Европската унија и Јапонија потпишаа договор за слободна трговија


Токио, 17 јули, 2018 - 13:23 (META) 

Договорот за слободна трговија кој го потпишаа Европска унија и Јапонија претставува „јасна порака против протекцинизмот“, изјави денеска претседателот на Европскиот совет, Доналд Туск во Токио, алудирајќи на американските царински тарифи кои ги воведе претседателот на САД, Доналд Трамп.

„Покажуваме дека сме многу силни и во подобра позиција кога работиме заедно“, изјави претседателот на Европската комисија, Жан Клод Јункер.

Договорот помеѓу ЕУ и Јапонија предвидува зона на слободна трговија која покрива речиси една третина од светскиот домашен бруто-производ (БДП).

Состанокот во Токио требаше да се одржи минатата недела во Брисел, но јапонскиот премиер Шинзо Абе ја откажал средбата поради поплавите во Јапонија во кои настрадаа повеќе од 200 лица.


Јункер: Прашањето за името мора итно да се реши, препораката не значи датум за преговори


Скопје, 26 април, 2018 - 15:26 (META) 

Претседателот на Европската комисија, Жан Клод Јункер, денеска во своето обраќање во грчкиот Парламент ја нагласи итноста од решавањето на прашањето за името меѓу Македонија и Грција.

– Господине претседателе, пред вашиот Парламент ќе кажам нешто што го кажав кога неодамна бев во Скопје, каде што беше поставено прашањето за името на оваа земја. Јас не сум надлежен да ви дадам некоја насока, ниту идеи ниту пак правци во однос на прашањето што треба во секој случај да го решите меѓу вас. Но, дозволете ми да ја нагласам итноста што го карактеризира решавањето на проблемот, со оглед на комплицираниот регион. Ги имам на ум зборовите на Черчил: овде историјата што се произведува не може да се консумира, толку е голема – рече Јункер.

Претседателот на ЕК, во обраќањето пред пратениците, во присуство на грчкиот претседател, меѓу другото, говореше и за земјите од регионот и нивната европска иднина. Рече дека Грција е столб на стабилноста во регионот, а на Западен Балкан му е потребна европската перспектива, за да не се повторат, како што рече, драмите што ги доживеавме во деведесетите години.

Претседателот на ЕК истакна дека препораката за почеток на пристапни преговори со ЕУ, не значи и доделување датум.

– Сите оние проблеми, посебно конфликти на границите што би можеле да создадат и билатерални судири, ќе треба во секој случај да се решат пред било какво пристапување. За да бидам целосно јасен, сакам да кажам дека, кога Европската комисија предложи, а тоа беше пред една седмица, почеток на преговорите за пристап за Албанија, но и за ПЈРМ, ова не значи дека сме дале датум за да почнат овие преговори за проширување и интеграција. Воопшто не е даден таков датум за интеграција. Не треба да се потпираме на нереални најави, не е можно да се случува тоа – рече Јункер, додавајќи дека сите земји кандидати ќе се оценат објективно, врз база на нивните вредности и критериуми.


Јункер: ЕУ да се отвори кон Западен Балкан за да нема нови војни


Стразбур, 17 април, 2018 - 15:59 (META) 

Претседателот на Европската комисија, Жан-Клод Јункер, денеска порача дека Европската Унија треба да се отвори кон прифаќањето нови членки од Западен Балкан за да се избегне ризикот од нови војни во регионот.

Говорејќи во Европскиот парламент на денешната пленарна седница, каде попладнево се презентира и извештајот на Европската Комисија за напредокот на земјите од Западен Балкан и Турција во реформите неопходни за евроинтегративниот процес, Јункер рече дека доколку ЕУ не се отвори кон овие земји што се наоѓаат во многу комплициран и трагичен регион и доколку не им даде европска перспектива, постои можност за враќање на војната во ова подрачје, каква што имаше во 90-тите години.

– Не сакам да видам нова војна на Балканот, па затоа мораме да се отвориме за нив – рече Јункер.


Бертолини: За оваа година 80 милиони евра од ЕУ за Македонија – ако успеете да ги потрошите


Скопје, 19 март, 2018 - 10:41 (META) 

Раководителот на секторот за соработка на Делегацијата на Европска Унија, Никола Бертолини рече дека финансиската поддршка од ЕУ во Македонија значително се зголемува, па така за разлика од лани кога изнесувала 70 милиони евра, за годинава се предведени 80 милиони евра.

– За оваа година се превидени 80 милиони евра, само за билатералните договори, не сметајќи ги регионалните проекти. Претседателот на Европската комисија, Жан Клод Јункер при претставувањето на стратегијата за Западен Балкан, најави една милијарда евра. Според тоа, уште повеќе средства и фондови се предвидени за овде и во регионот. Успех е, доколку не се вратат парите назад – изјави Бертолини.

Претседателката на „Транспаренси интернешнл“ – Македонија, Слаѓана Тасева смета дека проблемот со искористување на европските пари до сега бил тоа што не сме биле подготвени да ги повлечеме.

– Не сме имале проекти, ниту капацитет. Парите кои што ЕУ ни ги дава, треба да се одработат. Мора капацитетите да се зајакнат за користење на странските фондови. Ако не е организирана државата, ако нема компетентни луѓе на вистински позиции, системот ќе се распадне  – изјави Тасева за „Мета“.


Јункер: Ниту една земја од Западен Балкан не ги исполнува условите за влез во ЕУ


Софија, 1 март, 2018 - 16:45 (META) 

Претседателот на Европска комисија, Жан Клод-Јункер по посетата на Софија истакна дека ниту една од земјите од Западен Балкан не ги исполнува условите за влез во ЕУ.

-Тие што сакаат да и се приклучат на ЕУ, треба да ги исполнат сите критериуми и услови за влез, но во овој момент ниту една од овие држави не ги исполнува и покрај тоа што има огромен напредок кај сите – рече Јункер.

Тој порача дека земјите прво мора да ги решат граничните спорови за да ги исполнат условите за влез во ЕУ.

На средбата во Софија учествуваа претседателите и премиерите на Македонија, Србија, Црна Гора, Албанија, Босна и Херцеговина и Косово. Од Унијата покрај Јункер беа и високата претставничка на ЕУ за надворешна и безбедносна политика Федерика Могерини и еврокомесарот за проширување Јоханес Хан.


Заев – Јункер: Кон ЕУ без одлагање и само со длабоки внатрешни реформи


Скопје, 25 февруари, 2018 - 21:27 (META) 

Премиерот Зоран Заев, денеска по средбата со претседателот на Европската Комисија, Жан-Клод Јункер, кој заедно со еврокомесарот за соседска политика и проширување на Европската Унија Јоханес Хан, престојуваше во посета на Република Македонија, пред домашните и странските медиуми истакна дека „со Стратегијата, ЕК ја потврдува европската иднина на Македонија, како географски дел од Европа кој ќе стане и дел од политичката структура на Европската Унија“.

На заедничката прес конференција премиерот Заев ја афирмираше „силната желба и посветеност кон длабоки внатрешни реформи, без одлагање, со лидерство и одлучност, да ја изодиме оваа клучна делница од патот кон нашето пристапување како земја членка на ЕУ“.

– Сега не очекуваат уште неколку исклучително важни активности, за да ја направиме оваа, 2018, историска година за Македонија. Од Самитот ЕУ – Западен Балкан во Софија очекуваме да биде продуцирана иновирана Агенда, по примерот на Солунската, која јасно ќе го трасира пристапниот пат во ЕУ, врз основа на предлозите содржани во Стратегијата. Самитот воедно ќе биде реален индикатор за тоа колку земјите членки на ЕУ се подготвени да се посветат на пристапниот процес на земјите од Регионот“.

Заев е уверен дека во јуни 2018 година, Советот ќе донесе одлука за почеток на пристапните преговори.

– Со сериозната посветеност за надминување на клучниот проблем што Грција го има со нашето уставно име. Заедно со премиерот Ципрас работиме посветено на затворање на овој долгогодишен и мачен проблем чие решавање треба да го отвори патот за интеграција на Македонија во ЕУ и НАТО. За Македонија е прифатливо име со географска одредница кое ќе направи дистинкција меѓу нашата држава и регионот во Грција. Сепак, инсистираме на достоинствено решение кое ќе овозможи трајно и одржливо решение на спорот со почитување на достоинството и идентитетот на двата народи и двете држави – рече Заев.

Претседателот на ЕК, Жан-Клод Јункер, рече дека нашата земја не е само дел од Европа географски, туку и историски. Европската Унија не е само заедница базирана врз заедничките економски интереси, туку поважно, е унија на заеднички вредности. Тие вредности се споделени и зајакнати од страна на нашата држава.

Според Јункер, нашата земја го изненадила светот со имплементацијата на реформите и ако продолжиме на иститот пат, ќе дадеме шанса на Европската Комисија за давање препорака на Советот за отпочнување на преговорите за неколку месеци.


Jункер на 25 февруари во официјална посета на Македонија


Скопје, 8 февруари, 2018 - 12:24 (META) 

Вицепремиерот за европски прашања, Бујар Османи, информираше дека претседателот на Европската комисија, Жан Клод Јункер ќе ја посети Македонија на 25 февруари. Македонија ќе биде првата земја која Јункер ќе ја посети како дел од неговата турнеја низ државите од Западен Балкан за презентација на Стратегијата на ЕУ за регионот.

– Ова е важен момент за презентација на Стратегијата, но и за охрабрување на владите да ги удвојат напорите за постигнување на новите скратени таргети – рече Османи.

Според него, Стратегијата ги исполнува сите очекувања на Македонија, бидејќи се валоризираат успесите на земјата во однос на реформите.

– Македонија со овој вординг што е даден во Стратегијата е задоволна зашто овозможува кога ќе почне да преговара да може да ги престигне и предводниците во процесот доколку постигне резултати. Ние тоа го посакувавме, бидејќи Македонија е најстара во овој процес и пред Србија, Црна Гора и сите други држави од Западен Балкан, оти имавме Договор за стабилизација и асоцијација во 2001 година, кандидат сме од 2005 година и има најмногу напреднато во процесот на хармонизација со европското законодавство и трансформацијата на општеството – рече Османи.

Тој посочи дека Извештајот на Европската комисија за напредокот на земјата ќе биде соопштен на 17 април и очекува чиста деветта по ред препорака за отпочнување преговори.

Во врска со содржината на Стратегијата, она што ја издвојува во однос на сите досегашни документи, е што таа определува обврски не само за земјите кандидати, туку и за ЕУ односно процесот на проширување го прави двонасочен.

Во анексот на Стратегијата, според Османи, содржана е и листа на задачи за ЕУ преку кои таа треба да ги подготви земјите за членство.

Од земјите кандидати се очекува да спроведат сеопфатни реформи во клучните области во однос на владеење на право, фундаментални права и управувања, зајакнување на економијата, примена на правилата и стандардите на ЕУ и помирување и добрососедски односи.


Јункер и Могерини ќе ја посетат Македонија


Брисел, 2 февруари, 2018 - 18:58 (META) 

Жан Клод Јункер, претседателот на Европската комисија до крајот на месецов треба да допатува во прва официјална посета на Република Македонија, објавија дел од медиумите повикувајќи се на дипломатски извори.

Јункер во тој период ќе има неколку посети на земјите на Западен Балкан.

Наредниот месец, во март, во Скопје се очекува да допатува и високата претставничка за надворешна политика и безбедност на Европската Унија, Федерика Могерини.


Стратегијата за проширување на ЕУ ќе биде презентирана на 6 февруари


Стразбур, 22 јануари, 2018 - 12:09 (META) 

Стратегијата за проширување на Европската Унија наречена „Уверлива перспектива за проширување на земјите од Западен Балкан“ ќе биде презентирана на 6 февруари за време на пленарната сесија на Европскиот парламент во Стразбур.

Како што објави порталот „Еуропијан Вестерн Балканс“, колеџот на Европската комисија со кој ќе претседава претседателот на Комисијата Жан Клод Јункер ќе заседава утрото во Стразбург и до пладне ќе го усвои финалниот текст на Стратегијата.

Еврокомесарот за соседска политика и проширување, Јоханес Хан, предвидено е во 15 часот да ја презентира Стратегијата за проширување пред членовите на Европскиот парламент.

Според информации од медиуми кои имале пристап до Стратегијата, документот ќе вклучува општи насоки за побрз процес на интеграција на сите земји од регионот со поконкретни датуми за проценка на Црна Гора и Србија.

Согласно временската рамка на Европската комисија, 2019 ќе биде суштинска година за земјите од Западниот Балкан. Се очекува таа година да биде потпишан документ за „целосна нормализација на односите“ меѓу Србија и Косово, додека Македонија и Албанија треба да ги отпочнат пристапните преговори со Брисел, а Босна и Херцеговина да добие статус на земја кандидат за членство во ЕУ.


Борисов: Бугарската граница е најдобро чуван Шенген


Софија, 12 јануари, 2018 - 15:38 (META) 

Ако има подобра Шенгенска граница од нашата во Европа, самиот јас ќе кажам дека не сакам Бугарија да влезе во Шенген, порача денеска бугарскиот премиер Бојко Борисов на конференција за медиумите во Софија денеска, по општата седница на Колегиумот на европските комесари и на бугарската влада, која се одржа еден ден по церемонијата почетокот на бугарското претседателство со ЕУ.

Повторувајќи дека Бугарија најдобро ја чува европската граница, Борисов рече дека во тоа ќе го увери и холандскиот премиер Марк Руте, кој на 6 и 7 февруари ќе биде во посета на Бугарија. Борисов ќе го носи Руте за самиот да се увери како Бугарија ги чува надворешните граници.

На церемонијата за почетокот на бугарското претседателствување со Советот на ЕУ, претседателот на Европската Комисија, Жан Клод Јункер вчера рече дека Бугарија ги исполнува сите услови да се приклучи во Шенгенскиот договор за заедничките граници и покрај тоа што некои членки на ЕУ го блокираат тоа.