!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Путин денеска ќе се сретне со Макрон, Меркел, Ердоган и со Јункер


Хамбург, 8 јули, 2017 - 12:35 (META) 

Рускиот претседател Владимир Путин денеска во Хамбург ќе има низа билатерални состаноци на маргините на самитот на Групата 20 индустриски развиени земји – Г20.

Путин најпрво ќе разговара со претседателот на Франција, Емануел Макрон, и со германската канцеларка Ангела Меркел, а потоа со турскиот претседател Реџеп Таип Ердоган и со претседателот на Европската комисија Жан-Клод Јункер.

Русија и САД вчера постигнаа договор за примирје на југозападот на Сирија како еден од резултатите на првиот состанок на претседателите Доналд Трамп и Владимир Путин.


Јункер до Тајани: Смешен си!


Брисел, 4 јули, 2017 - 18:10 (META) 

Претседателот на Европската комисија, Жан-Клод Јункер, денеска го нарече претседателот на Европскиот парламент, Антонио Тајани, „смешен“, по малата расправа за присуството на мал број европратеници на пленарната седница на Европскиот парламент.

Јункер им се заблагодари на пратениците за присуството и рече дека малиот број е одраз на тоа дека „парламентот е несериозен“.

Од повеќе од 700 европратеници, на седницата присуствувале неколку десетици.

Тајани побара „поголемо почитување“ и додаде дека Комисијата не го контролира Парламентот, туку обратно.

– Само неколку членови на парламентот ја контролираат Комисијата. Смешен си! – возврати Јункер.

И Тајани и Јункер припаѓаат на Европската народна партија.


Меркел: Мораме да го чуваме наследството на Хелмут Кол


Стразбур, 1 јули, 2017 - 16:59 (META) 

Повеќе од 20 шефови на држави и повеќе стотици официјални претставници денеска присуствуваа на комеморацијата во Европскиот парламент во Стразбур, по повод смртта на поранешниот германски канцелар Хелмут Кол. Тие истакнаа дека Кол придонесе за обединувањето на Европа и за помирување на поранешните противници на континентот.

Ковчегот покриен со знамето на Еврпската Унија, кој го внесоа осум германски војници, беше поставен во средиштето на пленарната сала на Европскиот парламент за церемонијата, која е прва од ваков тип во историјата на Европската Унија.

Три венци беа поставени пред ковчегот, еден во боите на Германија, друг на Европската Унија и трет од неговата сопруга.

Германската канцеларка Ангела Меркел, стоејќи до ковчегот, рече дека Кол работел за обединување на Германија, додека други се двоумеле, додавајќи дека неговата мотивација секогаш била во Европа да нема повеќе војни.

„Сега е на нас да го зачуваме твоето наследство. Се поклунувам пред тебе и твоето сеќавање со благодарност и со понизност“, рече Меркел, која исто така, изрази лична благодарност за можностите и за помошта што Кол ѝ ги дал во нејзината кариера.

Претседателот на Европската комисија, Жан Клод Јункер, во пресрет на церемонијата изјави дека Хелмут Кол бил вистински Европеец и пријател и дека Европа му должи многу.

Претседателот на Европскиот парламент, Антонио Тајани, истакна дека Кол заслужува почесно место во пантеонот на Европа, бидејќи без двоумење им пружи рака на пријателство на новите демократии во Источна Европа по падот на Железната завеса.

Поранешниот претседател на САД, Бил Клинтон, рече дека Хелмут Кол пружи шанса да „бидеме вклучени во нешто поголемо од нас самите, од нашите мандати или минливи кариери“.

Премиерот на Русија, Дмитриј Медведев, на комеморацијата во Стразбур истакна дека „Кол беше творец на светскиот поредок“, додавајќи дека тој во Русија ќе остане запаметен како пријател и мудра и искрена личност.

На комеморацијата во Стразбур присуствува и делегација на македонската Влада, предводена од вицепремиерот за економски прашања, Кочо Анѓушев.

Хелмут Кол почина на 16 јуни оваа година, на 87-годишна возраст. Тој беше канцелар на Германија од 1982 до 1998 година од редовите на Христијанско-демократската унија, чиј лидер беше од 1973 до 1998 година. За време на неговото вршење на функцијата канцелар се случи паѓањето на Берлинскиот ѕид во 1989 година и повторно обединување на Западна и на Источна Германија во една држава. Тој беше заговорник за ширење на Европската Унија на исток и заедно со поранешниот француски претседател Франсоа Митеран беа главните архитекти на Договорот од Мастрихт за воведување заедничка европска валута – еврото.


Естонија го презеде претседавањето со Европската Унија


Талин, 1 јули, 2017 - 11:16 (META) 

Естонија денеска го презеде шестмесечното претседателство со Европската Унија од Малта. Естонскиот премиер, Јури Ратас, и претседателот на Европската комисија, Жан Клод Јункер, вчера имаа средба на која разговараа околу програмата на естенското претседавање со ЕУ.

„Вашиот тим е подготвен и ги видовме големите напори кои ги вложивте во изминатите неколку месеци. Претседателството е во добри раце“, изјави Јункер, пренесува балканскиот сервис на „Радио Слободна Европа“.

Според претседателот на ЕК, историјата покажала дека претседавањата на помалите земји членки со ЕУ се секогаш успешни.

Јункер нагласи дека мотото на естонското претседавање со ЕУ, кое гласи „Единство преку рамнотежа“, оди со задачите и предизвиците со кои се соочува Унијата.

Ратас и Јункер разговарале на бројни теми, вклучувајќи го слободниот протек на податоци и обнова на статегијата на ЕУ за безбедност на интернет.

Ратас потсети дека Јункер уште на почетокот на мај изразил очекување дека естонското претседателство со ЕУ ќе донесе „значаен напредок“ особено околу прашањата од дигиталната технологија.

На состанокот Јункер и Ратас разговарале и за прашања околу одбранбената политика на Европската Унија.


Туск и Јункер му го честитаа на Заев изборот за премиер


Брисел, 8 јуни, 2017 - 18:10 (META) 

Претседателите на Европскиот совет и на Европската комисија, Доналд Туск и Жан-Клод Јункер, денеска испратиле честитка до Зоран Заев по повод неговиот избор за премиер и за формирањето на новата Влада.

„Формирањето на новата Влада нуди можност за придвижување надвор од рамките на политичката борба што ја држеше земјата назад толку долго. Наредниот период ѝ нуди на новата Влада можност за посветена работа, преку конструктивен дијалог со опозицијата, кон заедничката цел за евроатлантска интеграција“, се вели во честитката, соопштуваат од Владата.

Континуираната посветеност на новата Владата кон целосна имплементација на Договорот од Пржино и спроведување на приоритетите за итна реформа ќе биде од суштинско значење за успехот на Македонија, се додава во честитката на Туск и на Јункер до Заев.


Бугарката Марија Габриел ќе биде еврокомесар за дигитална економија


Брисел, 16 мај, 2017 - 13:29 (META) 

Марија Габриел, која беше номинирана од Бугарија за нов еврокомесар, ќе го води ресорот дигитална економија и дигитално општество, соопшти претседателот на Европската комисија, Жан-Клод Јункер, по средбата со бугарската кандидатка за нов член на „владата“ на ЕУ.

Бугарија нема свој претставник во ЕК од почетокот на годинава, откако Кристалина Георгиева поднесе оставка на функциите заменик-претседател и еврокомесар за буџет во ЕК за да ја преземе функцијата извршен директор на Светска банка.

Јункер ја потврди компетентноста на Марија Габриел за позицијата и кажа дека за одлуката за ресорот го информирал и бугарскиот премиер Бојко Борисов.

Како комесар за дигитална економија и дигитално општество, Габриел ќе го поддржува исполнувањето на стратегијата за единствен дигитален пазар, која беше прифатена од Европската комисија пред точно две години. Задолженијата на новата еврокомесарка се и поставување на темелите за дигиталната иднина на Европа, кои вклучуваат телекомуникациски мрежи од континентални размери, прекугранични дигитални услуги и бран на нови иновативни европски фирми.


Јункер и Меј следната недела во Лондон ќе разговараат за подготовките за Брексит


Брисел, 20 април, 2017 - 20:37 (META) 

Претседателот на Европската комисија (ЕК), Жан-Клод Јункер, в среда ќе отпатува за Лондон, на разговори со премиерката на Велика Британија, Тереза Меј, околу подготовките за преговорите за излегувањето на земјата од Европската Унија (Брексит).

Портпаролката на ЕК, Мина Андреева, денеска соопштила дека заедно со Јункер во Лондон ќе отпатува и главниот преговарач на ЕУ за Брексит, Мишел Барние. Таа додала дека станува збор за посета на покана на британската премиерка.

Јункер вчера изјави дека преговорите за излегување на Британија од ЕУ ќе почнат по предвремените парламентарни избори во Велика Британија, закажани за 8 јуни.

Прашана за коментар на пишувањата во медиумите дека Меј ќе ја укине слободата на движење на граѓаните на ЕУ во Велика Британија пред изборите, Андреева го повторила ставот на Брисел дека човековите права мора да се почитуваат и дека никој не треба да ги користи како адут во преговорите.

„Сакаме повторно да ги увериме граѓаните на ЕУ што живеат во Велика Британија, како и британските државјани во ЕУ, дека нивните права и понатаму ќе се почитуваат без дискриминација, како и тоа дека ова ќе биде многу важно прашање во преговорите, кога тие ќе почнат“, истакнала портпаролката на ЕК, пренесуваат агенциите.


Меркел, Јункер и Столтенберг ја поддржаа одлуката на Трамп за нападот на Сирија


Берлин, 7 април, 2017 - 15:29 (META) 

Германската канцеларка Ангела Меркел денеска изјави дека нападот на САД на сириската воздухопловна база, од која е употребено хемиско оружје за нападот во Идлиб, е разбирлив имајќи го предвид страдањето на сирискиот народ.

– Нападот на САД е разбирлив, имајќи ги предвид димензиите на военото злосторство и страдањето на невиниот народ, како и блокадата на Советот за безбедност на ОН – рече Меркел.

Таа нападите ги опиша како „лимитирани и таргетирани“.

Претседателот на Европската комисија, Жан-Клод Јункер, порача дека мора да се одговори на употребата на хемиско оружје. Изјавата доаѓа откако американскиот претседател Доналд Трамп нареди напад на воената база на сириската војска, како одговор за нападот со хемиско оружје во провинцијата Идлиб.

– САД ја известија ЕУ дека овие напади се лимитирани и имаат цел да ги запрат понатамошните разорувања со хемиско оружје – рече Јункер.

Според генералниот секретар на НАТО, Јенс Столтенберг, сирискиот претседател Башар ал Асад сноси целосна одговорност за воздушните напади на САД врз сириската воена база.

– Сирискиот режим сноси целосна одговорност за ваквиот развој на настаните. Секоја употреба на хемиско оружје е неприфатлива и не може да мине без одговор, а тие што го направиле тоа, мора да одговараат – наведе Столтенберг.


Јункер го предупредил Трамп дека колапсот на ЕУ води кон нова војна на Балканот


Брисел, 24 март, 2017 - 14:19 (META) 

Претседателот на Европската комисија, Жан-Клод Јункер, го предупредил претседателот на САД, Доналд Трамп, дека евентуален колапс на Европската Унија ќе доведе до нова војна на Балканот.

Јункер во интервју за „Фајненшал тајмс“ изјавил дека во разговор со новиот заменик-претседател на САД, Мајк Пенс, гп предупредил Трамп да престане со реториката што поттикнува и други држави да си заминат од ЕУ по одлуката Британија да ја напушти Унијата.

„Му реков на заменик-претседателот: „Не велете го тоа, не канете ги и другите да си заминат, бидејќи ако ЕУ пропадне, ќе имате нова војна на Западен Балкан“, вели Јункер за „Фајненшал Тајмс“.

Според Јункер, многу е важно Балканот да ја има можноста и перспективата за приклучување кон европското семејство.

„Ако ги оставиме сами Босна, Република Српска, Македонија, Албанија, сите овие држави – тие повторно ќе имаат војна“, посочил Јункер.


Трговска војна помеѓу ЕУ и САД би била штетна за двете страни, смета Јункер


Брисел, 18 март, 2017 - 17:52 (META) 

Трговска војна помеѓу Соединетите Американски Држави и Европа би била штетна за двете страни, вели претседателот на Европската комисија, Жан-Клод Јункер, во интервју за викенд-изданието на германскиот весник „Билд“, јавуваат светските агенции.

Прашан дали Европа може да издржи трговска војна со САД, Јункер вели дека „трговска војна не би била во интерес ниту на ЕУ, ниту на САД“.

Претседателот на ЕК нагласил дека е потребно сериозно да се сфатат протекционистичките коментари на Доналд Трамп и дека треба да се биде подготвен.

Американскиот министер за финансии, Стивен Менучин, во четвртокот, во Берлин изјави дека САД не бараат почнување трговска војна, но инсистираше дека некои од договорите мора да се модифицираат за да бидат „повеќе избалансирани“.

Јункер во интервјуто истакнал дека е задоволен што во вторник следната недела, ќе се сретне со премиерот на Јапонија, Шинзо Абе, бидејќи кон крајот на оваа година сака да биде заклучен договорот за слободна трговија меѓу Европската Унија и Јапонија.

Трамп претходно ја обвини Јапонија дека го искористува слабиот јен за да му даде на својот извоз неправедна трговска предност. Главниот советник на Трамп, Питер Наваро, во слична изјава ја обвини Германија дека го користи претерано потценетото евро како конкурентска предност.