!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Василевски останува во „Шутка“, а Димовски во домашен притвор – судот им ги одби жалбите


Скопје, 12 декември, 2017 - 16:18 (META) 

Пратениците во Собранието, Сашо Василевски и Љупчо Димовски остануваат во притвор, односно во куќен притвор откако Кривичниот совет на Основниот суд Скопје 1 денеска им ги одби жалбите и ги потврди решенијата на судијата на претходна постапка.

Василевски и Димовски се дел од шестмината пратеници осомничени за насилствата во Собранието од 27 април, оваа година.

„Постапувајќи по жалби изјавени против решенија на судија на претходна постапка за определување мерка притвор за С.В. и мерка куќен притвор за Љ.Д., опфатени со предлогот на ОЈО за гонење организиран криминал и корупција, а поврзано со настаните од 27 април во Собранието на Р.М.,Кривичниот совет при Основниот суд Скопје 1 – Скопје, по одржана седница, донесе решение со кое ги одби жалбите и ги потврди решенијата на судијата на претходна постапка“, стои во соопштението на Кривичниот суд.

Претходно, минатата недела, Кривичниот совет им ги потврди притворите на пратениците, Крсто Мукоски и Љубен Арнаудов и мерката куќен притвор на Јохан Тарчулоски и на Жаклина Пешевска.

Инаку, во истрагата на Обвинителството за гонење на организиран криминал и корупција отвори се осомничени вкупно 36 36 лица, меѓу кои и поранешниот министер за внатрешни работи и директор на Бирото за јавна безбедност, Митко Чавков, организаторите на протестите на „За заедничка Македонија“, Игор Дурловски, Богдан Илиевски и Борис Дамовски, актерот Владо Јовановски и шестмината пратеници на ВМРО-ДПМНЕ.

Тие се товарат за терористичко загрозување на уставниот поредок и безбедноста на државата.


Мукоски, Арнаудов, Дамовски и Јовановски остануваат во притвор, одлучија Кривичен и Апелација


Скопје, 7 декември, 2017 - 16:40 (META) 

Кривичниот совет на Основниот суд Скопје 1 ги отфрли жалбите и ги потврди притворите на пратенците Крсто Мукоски и Љубен Арнаудов, како и решенијата со кои им беше одредена мерка домашен притвор на нивните колеги Јохан Тарчуловски и Жаклина Пешевска.

Во врска со жалбата на пратеникот Сашо Василевски, судот дополнително ќе информира, откако ќе го донесе решението.

Пратеникот Љупчо Димовски, пак, како што соопштија денеска од судот, воопшто не поднел жалба на одлуката на судијата на претходна постапка, кој му одреди домашен притвор.

Шестемина пратеници се осомничени за насилствата во Собранието од 27 април годинава и се товарат за терористичко загрозување на уставниот поредок и на безбедноста на државата.

Инаку, во врска со истиот случај, и Апелацискиот суд Скопје денеска ги одбил жалбите на Борис Дамовски, на актерот Владо Јовановски и на Горан Ѓошевски, поранешниот шеф на обезбедувањето на поранешниот собраниски спикер, Трајко Вељаноски.

Нивните адвокати, како што потврдија од Апелацискиот суд, денеска на јавна седница побарале до судот на тројцата осомничени да им го укине притворот и да им ореди поблага мерка, односно куќен притвор.


Тројца осомничени за 27 април од куќен притвор одат во истражен затвор


Скопје, 1 декември, 2017 - 10:23 (META) 

Кривичниот совет на Основниот суд Скопје 1 вчера уважил дел од жалбите на Јавното обвинителство за гонење организиран криминал и корупција и на тројца осомничени за насилствата во Собранието од 27 април, им го заменил куќниот притвор, што претходно им беше одреден, со построга мерка – притвор, потврдија од судот.

Како што соопштија оттаму, станува збор за лицата М.П., Г.Ѓ. и Е.Д.Б.

Ова значи дека овие тројца осомничени треба, а според дел од медиумите, веќе и се префрлени од домашен притвор во притвор во истражен затвор.

За другите двајца кои добија куќен притвор, за кои се жалеше Обвинителството, Кривичниот совет ќе одлучува дополнително.

Инаку, уште еден осомничен, кој ѝ беше недостапен на полицијата, вчера самиот им се предал на органите на прогонот. Тој, како што информираат од судот, бил изведен пред судија на претходна постапка, кој по распитот му одредил мерка притвор од 30 дена.

Со ова вкупниот број на осомничени за насилствата од 27 април кои добија притвор, сега изнесува 19 лица.

Денеска, Собранието ќе одлучува за одземањето на имунитетот на пратениците Крсто Мукоски, Љубен Арнаудов, Јохан Тарчуловски, Сашо Василевски, Љупчо Димовски и Жаклина Пешевска, во врска со барањето на Кривичниот суд за нивно притворање.

Обвинителството за гонење организиран криминал и корупција во вторникот оваа недела, соопшти дека отворило истрага против 36 лица за насилствата од 27 парил во Собранието.

Осомничените, меѓу кои се поранешниот директор на Бирото за јавна безбедност и поранешен министер за внатрешни работи, Митко Чавков, како и дел од организаторите на иницијативата „За заедничка Македонија“, Владо Јовановски, Борис Дамовски, Игор Дурловски и Богдан Илиевски, се товарат за терористичко загрозување на уставниот поредок и на безбедноста на државата.


Врховниот суд ги укина пресудите и го врати „Монструм“ на повторно судење


Скопје, 24 ноември, 2017 - 16:02 (META) 

Врховниот суд ги укина пресудите за „Монструм“ и го врати случајот на повторно судење. Судот донесе пресуда со која ги уважува жалбите на обвинетите за петкратното убиство кај Смиљковско Езеро, што се случи на 12 април 2012 година.

Со пресудата на највисокиот суд во земјава се укинати пресудите на Кривичниот и на Апелацискиот суд Скопје, со кои шест лица беа осудени на доживотна казна затвор, и го враќа предметот на повторно судење.

„Врховниот суд на Република Македонија донесе пресуда по предметот Вкж2 бр.3/2016, познат во јавноста како „Монструм“, со која жалбите на одбраната се уважени, а првостепената и второстепената пресуда се укинати и предметот е вратен на првостепениот суд на повторно одлучување“, стои во денешното соопштение од Врховниот суд.

Оттаму наведуваат дека „во тек е постапка за објавување на наведената пресуда и дека за тоа јавноста ќе биде дополнително информирана“.

Одлуката на Врховниот суд доаѓа по јавната седница за разгледување на жалбите на обвинетите во случајот што се одржа на 3 октомври годинава и на која јавната обвинителка Лилјана Спасоска побара укинување на пресудите на Кривичниот и на Апелацискиот суд и враќање на предметот на повторно судење.

Барањето на Спасоска, која е и в.д. шеф на Јавното обвинителство, беше поради „неутврдена фактичка состојба“, но и поради евентуално постоење на прислушувани разговори кои ги поседува Специјалното јавно обвинителство и кои би можеле да го сменат текот на постапката.

Обвинителката пред судот, исто така, побара да бидат уважени и жалбите на одбраната на обвинетите за петкратното убиство кај Смиљковско Езеро, кои пред Врховниот суд ги отфрлија обвинувањата дека се извршители на масакрот и повторно тврдеа дека се невини.

За петкратното убиство кај Смиљковското Езеро, на доживотен затвор се осудени Алил Демири, Африм и Аѓим Исмаиловиќ, Езим и Хаки Азири и Самил Љута. Масакрот кај Смиљковското Езеро се случи на 12 април 2012 година, на Велики четврток, пред големиот христијански празник Велигден, кога беа убиени момчињата Кире Тричковски, Филип Славковски, Цветанчо Ацковски, Александар Наќевски и рибарот Борче Стефановски.


Поднесени 27 жалби до Управниот суд за одбиените приговори од ДИК


Скопје, 22 октомври, 2017 - 10:18 (META) 

Вкупно 27 жалби се поднесени до Управниот суд од партиите ноќеска против решенијата на Државната изборна комисија (ДИК) за приговорите за првиот круг од локалните избори, што се одржа на 15 октомври, соопшти судот.

Инаку, рокот за за поднесување жалби за одбиените приговори од ДИК истекува денеска во 11 часот.

Најмногу тужби поднела ВМРО-ДПМНЕ, вкупно 24, две жалби се од ТМРО и една од Левица.

Управниот суд има рок од 48 часа во кој треба да донесе одлука по жалбите.

По тужбите ќе одлучуваат пет судечки совети, составени од петмина судии од Управниот суд, избрани со жрепка. Тужбите електронски им се распоредуваат на судиите, а одлучувањето ќе биде на јавни седници.

Управниот суд вчера ја отфрлил тужбата од Ѓорѓи Шарковски против „државната администрација во Кривогаштани“ поради оневозможување на собирање потписи за градоначалник и за членови на совет во Општина Кривогаштани.

Во меѓувреме тече кампањата за вториот круг од локалните изборите. Ноќеска на полноќ заврши рокот за поднесување барања за гласање на болни и изнемоштени лица.

Вториот круг од локалните избори ќе се одржи на 29 октомври.


ВМРО-ДПМНЕ до Управниот суд ќе поднесе жалби за сите приговори одбиени од ДИК


Скопје, 21 октомври, 2017 - 13:25 (META) 

ВМРО-ДПМНЕ ќе го искористи правото на жалба пред Управниот суд за сите приговори за локалните избори на 15 октомври, што беа одбиени од Државната изборна комисија, соопштија денеска од опозициската партија, додавајќи дека нема да дозволат некој да ја уништува демократијата и правната држава во Република Македонија.

Рокот за поднесување жалби до Управниот суд е 24 часа и истекува вечерва, имајќи предвид дека ДИК синоќа им ги достави решенијата на политичките партии за чии приговори одлучуваше. Откако ќе ги добие приговорите, Управниот суд има рок од 48 да одлучи по нив.

Од ВМРО-ДПМНЕ обвинуваат дека СДСМ ги организирала најнедемократските избори во историјата на независна Македонија и дека целата изборна кампања поминала во изборен поткуп, уцена и со закани врз гласачите, додека во текот на изборниот ден бил спроведен и т.н. бугарски воз, односно гласачките кутиите биле полнети со гласачки ливчиња однапред заокружени за СДСМ.

Партијата ја обвини и ДИК дека станала соучесник во сето тоа, „занемарувајќи и релативизирајќи очигледни факти и докази, со што се стави во функција на прикривање на изборните криминали на СДС“.

„ВМРО-ДПМНЕ ги повикува ОБСЕ/ОДИХР да ги нотираат овие очевидни случаи на криминал, да застанат на страна на демократијата, правото на глас и на слободата како врвни вредности на цивилизираниот свет“, се додава во соопштението.

Државната изборна комисија ги одби сите приговори поднесени за гласањето и за сумирањето на резултатите од првиот круг на локалните избори, од кои 40 беа поднесени од ВМРО-ДПМНЕ и по еден од ТМРО, Алијанса за Албанците и од Левица.


Кривичниот суд ги отфрли „бомбите“ како доказ во уште шест случаи на СЈО


Скопје, 20 октомври, 2017 - 13:11 (META) 

Кривичниот суд во Скопје денеска официјално соопшти дека советите за оценка на обвинителните акти за случаите „Титаник 2“, „Тенк“, „Титаник“, „ТНТ“, „Тревник“ и „Тифани“ на Специјалното јавно обвинителство, донеле решенија со кои прислушуваните разговори не можат да се користат како докази во судските простапки за овие случаи.

Според одлуките на Кривичниот суд, овие докази, приложени со обвинителните акти, се прибавени на незаконит начин и со кршење на слободите и на правата утврдени со Уставот, закони и со меѓународни договори и не може да се користат и врз нив не може да се заснова судска одлука.

Сепак, овие одлуки на Кривичниот суд не се правосилни и СЈО има право на жалба против решенијата до Апелацискиот суд, во рок од три дена.

Инаку, Основниот суд Скопје 1 кон крајот на септември донесе идентични одлуки, со кои „бомбите“ беа изземени како доказ во случаите „Тендери“, „Топлик“ и „Тортура“. СЈО веднаш ги обжали решенијата до Апелацискиот суд, кој сè уште не донел одлука по жалбите.

Претходно, Апелација, постапувајќи по жалби на СЈО, донесе одлука дека прислушуваните разговори можат да се користат како докази во судскиот процес за насилствата пред Општина Центар, во кој првообвинет е лидерот на ВМРО-ДПМНЕ, Никола Груевски, и во судската постапка за случајот „Триста“.

Од Кривичниот суд денеска соопштија дека Апелација им го доставила решението со кое се прифаќа жалбата на СЈО и се дозволува користење на „бомбите“ како доказ во случајот „Триста“.

Првостепениот суд соопшти и дека судија за оценка на обвинителен акт го прифатил обвинението на СЈО за случајот „Труст“, во кој првообвинет е бизсменот Сеад Кочан, како и обвинението за случајот „Тотал“, каде обвинет е новинарот и уредник на „Сител“, Драган Павловиќ – Латас.

Судењето за „Труст“ е закажано за 7 ноември, додека за „Тотал“ судот дополнително ќе одреди датум за почеток на главната расправа.


Досега нема приговори до ДИК, роковите истекуваат денеска


Скопје, 17 октомври, 2017 - 11:09 (META) 

Во 19 часот денеска истекува рокот за поднесување приговори за процесот на гласањето до Државната изборна комисија (ДИК), а на полноќ ќе заврши и рокот за поднесување приговори за првичните резултати од локалните избори што се одржаа во неделата, на 15 октомври.

Портпаролката на ДИК, Љупка Гугучевска, за „Мета“ вели дека досега ниту една политичка партија нема поднесено приговори.

Рокот за поднесување приговори што се однесуваат на текот на гласањето од 7 до 19 часот истекуваат денеска во 19 часот, а рокот за поднесување приговори што се однесуваат на постапката за сумирање и за утврдување на резултатите истекува вечерва на полноќ.

Откако ДИК ќе одговори, партиите и кандидатите ќе имаат можност да поднесат тужби до Управниот суд, а откако ќе се расчисти секоја таква ситуација, ќе бидат соопштени конечните резултати.

Приговорите се поднесуваат најмногу 48 часа од завршувањето на гласањето, односно од првото соопштување на прелиминарните резултати од гласањето, а ДИК е должна да донесе одлука по приговорот во рок од 48 часа по приемот. Тужбите до Управен суд, пак, се поднесуваат 24 часа од приемот на одлуката на судот, а Управен суд е должен да донесе одлука 48 часа откако е примена тужбата.

– Точен број каде изборите завршиле во прв круг може да соопштиме кога резултатите ќе станат конечни, односно кога ќе заврши постапката за одлучувања по приговори и по тужби. Подносителите на листи имаат право и на судска заштита, односно да поднесат тужба до Управниот суд. Откако ќе заврши целата таа постапка, можеме да ги објавиме конечните резултати и тогаш ќе имаме точна претстава во колку избирачки места изборите завршиле во прв круг, а во колку општини ќе има втор круг – објасни претседателот на ДИК, Александар Чичаковски, на вчерашната прес-конференција.

Вториот круг од локалните избори ќе се одржи на 29 октомври. Изборната кампања за вториот круг завршува на 27 октомври во 24 часот.


Врховен суд денеска ќе ги разгледува жалбите за притворите од „бомбите“


Скопје, 26 јули, 2017 - 9:46 (META) 

Иако требаше да почне вчера, седницата на Врховен суд на која треба да се решава за жалбите на одлуките на Апелациски суд Скопје за притвор за обвинетите Горан Грујовски, Тони Јакимовски и Никола Бошковски, ќе биде одржана денеска.

Одбраната на обвинетите се жалеше до Врховниот суд на одлуките на Апелцискиот суд со кои беше прифатено барањето за притвори што го поднесе Специјалното јавно обвинителство (СЈО).

Рокот од 48 часа за одлука по жалбите истекува денеска во 13 часот.

Поранешните функционери на УБК, Грујовски, Јакимовски и Бошковски, се обвинети во предметите „Тврдина“ и „Таргет“ и се товарат за прислушување и за уништување на доказите за прислушувањето.

Претходно Кривичниот суд само им ги одзеде пасошите и им одреди да се јавуваат во суд еднаш неделно, но Апелација ја прифати жалбата на СЈО и ја преиначи одлуката. СЈО побара притвори, образложуваќи дека Грујовски не се појавил на распит, влијаел на сведоци, а во неговиот тефтер имало инструкции за изјавите на сведоците пред СЈО.


Апелација ги одби жалбите во случајот „Титаник“ – нема притвор за Груевски


Скопје, 23 јули, 2017 - 21:47 (META) 

Лидерот на ВМРО-ДПМНЕ и експремиер, Никола Груевски, ексминистерката за внатрешни работи, Гордана Јанкулоска, ексминистерот за транспорт и врски, Миле Јанакиески, поранешниот генерален секретар на Владата, Кирил Божиновски, и Мартин Протоѓер, шефот на кабинетот на експремиерот Груевски, сите обвинети во случајот „Титаник“, остануваат без пасошите, одлучи Апелацискиот суд Скопје.

Информацијата ја потврдија од судот, а одлуката ќе биде објавена утре. Дел од највисоките функционери на ВМРО-ДПМНЕ обвинети се за злосторничко здружување, злоупотреба на пари во изборна кампања и за повреда на избирачко право.

Советот кој одлучуваше по овие жалби го сочинуваа Љиљана Ивановска-Шопова, претседателка на судот, и судиите Сафет Кадрии и Цветанка Периќ. Тие одлучија да ги одбијат жалбите на обвинетите да ги добијат пасошите назад, но ги одбија и жалбите на СЈО обвинетите за изборни нерегуларности да одат во притвор.

На ова решение на Апелацискиот суд не е предвидена жалба.

Обвинетите освен што останаа без патните исправи, имаат обврска еднаш неделно да се јавуваат кај судски службеник.