упатен кон централниот турски град Коња, по четири минути од тргнувањето удрил во железничка машина што ги проверувала шините во станицата.

По судирот два вагона излетале од шините, а возот удрил во пешачкиот мост над железничката станица.
Несреќата се случила четири минути откако возот тргнал од почетната станица во Анкара.


Двајца загинати во железничка несреќа во БиХ


Сараево, 23 август, 2018 - 9:58 (META) 

Две лица загинаа, а едно е потешко повредено при судир на два товарни воза во Долна Јабланица во Босна и Херцеговина. Несреќата се случила вчера во 23.10 часот во близина на железничката станица, откако едната локомотива поминала на црвено и директно се судрила со другата.

Загинатите се железнички работници од Сараево. Eден нивни колега успеал навреме да скокне од возот и поминал без повреди, додека другиот го извлекле пожарникарите, кои морале да ја сечат локомотивата.


Во железничка несреќа во Турција загинаа најмалку 24 лица


Истанбул, 9 јули, 2018 - 12:12 (META) 

Најмалку 24 лица загинаа во железничка несреќа кога воз излета од шините на западот на Турција, соопштија турските власти за новиот биланс на жртвите.

На местото на несреќата која се случи во неделата на границата со Грција, рано утринава беше продолжена операцијата за потрага и спасување.

Патничкиот воз со вкупно 368 лица излета кај селото Сарилар кај Истанбул, на границата со Грција.Околу стотина возила на Итна медицинска помош како и воени хеликоптери се упатиле за помош на повредените патници.

Локалните власти соопштија дека несреќата се случила поради обилните дождови во тој регион.


Еден загинат, над 20 лица повредени во железничка несреќа во Австрија


Виена, 12 февруари, 2018 - 19:41 (META) 

Во железничка несреќа што се случи во австриската провинција Стирија загина најмалку еден човек, а над 20 се повредени, објавија светските медими.

Еден воз, од засега непознати причини, излетал од шините и странично удрил во друга локомотива, во 1 часот по локално време кај јужниот австриски град Никласдорф.

Австриската полиција на „Твитер“ потврди дека една жена загинала, а помеѓу дваесет и двајцата повредени има три деца кои се пренесени во болница. Во несреќата учествувале прекуграничен воз на „Еуро сити“ кој патувал од Грац до Саарбрикен во Германија и патнички воз.

Австриските федерални железници (ОББ) објавија дека работниците се мобилизирани и операцијата за расчистување е почната.


Најмалку тројца мртви во железничка несреќа кај Милано


Милано, 25 јануари, 2018 - 10:07 (META) 

Според сегашните информации, помеѓу три и пет луѓе го загубиле животот во тешката железничка несреќа што се случила утрово кога воз излетал од шините близу италијанскиот град Милано. Десет луѓе се во критична состојба во болница а стотина други се повредени, јавуваат италијанските медиуми.

Државната железница „Феровие дело Стато“ соопшти дека регионален воз излетал од шините на околу 40 километри од Милано, кај станицата Пиолтело Лимито.


Педесет лица повредени во железничка несреќа во Германија


Диселдорф, 6 декември, 2017 - 10:07 (META) 

Најмалку 50 лица се повредени во судир на два воза во близина на германскиот град Диселдорф, соопшти полицијата.

Несреќата се случила откако патнички воз се судрил до товарен. Засега не се знае причината за несреќата.

Патничкиот воз ѝ припаѓа на компанијата „Национал експрес“, основана откако „Дојче бан“ во последните години продаде неколку регионални линии.

Седум лица беа повредени во мај откако воз излета од шините во источниот дел на Германија.


Дваесет и седум повредени во железничка несреќа во Швајцарија


Цирих, 11 септември, 2017 - 16:00 (META) 

Најмалку 27 лица се повредени во судир на два воза на станица во централниот дел на Швајцарија, соопшти полицијата.

Судирот се случил на станица во планинското место Андермат, при маневар за пренасочување. Во инцидентот учествувале локомотива и композиција со пет вагони, во кои имало околу 100 патници.

Железничката компанија „Матерхорн готард“ соопшти дека властите ја истражуваат причината за несреќата.


Седумдесет и четири повредени во железничка несреќа во Индија


Њу Делхи, 23 август, 2017 - 12:52 (META) 

Најмалку 74 лица се повредени откако воз излета од шините во Утар Прадеш, што е втора железничка несреќа во оваа индиска држава во последните три дена.

Возот „Кафијат експрес“ утринава удрил во камион кој превезувал градежен материјал, по што осум вагони излетале од шините.

Во несреќата во неделата загинаа 23 лица, кога од шините излетаа 14 вагони. Истрагата за овој инцидент се уште е во тек.

Несреќите се релативно чести во Индија, која има голема, но лошо одржуваа железничка мрежа. Дневно во Индија се сообраќаат 9.000 возови, кои превезуваат околу 23 милиони патници.